એક્સાઈઝ પોલિસી કૌભાંડ કેસમાં મુખ્યમંત્રી કેજરીવાલની આજે પુછપરછ

• સવારે 11 કલાકે CBI ઓફિસ પહોંચશે CM
• ભાજપના નેતા ધરપકડની માંગ કરતા હોવાનો દાવો
• અગાઉ આ કેસમાં ઉપ મુખ્યમંત્રી સિસોદિયાની થઈ છે ધરપકડ

દિલ્હીના મુખ્યમંત્રી અરવિંદ કેજરીવાલની આજે સેન્ટ્રલ બ્યુરો ઓફ ઈન્વેસ્ટિગેશન (CBI) એક્સાઈઝ પોલિસી કૌભાંડ કેસમાં પૂછપરછ કરશે. કેજરીવાલે શનિવારે પ્રેસ કોન્ફરન્સમાં કહ્યું કે તેઓ તપાસ એજન્સી સમક્ષ હાજર થશે. એમ પણ કહ્યું કે જો તે ભ્રષ્ટ છે તો દુનિયામાં કોઈ ઈમાનદાર નથી. તેમણે દાવો કર્યો હતો કે ભાજપના નેતાઓ તેમની ધરપકડની માંગ કરી રહ્યા છે અને જો ભાજપે તપાસ એજન્સીને તેમની ધરપકડ કરવાનો આદેશ આપ્યો હોત, તો તે તેમ કરવાનો ઇનકાર કરી શકે નહીં. CBIએ AAP નેતાને રવિવારે સવારે 11 વાગ્યે તેના મુખ્યાલયમાં હાજર થવા માટે સમન્સ જારી કર્યું છે. તપાસ એજન્સી આ કેસમાં દિલ્હીના પૂર્વ ઉપમુખ્યમંત્રી મનીષ સિસોદિયાની ધરપકડ કરી ચૂકી છે.

સરકાર મારી ધરપકડ કરવા માંગે છે : CM

કેજરીવાલે પીએમ નરેન્દ્ર મોદી પર ભ્રષ્ટાચારના આરોપો લગાવવા પર નિશાન સાધ્યું હતું. કહ્યું કે, ગુજરાતમાં ભાજપના 30 વર્ષના શાસનમાં મોદી 12 વર્ષ મુખ્યમંત્રી રહ્યા, પરંતુ એકપણ શાળાની હાલત સુધરી નથી. દિલ્હીની AAP સરકારે 5 વર્ષમાં સરકારી શાળાઓની કાયાપલટ કરી છે. તેમણે કહ્યું કે બીજેપી AAPને સાઇડલાઇન કરવાનો પ્રયાસ કરી રહી છે. ભાજપે પહેલા સત્યેન્દ્ર જૈન અને મનીષ સિસોદિયાને જેલમાં મોકલ્યા હવે તેમની ધરપકડ કરવા માંગે છે.

CBI, ED કોર્ટમાં ખોટું બોલ્યા, કેસ દાખલ કરશે

કેજરીવાલે આરોપ લગાવ્યો કે સીબીઆઈ અને ઈડી કોર્ટમાં ખોટું બોલ્યા કે સિસોદિયાએ પુરાવા છુપાવવા માટે 14 ફોન નષ્ટ કર્યા. EDના જપ્ત કરાયેલા મેમો દર્શાવે છે કે 14 ફોનમાંથી ચાર ફોન તેની પાસે છે જ્યારે એક સીબીઆઈ પાસે છે. અમારી પોતાની તપાસમાં બહાર આવ્યું છે કે બાકીના નવ ફોન (નંબર) સક્રિય હતા અને તેનો ઉપયોગ AAP સ્વયંસેવકો જેવી વ્યક્તિઓ દ્વારા કરવામાં આવી રહ્યો હતો. કેજરીવાલે બાદમાં ટ્વીટ કર્યું કે અમે સીબીઆઈ અને ઈડીના અધિકારીઓ સામે ખોટી જુબાની અને કોર્ટમાં ખોટા પુરાવા રજૂ કરવા બદલ યોગ્ય કેસ દાખલ કરીશું.