સ્વાતિ માલીવાલ ભાજપમાં જોડાઈ, PM મોદીના વખાણ કરતા કેજરીવાલ પર ગંભીર આરોપો લગાવ્યા
Swati Maliwal: રાજ્યસભા સાંસદ સ્વાતિ માલીવાલે અરવિંદ કેજરીવાલ પર સંસદમાં બોલવાથી રોકવાનો આરોપ લગાવ્યો. PM મોદીના નેતૃત્વની પ્રશંસા કરતા માલીવાલે કેજરીવાલને મહિલા વિરોધી અને ભ્રષ્ટાચારનું પ્રતીક ગણાવ્યા.
આમ આદમી પાર્ટીના રાજ્યસભા સાંસદ સ્વાતિ માલીવાલે આજે (શનિવારે) જાહેરાત કરી કે તેઓ ભાજપમાં જોડાઈ ગયા છે. આમ આદમી પાર્ટી (AAP) સાથેના લગભગ બે દાયકાઓનો સંબંધ તોડતા માલીવાલે PM મોદીના નેતૃત્વમાં વિશ્વાસ વ્યક્ત કર્યો અને અરવિંદ કેજરીવાલ પર એક પછી એક પ્રહારો કર્યા.
આ પહેલાં શુક્રવારે જ સાંસદ રાઘવ ચઢ્ઢા, સંદીપ પાઠક અને અશોક મિત્તલ ભાજપમાં જોડાયા હતા અને દાવો કર્યો હતો કે AAPના વધુ ચાર સાંસદો- સ્વાતિ માલીવાલ, હરભજન સિંહ, રાજેન્દ્ર ગુપ્તા અને વિક્રમજીત સાહની પણ ભાજપમાં જોડાશે.
હવે, રાઘવ ચઢ્ઢાના દાવાને સમર્થન આપતા સ્વાતિ માલીવાલે ભાજપમાં જોડાવાની પુષ્ટિ કરી છે. ભાજપમાં જોડાયા પછી, માલીવાલે કહ્યું કે તેમણે આ નિર્ણય કોઈ દબાણમાં નહીં, પરંતુ PM મોદીના નેતૃત્વમાં તેમના વિશ્વાસને કારણે લીધો છે. તેમણે લોકોને અપીલ કરી કે જે કોઈ રચનાત્મક રાજકારણ કરવા માંગે છે, તેઓ ભાજપ સાથે જોડાય.
આ દરમિયાન સ્વાતિ માલીવાલે અરવિંદ કેજરીવાલ પર ગંભીર આરોપો લગાવ્યા. તેમણે કહ્યું, “હું 2006 થી કેજરીવાલ સાથે છું, દરેક આંદોલનમાં સાથ આપ્યો, પરંતુ તેમણે મારા જ ઘરમાં એક ગુંડા દ્વારા મને માર ખવડાવ્યો. જ્યારે મેં અવાજ ઉઠાવ્યો ત્યારે મને ડરાવવામાં અને ધમકાવવામાં આવી, મારા પર FIR પાછી ખેંચવા માટે દબાણ કરવામાં આવ્યું.” કેજરીવાલને “મહિલા વિરોધી” ગણાવતા માલીવાલે કહ્યું કે તેમને છેલ્લા બે વર્ષમાં સંસદમાં બોલવાની એક પણ તક આપવામાં આવી નથી, જે ખૂબ શરમજનક વાત છે.
મોદી અને અમિત શાહના વખાણ કર્યા
સ્વાતિ માલીવાલે કહ્યું કે એક તરફ અરવિંદ કેજરીવાલ ભ્રષ્ટાચાર અને “ગુન્ડાગીરી” માટે જાણીતા છે, જ્યારે બીજી તરફ આપણી પાસે PM મોદી જેવા નેતા છે, જે વિશ્વના સૌથી લોકપ્રિય નેતા છે. તેમણે કહ્યું કે દેશના વિકાસ માટે PM મોદી અને ગૃહમંત્રી અમિત શાહે ઘણા મહત્વપૂર્ણ અને ઐતિહાસિક નિર્ણયો લીધા છે, પછી તે સુરક્ષા સંબંધિત કાર્યવાહી હોય કે સંસદમાં મહિલા આરક્ષણ બિલ રજૂ કરવાનો મુદ્દો હોય.
માલીવાલે વધુમાં જણાવ્યું કે, “હું ભાજપમાં મજબૂરીમાં નહીં, પરંતુ એટલા માટે જોડાઈ છું કારણ કે મને પીએમ મોદીના નેતૃત્વમાં વિશ્વાસ છે. હું રચનાત્મક રાજકારણ કરવા માંગતા તમામ લોકોને ભાજપમાં જોડાવાની અપીલ કરું છું.”
આ પણ વાંચો: માલદીવ જઈ રહેલા ભારતીયોને NCBની સલાહ, જો સહેજ પણ ભૂલ કરી તો થઈ શકે છે જેલ!
