સુરેન્દ્રનગર : સીએનજી છોટા હાથીમાં વિસ્ફોટ થતાં પિતા – પુત્ર ભડથું

સુરેન્દ્રનગર જિલ્લાના સાયલાના નવાગામ નજીક સીએનજી છોટા હાથીમાં વિસ્ફોટ થતાં પિતા-પુત્ર જીવતા ભડથું થઇ ગયાની ચકચારી ઘટના બની છે. આ બનાવથી સમગ્ર પંથકમાં ખળભળાટ મચી જવા પામી છે. મૃતકો વીંછીયા તાલુકાના ચીરોડા ગામના વતની હોવાનું જાણવા મળ્યું છે. આ બંનેના મોત થતાં પરિવારજનોમાં શોકનું મોજું ફરી વળ્યું હતું.

મૃતકો વીંછીયા તાલુકાના ચીરોડા ગામના વતની

આ ઘટના અંગે મળતી માહિતી મુજબ, સુરેન્દ્રનગર જિલ્લાના સાયલા તાલુકાના નવાગામ નજીક છોટા હાથી ટેમ્પામાં સીએનજી ગેસનો બાટલો ફાટવાની ઘટના બની હતી. આ ગોઝારી ઘટનાની જાણ થતા લોકોના ટોળેટોળા ઘટનાસ્થળે એકઠા થઇ ગયા હતા. જ્યારે આ ઘટનાની જાણ થતાં સાયલા પોલીસ અને મામલતદાર સહીતનો કાફલો તાકીદે ઘટનાસ્થળે જવા રવાના થયો હતો. ગેસનો બાટલો ફાટતા વીંછીયા તાલુકાના ચીરોડા ગામના લાલજીભાઇ મોતીભાઇ ખોરાણી અને અમિતભાઇ લાલજીભાઇ ખોરાણી જીવતા બળીને ભડથું થઇ જતા કમકમાટીભર્યા મોત નિપજતા ભારે અરેરાટી વ્યાપી જવા પામી છે.