બનાસકાંઠામાં આગામી બે દિવસ હળવાથી ભારે વરસાદની આગાહી

વડગામ,પાલનપુરમાં ભારે પવનથી વૃક્ષ ,વિજપોલ તૂટી પડ્યા
દાંતામાં ત્રણ, વડગામ ,સુઇગામમાં દોઢ, પાલનપુર-ડીસામાં 1 ઇંચ વરસાદ

પાલનપુર, બનાસકાંઠા જિલ્લામાં આગામી બે દિવસ ભારે વરસાદની આગાહી કરવામાં આવી છે. જેને પગલે વહીવટી તંત્ર એલર્ટ મોડ પર છે. જ્યારે એનડીઆરએફ ની 24 જવાનોની એક ટીમને પુર જેવી અસાધારણ પરિસ્થિતિમાં પહોંચી વળવા માટે પહેલેથી જ પાલનપુરમાં મૂકી દેવાઈ છે. જેમાં મંગળવારે રાત્રે જિલ્લામાં સાર્વત્રિક વરસાદ વરસ્યો હતો. જોકે વીજળીના કડાકા-ભડાકા સાથે વરસાદ વરસતા વાતાવરણમાં ઠંડક પ્રસરી હતી. વરસાદ સાથે ભારે પવન ફૂંકાયો હતો. જેમાં પાલનપુરની સિવિલ હોસ્પિટલમાં એક વૃક્ષ ધરશાઈ થયું હતું.જોકે કોઈ નુકસાન થયું હોવાનું જાણવા મળ્યું નથી. જ્યારે દાંતાથી અંબાજી માર્ગ ઉપર પર્વત ના પથ્થરો તૂટીને માર્ગ ઉપર પડ્યા હતા. તેમજ ડીસા તાલુકાના થેરવાડા, બાઈવાડા અને જાવલ ગામમાં રાત્રીના સમયે ગાજવીજ સાથે વરસાદનું આગમન થયું હતું.સતત કલાકો સુધી પડેલા વરસાદના કારણે અનેક ખેતરોમાં વરસાદી પાણી ભરાયા હતા. તો બીજી તરફ ભારે પવન સાથે વરસાદ પડતાં અનેક જગ્યા પર વૃક્ષો ધરશાઈ થયા હતા.જેના કારણે ક્યાંક ને ક્યાંક નુકશાન થયું હોવાનું જાણવા મળી રહ્યું છે.છેલ્લા 4 દિવસથી જિલ્લામાં પડી રહેલા વરસાદના કારણે ખેડૂતોમાં ખુશી જોવા મળી રહી છે.આ વર્ષે સારો વરસાદ થાય અને પાણીના તળ ઉંચા આવે તેવી પણ ખેડૂતો ભગવાનને પ્રાર્થના કરી રહ્યા છે.

કલેકટનો હેડકવાટર્સ ન છોડવા આદેશ
બનાસકાંઠામાં આગામી બે દિવસ હળવાથી ભારે વરસાદની આગાહી કરવામાં આવી છે.જેમાં બનાસકાંઠા જિલ્લા કલેકટર દ્વારા અધિકારીઓ અને કર્મચારીઓને પોતાનું હેડ કવાટર્સ ન છોડવા આદેશ કરાયો છે. જેમાં એનડીઆરએફની એક ટિમ પાલનપુરમાં જ્યારે ડાંગીયા મડાણાં ખાતે એસડીઆરએફની એક ટિમ એલર્ટ પર રાખવામાં આવી આવી છે તેમ સૂત્રોએ જણાવ્યું છે.

ક્યાં કેટલો વરસાદ (મિમિમાં)

   સ્થળ                                 મંગળવારે               મોસમનોકુલ
અમીરગઢ                                    10                        155
કાંકરેજ                                        13                        122
ડીસા                                           25                        154
થરાદ                                          12                         77
દાંતા                                           72                         214
દાંતીવાડા                                    16                         96
દિયોદર                                       10                         254
ધાનેરા                                         04                         45
પાલનપુર                                     24                         101
ભાભર                                         08                         94
લાખણી                                      20                          62
વડગામ                                      40                          207
વાવ                                           09                          92
સુઇગામ                                     36                          190