સુરત: શિવશક્તિ ટેક્સટાઇલ માર્કેટમાં ફરી એકવાર આગ લાગવાની ઘટના સામે આવી
- મંગળવારે આગ લાગ્યા બાદ ફરી એકવાર ભીષણ આગ લાગી
- 20 જેટલા ફાયર ફાઇટર ઘટનાસ્થળે પહોંચી ગયા છે
- આગ લાગવાના કારણે કરોડો રૂપિયાનો માલસામાન બળીને ખાખ
સુરત શહેરના રિંગ રોડ વિસ્તારમાં આવેલા શિવશક્તિ ટેક્સટાઇલ માર્કેટમાં ફરી એકવાર આગ લાગવાની ઘટના સામે આવી છે. મંગળવારે આગ લાગ્યા બાદ ફરી એકવાર ભીષણ આગ લાગી છે. મંગળવારે આગ પર સંપૂર્ણ કાબૂ મેળવી લેવામાં આવ્યો હતો પરંતુ આજે ફરી અચાનક આગ ફાટી નીકળી હતી.
આગ લાગવાના કારણે કરોડો રૂપિયાનો માલસામાન બળીને ખાખ
પ્રાથમિક તબક્કે વાયરિંગમાં શોર્ટસર્કિટ અથવા ખરાબીના લીધે આગ લાગી હોઇ શકે છે. શિવશક્તિ ટેક્સટાઇલના પ્રથમ માટે આવેલી 10 જેટલી દુકાનો આગની ચપેટમાં આવી ગઇ છે. હાલમાં અવર-જવર બંધ કરી દેવામાં આવી છે. તેમજ 20 જેટલા ફાયર ફાઇટર ઘટનાસ્થળે પહોંચી ગયા છે અને આગ ઓલવવાનો પ્રયાસ કરી રહ્યા છે. આગ લાગવાના કારણે કરોડો રૂપિયાનો માલસામાન બળીને ખાખ થઇ ગયો છે. અનેક દુકાનો આગની ચપેટમાં આવી ગઇ છે. આગ એટલી ભયાનક છે કે દૂર દૂર સુધી ધુમાડાના ગોટેગોટા જોવા મળી રહ્યા છે.
આગના કારણે ભારે ધુમાડાના ગોટેગોટા જોવા મળ્યા
શિવશક્તિ ટેક્સટાઇલ માર્કેટના બેઝમેન્ટમાં આગ લાગવાની ઘટના સર્જાઇ હતી. જેના લીધે ભારે અફરાતફરીનો માહોલ સર્જાયો હતો. ચાલુ દિવસ અને પીક અવર હોવાથી માર્કેટમાં લોકોની ભારે ભીડ હતી. આગની લાગવાના સમાચાર મળતાં લોકોએ પોતાનો જીવ બચાવવા માટે દોડધામ કરી હતી. આગના કારણે ભારે ધુમાડાના ગોટેગોટા જોવા મળ્યા હતા.
