વડોદરાનો આ ત્રણ બાળકોનો પિતા કરી ચૂક્યો છે 50થી વધુ મહિલાઓ સાથે લગ્ન: આ રીતે ફૂટ્યો ભાંડો

નવી દિલ્હી, 23 સપ્ટેમ્બર : દિલ્હી પોલીસની ક્રાઈમ બ્રાન્ચે ઈન્ટરસ્ટેટ વોન્ટેડ ગુનેગાર મુકીમ અય્યુબ ખાનની ધરપકડ કરી છે. અય્યુબ વડોદરા, ગુજરાતનો કાયમી રહેવાસી છે. તેમની ઉંમર 38 વર્ષની છે. અય્યુબે લગ્નના બહાને મેટ્રિમોનિયલ વેબસાઇટ્સ દ્વારા 50 થી વધુ મહિલાઓને છેતર્યા હોવાનો આરોપ છે. તે વરિષ્ઠ સરકારી અધિકારી હોવાનો નાટક કરીને છોકરીઓને લલચાવતો હતો. તે ઘણા રાજ્યોમાં આવી ઘટનાઓમાં સંડોવાયેલો છે અને વિવિધ રાજ્યોની પોલીસ તેને શોધી રહી હતી.

ત્રણ બાળકોનો પિતા છે

અય્યુબના લગ્ન 2014માં થયા હતા અને તેમના ત્રણ બાળકો છે. તેમ છતાં તે છેલ્લા ચાર વર્ષથી લગ્નના નામે મહિલાઓ અને યુવતીઓને છેતરી જુદા જુદા રાજ્યોમાં નાસતો ફરતો હતો. તેનો પ્રથમ શિકાર ગુજરાતના વડોદરાની છૂટાછેડા લીધેલી મહિલા હતી. શાદી.કોમ પર પ્રોફાઈલ બનાવીને અય્યુબે આ વર્કિંગ વુમનને પોતાની જાળમાં ફસાવી હતી.

તેની પ્રોફાઈલમાં તેણે પોતાને સરકારી અધિકારી બતાવ્યો હતો. આ ઉપરાંત પ્રોફાઇલમાં એવું પણ લખવામાં આવ્યું હતું કે તેની પત્નીનું અવસાન થયું છે. વાતચીત દરમિયાન, તેણે મોટું હૃદય બતાવ્યું અને મહિલા અને તેના પરિવારને કહ્યું કે તેને કોઈ કમી નથી. તે પોતાની દીકરી માટે માત્ર માતા ઈચ્છે છે. આવી સ્થિતિમાં, મહિલાના પરિવારના સભ્યો અય્યુબની વાતથી પ્રભાવિત થયા અને તેઓએ તેમની પુત્રીના લગ્ન તેની સાથે કરી દીધા.

આ પછી, એટલે કે 2020 થી, અય્યુબે બીજી ફેક પ્રોફાઇલ બનાવીને દેશભરની છોકરીઓ અને મહિલાઓને ફસાવવાનું શરૂ કર્યું. પહેલા તે મેટ્રિમોનિયલ વેબસાઈટ દ્વારા છોકરીઓને લલચાવીને મોટી મોટી વાતો કરતો હતો, પછી મહિલાઓને ઈમોશનલી બ્લેકમેલ કરીને તેની મૃત પત્ની અને દીકરીના ફોટા બતાવતો હતો. જેના કારણે યુવતીઓ તેના પર ભરોસો કરતી અને તે તેમની સાથે લગ્ન કરીને પૈસા પડાવી લેતો અને પછી ફરાર થઈ જતો. અય્યુબ હાઈપ્રોફાઈલ છોકરીઓ અને છૂટાછેડા લીધેલી મહિલાઓને જ ટાર્ગેટ કરતો હતો.

પોલીસે આ રીતે ધરપકડ કરી

જ્યારે તેની ફરિયાદો દિલ્હી પોલીસ સુધી પહોંચી ત્યારે ક્રાઈમ બ્રાન્ચ અને એન્ટી એક્સટોર્શન એન્ડ કિડનેપિંગ સેલને તેને પકડવાની જવાબદારી સોંપવામાં આવી હતી. પણ અય્યુબ સુધી પહોંચવું સહેલું ન હતું. કારણ કે તે સતત પોતાનો મોબાઈલ નંબર અને લોકેશન બદલતો રહેતો હતો. પોલીસ તેને શોધીને એક જગ્યાએ પહોંચી શકી ત્યાં સુધીમાં તે બીજી જગ્યાએ પહોંચી ગયો હતો. જોકે બાતમીદારની બાતમી પરથી પોલીસે વડોદરાથી દિલ્હી નિઝામુદ્દીન પહોંચેલી ટ્રેનમાંથી તેની ધરપકડ કરી હતી.

આ પણ વાંચો : Tick Borne Virus/ ચીનમાં વધુ એક વાયરસનું સંક્રમણ, માનવ મગજને કરે છે અસર