T20 કેપ્ટન સૂર્યકુમાર યાદવ પિતા બન્યા, પત્ની દેવિશાએ દીકરીને આપ્યો જન્મ

Suryakumar Yadav blessed with baby girl: ભારતીય T20 ટીમના કેપ્ટન અને મુંબઈ ઈન્ડિયન્સના સ્ટાર બેટ્સમેન સૂર્યકુમાર યાદવ માટે ખુશીના સમાચાર આવ્યા છે. સૂર્યા અને તેની પત્ની દેવિશા શેટ્ટીના ઘરે નાની પરીનું આગમન થયું છે. વર્ષ 2016માં લગ્નના બંધનમાં બંધાયેલા આ કપલ માટે આ ક્ષણ ખૂબ જ યાદગાર છે.

સૂર્યાના ઘરે દીકરીનું આગમન

અહેવાલો મુજબ, ગુરુવાર 7 મેના રોજ સૂર્યકુમાર યાદવ પિતા બન્યા છે. પત્ની દેવિશાએ દીકરીને જન્મ આપ્યો છે. આ ખુશીના પ્રસંગે સૂર્યા હાલમાં પોતાના પરિવાર સાથે સમય વિતાવી રહ્યો છે. આ કારણે તે રવિવાર, 10 મેના રોજ રોયલ ચેલેન્જર્સ બેંગ્લોર (RCB) સામે રમાનારી મહત્વની આઈપીએલ મેચમાંથી બહાર રહી શકે છે. સૂર્યા હાલ ટીમ સાથે રાયપુર રવાના થયો નથી.

મેદાન પર સૂર્યાનું ખરાબ ફોર્મ

પર્સનલ લાઈફમાં ખુશીઓ હોવા છતાં, ક્રિકેટના મેદાન પર આ સીઝન સૂર્યા માટે ઘણી પડકારજનક રહી છે. આ સીઝનમાં તેણે અત્યાર સુધી 10 મેચોમાં માત્ર 195 રન બનાવ્યા છે અને તેની એવરેજ પણ 19.50ની રહી છે. દુનિયાના વિસ્ફોટક બેટ્સમેનોમાં ગણાતા સૂર્યાનું ફોર્મ મુંબઈ ઈન્ડિયન્સ માટે ચિંતાનો વિષય બન્યું છે.

મુંબઈ ઈન્ડિયન્સની મુશ્કેલીમાં વધારો

અગાઉની મેચમાં હાર્દિક પંડ્યાની ગેરહાજરીમાં સૂર્યકુમાર યાદવે ટીમની કેપ્ટનશિપ કરી હતી અને ટીમને જીત અપાવી હતી. હવે જો સૂર્યા પિતૃત્વના કારણે RCB સામેની મેચમાં નહીં રમે, તો મુંબઈ ઈન્ડિયન્સને બેટિંગ અને નેતૃત્વ બંને મોરચે મોટો ફટકો પડી શકે છે. પોઈન્ટ ટેબલમાં સંઘર્ષ કરી રહેલી મુંબઈ માટે પ્લેઓફની આશા જાળવી રાખવી હવે વધુ મુશ્કેલ બનશે.

પરિવાર કે મેદાન?

હાલમાં સૂર્યા પોતાના પરિવાર સાથે છે, પરંતુ તે RCB સામેની હાઈ-વોલ્ટેજ મેચ માટે ટીમ સાથે જોડાશે કે કેમ તે જોવું રસપ્રદ રહેશે. એક તરફ પિતા બનવાની ખુશી છે અને બીજી તરફ ફોર્મમાં વાપસી કરીને ટીમને જીતાડવાનો પડકાર. સૂર્યાના ચાહકો તેને પિતા બનવા બદલ સોશિયલ મીડિયા પર અભિનંદન પાઠવી રહ્યા છે.

આ પણ વાંચોઃ Noida Airport : ઈન્ડિગોની ફ્લાઈટ માટે બુકિંગ શરૂ, 15 જૂનના લખનૌ માટે પહેલી ફ્લાઈટ ભરશે ઉડાન

આ પણ વાંચોઃ controversy : વિવાદ વચ્ચે પલાશ મુચ્છલે ખાટુ શ્યામના કર્યા દર્શન, ઈન્સ્ટાગ્રામ પર બંધ કરી કમેન્ટ

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X