ટ્રમ્પ ટેરિફ સામે કેનેડાથી યુરોપમાં અમેરિકન પ્રોડક્ટ્સનો કર્યો બહિષ્કાર

ન્યુયોર્ક, 14 માર્ચઃ અમેરિકાના પ્રમુખ ડોનાલ્ડ ટ્રમ્પ દ્વારા કેનેડા, મેક્સિકો અને ચીન પર સ્ટીલ અને એલ્યુમિનીયમ પરની ટેરિફમાં વધારો કરવાને પગલે હવે કેનેડાથી લઇને યુરોપ સુધી અમેરિકન પ્રોડક્ટ સામે રોષ એટલી હદે વ્યાપી ગયો છે કે લોકોએ તેનો બહિષ્કાર કરવાનું કરવાનુ શરૂ કર્યુ છે. એટલુ જ નહી બહિષ્કારની ચળવળ ધીમે ધીમે વેગ પકડી રહી છે. અનેક બિઝનેસીસ અને ઉપભોક્તાઓ આ નીતિઓને ગેરવાજબી ગણાવીને અમેરિકાની ચીજોને નકારી રહ્યા છે. આ સાથે જ સમગ્ર વિશ્વમાં અમેરિકાની વસ્તુઓ વિરુદ્ધ ‘બોયકોટ યુએસએ’ અભિયાન પણ શરુ થઇ ગયું છે.

વિરોધ કરવા સોશિયલ મીડિયા પર વિવિધ ગ્રુપ સક્રિય

આ ગતિવિધિએ સોશિયલ મીડિયામાં હલચલ મચાવી છે, જેમ કે છેલ્લા સાત દિવસમાં ગુગલ પર બોયકોટ યુએસએ અભિયાનએ જોર પક્ડયુ છે. યુરોપના દેશો અને કેનેડામાં આ અભિયાન ધીમે ધીમે આગળ વધી રહ્યું છે. અન્ય દેશો પણ અમેરિકાની વસ્તુઓનો બહિષ્કાર કરવા માટે ફેસબુક પર ગ્રુપ બનાવી રહ્યાં છે. મળતા અહેવાલ અનુસાર ટ્રમ્પની ડેનમાર્કના ગ્રીનલેન્ડ કબજે કરવાની ઇચ્છાને કારણે પણ યુરોપમાં અમેરિકા સામે વિરોધ વધી રહ્યો છે. ડેનમાર્કના ફેસબુક ગ્રુપના 73000 સભ્યો છે. આ ગ્રુપ અમેરિકન વસ્તુઓના બહિષ્કાર અંગે અભિયાન ચલાવી રહ્યું છે.

તેજ રીતે સ્વીડનના ગ્રુપમાં 80,000 સભ્યો છે. આ ગુ્રપ બોયકોટ યુએસએ અંગેનું ચોથુ સૌથી મોટું અભિયાન છે. આ દરમિયાન ફ્રાન્સે પણ ‘બોયકોટ યુએસએઃ બાય ફ્રેન્ચ એન્ડ યુરોપિયન’ નામની પણ રચના કરી છે. ફ્રાન્સના આ ગ્રુપમાં 20,000 સભ્યો છે અને ગુગલ પર તેનો ત્રીજો ક્રમ છે. કેનેડાએ પણ બોયકોટ અમેરિકા પેજની રચના કરી છે અને તેનો ગુગલ પર પાંચમો ક્રમ છે.

ઇલોન મસ્કની સ્ટારલિંક સાથે 10 કરોડ ડોલરનો કરાર રદ

આટલુ ઓછુ હોય તેમ કેનેડાના ઓન્ટારિયો પ્રાંતના વડા ડોગ ફોર્ડે ઇલોન મસ્કની સ્ટારલિંક સાથે 10 કરોડ ડોલરનો કરાર રદ કરી નાખ્યો છે. આ ઉપરાંત કેનેડાના સાત પ્રાંતોએ અમેરિકામાં ઉત્પાદિત થતા શરાબનો બહિષ્કાર કર્યો છે.
કેનેડામાં 98 ટકા લોકો કેનેડાની ચીજો જ ખરીદે છે

ગયા મહિને કેનેડામાં 3300થી વધુ લોકોનો સર્વે કરવામાં આવ્યો હતો. આ સર્વેમાં 98 ટકા લોકોએ જણાવ્યું હતું કે તેઓ કેનેડામાં નિર્મિત વસ્તુઓ ખરીદી રહ્યાં છે. અમેરિકાના ટ્રાવેલ એસોસિએશનના જણાવ્યા અનુસાર કેનેડાના લોકોના અમેરિકન પ્રવાસમાં 10 ટકાનો ઘટાડો થયો છે. જેના કારણે અમેરિકાના પ્રવાસ ઉદ્યોગને 2.1 અબજ ડોલરનું નુકસાન થવાનો અંદાજ છે અને 14000 લોકોની નોકરી સામે ખતરો ઉભો થઇ શકે છે.

ટ્રમ્પના પ્રિય મસ્કની પ્રોડક્ટને પણ ફટકો

વિશ્વમાં ટેસ્લાની કારોના વેચાણમાં ઘટાડો જોવા મળી રહ્યો છે. પ્રાપ્ત આંકડા અનુસાર જર્મનીમાં ગયા વર્ષના જાન્યુઆરીની સરખામણીમાં ચાલુ વર્ષે જાન્યુઆરીમાં ટેસ્લાના વેચાણમાં 70 ટકાનો ઘટાડો થયો છે. યુરોપમાં જાન્યુઆરી, 2025માં ટેસ્લાની ફક્ત 7517 કારો વેચાઇ છે. જે ગયા વર્ષના જાન્યુઆરીની સરખામણીમાં 50 ટકાનો ઘટાડો દર્શાવે છે. ટેસ્લાની કારોનું વેચાણ પોર્ટુગલમાં 50 ટકા, ફ્રાન્સમાં 45 ટકા, સ્વીડનમાં 42 ટકા અને નોર્વેમાં 48 ટકા ઘટયું છે.

આ પણ વાંચોઃ ઉનાળાની રજાઓમાં નૈનીતાલ જવાનું વિચારો છો? તો પહેલા આ સમાચાર વાંચી લેજો