Surat DRI Drug Bust: ડીરેક્ટોરેટ ઓફ રેવન્યુ ઇન્ટેલિજન્સ (DRI) ની સુરત ટીમે રેલવે સ્ટેશન પર એક ગુપ્ત ઓપરેશન પાર પાડીને આંતરરાષ્ટ્રીય ડ્રગ્સ માર્કેટને મોટો ફટકો આપ્યો છે. દિલ્હીથી મુંબઈ જઈ રહેલી તેજસ રાજધાની એક્સપ્રેસ ટ્રેનમાંથી અંદાજે 2 કિલોગ્રામ જેટલો અત્યંત શુદ્ધ કોકેઇનનો જથ્થો જપ્ત કરવામાં આવ્યો છે. આ જપ્ત કરાયેલા નશીલા પદાર્થની આંતરરાષ્ટ્રીય બજારમાં કિંમત આશરે 10 કરોડ રૂપિયા જેટલી થાય છે. આ મામલે DRI દ્વારા ટ્રેનમાં મુસાફરી કરી રહેલા 39 વર્ષીય આરોપી ફેઝલ અહમદની સ્થળ પરથી જ ધરપકડ કરવામાં આવી છે. આરોપીને સુરતની ચીફ મેજિસ્ટ્રેટ કોર્ટમાં રજૂ કરવામાં આવતા અદાલતે તેના 1 દિવસના રિમાન્ડ મંજૂર કર્યા છે, જેને પગલે તપાસ એજન્સીઓએ આ નેટવર્કના મૂળ સુધી પહોંચવા ચક્રો ગતિમાન કર્યા છે.

ગુપ્ત ઇનપુટ્સના આધારે રેલવે સ્ટેશન પર ગોઠવાઈ વોચ

DRI ના ઉચ્ચ અધિકારીઓને અગાઉથી જ ચોક્કસ અને સચોટ ઇનપુટ્સ મળ્યા હતા કે દિલ્હીથી આર્થિક પાટનગર મુંબઈ તરફ જઈ રહેલી એક પ્રતિષ્ઠિત ટ્રેનમાં નશીલા પદાર્થોની એક મોટી ખેપ મોકલવામાં આવી રહી છે. આ ચોંકાવનારી વિગતોને પગલે DRI ની ટીમે પૂર્વ આયોજિત વહિવટી પ્લાન મુજબ વહેલી સવારથી જ સુરત રેલવે સ્ટેશનના પ્લેટફોર્મ પર વ્યુહાત્મક વોચ ગોઠવી દીધી હતી. જેવી નિર્ધારિત તેજસ રાજધાની એક્સપ્રેસ ટ્રેન સ્ટેશન પર આવીને ઉભી રહી, કે તુરંત જ સુરક્ષા અધિકારીઓની ટીમે કોચમાં પ્રવેશીને સઘન સર્ચ ઓપરેશન હાથ ધર્યું હતું.

શંકાસ્પદ મુસાફરના સામાનની તલાશી લેતા કરોડોનું ડ્રગ્સ મળ્યું

ટ્રેનની અંદર તપાસ ચલાવી રહેલા અધિકારીઓની નજર એક શંકાસ્પદ હિલચાલ અને ગભરાયેલા હાવભાવ ધરાવતા મુસાફર પર પડી હતી. તેને તુરંત જ અટકાવીને જ્યારે તેના સામાનની બારીકાઈથી તલાશી લેવામાં આવી, ત્યારે તેના બેગમાંથી કરોડોની કિંમતનો શુદ્ધ કોકેઇનનો જથ્થો મળી આવ્યો હતો. ટ્રેનમાંથી આટલી મોટી માત્રામાં ડ્રગ્સ પકડાતા જ રેલવે સ્ટેશન પરિસરમાં સનાટો વ્યાપી ગયો હતો. DRI ના સ્ટાફે કાયદાકીય જોગવાઈઓ હેઠળ ડ્રગ્સનો આ જથ્થો જપ્ત કરીને આરોપી મુસાફરને પોતાની કસ્ટડીમાં લીધો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

દિલ્હીથી મુંબઈ ડ્રગ્સ સપ્લાય કરવાનું હતું આંતરરાજ્ય પ્લાનિંગ

અધિકારીઓની પ્રાથમિક પૂછપરછમાં આરોપી ફેઝલ અહમદએ કબૂલાત કરી છે કે તે દિલ્હીથી આ કિંમતી ડ્રગ્સ માત્ર એક ‘કેરિયર’ એટલે કે માલ પહોંચાડનાર મજૂર તરીકે લઈને નીકળ્યો હતો. આ કરોડોની કિંમતનો જથ્થો તેને મુંબઈ રેલવે સ્ટેશનની આસપાસ પહોંચાડવાનો હતો અને ત્યાં કોઈ અન્ય અજ્ઞાત એજન્ટને સોંપવાનો પ્લાન હતો. હાલમાં આ ડ્રગ્સનો મુખ્ય સોર્સ કયો છે, દિલ્હીમાં આ કિંમતી ડ્રગ્સ તેને કોણે સપ્લાય કર્યું અને મુંબઈમાં આ કલેક્શન કોણ લેવાનું હતું તે તમામ દિશાઓમાં DRI ના અધિકારીઓ રિમાન્ડ દરમિયાન તેની કડક પૂછપરછ કરી રહ્યા છે.

બહુ મોટા ડ્રગ્સ સિન્ડિકેટની આશંકા વચ્ચે NDPS એક્ટ હેઠળ ગુનો દાખલ

આ કેસની ગંભીરતા અને પકડાયેલા માદક પદાર્થની કરોડોની કિંમત જોતા રેલવે પોલીસ સહિતની તમામ કેન્દ્રીય એજન્સીઓ પણ સતર્ક થઈ છે. DRI ને દ્રઢ શંકા છે કે આ કોઈ વ્યક્તિગત સ્તરનો ગુનો નથી, પરંતુ તેની પાછળ એક બહુ મોટું આંતરરાજ્ય નશીલા પદાર્થનું નેટવર્ક અથવા ઓર્ગેનાઇઝ્ડ સિન્ડિકેટ કામ કરી રહ્યું છે. પકડાયેલા આરોપી સામે ડ્રગ્સ વિરોધી કાયદા એટલે કે NDPS એક્ટ હેઠળ ગુનો નોંધીને આગળની કાર્યવાહી શરૂ કરાઈ છે. આ તપાસના તાર આગામી દિવસોમાં અન્ય રાજ્યો સુધી લંબાય અને મોટા માથાઓ બહાર આવે તેવી પૂરેપૂરી શક્યતા છે.

આ પણ વાંચો: મહેમદાવાદમાં જુગારમાં પકડાયેલા આધેડનું પોલીસ સ્ટેશનમાં મોત, પરિવારે હોસ્પિટલમાં કર્યો હોબાળો