સદગુરુ જગ્ગીના ઈશા આશ્રમને ‘સુપ્રીમ’ રાહત, HCના આદેશ ઉપર મુક્યો સ્ટે, જાણો શું હતો મામલો
નવી દિલ્હી, 3 ઓક્ટોબર : સુપ્રીમ કોર્ટે ગુરુવારે આધ્યાત્મિક ગુરુ જગ્ગી વાસુદેવ (સદગુરુ)ના ઈશા ફાઉન્ડેશન વિરુદ્ધ મદ્રાસ હાઈકોર્ટ દ્વારા આપવામાં આવેલી તપાસ પર રોક લગાવી દીધી છે. આ સ્ટે ત્યારે આવ્યો જ્યારે ફાઉન્ડેશને હાઈકોર્ટના આદેશને સુપ્રીમ કોર્ટમાં પડકાર્યો હતો. મદ્રાસ હાઈકોર્ટે તેના આદેશમાં તમિલનાડુ સરકારને ફાઉન્ડેશન સામે નોંધાયેલા તમામ ફોજદારી કેસોની વિગતો આપવાનો નિર્દેશ આપ્યો હતો.
બાર એન્ડ બેન્ચના રિપોર્ટ અનુસાર સુપ્રીમ કોર્ટે કહ્યું કે, અમે હાઈકોર્ટ દ્વારા પોલીસને આપવામાં આવેલા નિર્દેશો પર સ્ટે આપીએ છીએ. સર્વોચ્ચ અદાલતનો આદેશ ત્યારે આવ્યો જ્યારે વરિષ્ઠ વકીલ મુકુલ રોહતગીએ ચીફ જસ્ટિસ ઓફ ઈન્ડિયા ડીવાય ચંદ્રચુડની અધ્યક્ષતાવાળી બેંચ સમક્ષ આ બાબતનો ઉલ્લેખ કર્યો હતો. રોહતગીએ કહ્યું, આ ધાર્મિક સ્વતંત્રતા સાથે સંબંધિત મામલો છે. તે ખૂબ જ ગંભીર અને તાકીદની બાબત છે. તે ઈશા ફાઉન્ડેશન સાથે સંબંધિત છે, જ્યાં સદગુરુ છે, જેના લાખો અનુયાયીઓ છે. હાઈકોર્ટ તેના મૌખિક આક્ષેપોના આધારે આવી તપાસ શરૂ કરી શકે નહીં.
આ મામલો નિવૃત પ્રોફેસર એસ.કામરાજ દ્વારા દાખલ કરવામાં આવેલી હેબિયસ કોર્પસ પિટિશન પર આધારિત હતો. કામરાજે આરોપ લગાવ્યો કે તેની 42 અને 39 વર્ષની બે શિક્ષિત દીકરીઓને કોઈમ્બતુરના ઈશા યોગ કેન્દ્રમાં રહેવા માટે બ્રેઈનવોશ કરવામાં આવી છે. કામરાજે કોર્ટને જણાવ્યું કે ફાઉન્ડેશનના અધિકારીઓએ તેમની દીકરીઓને તેમના પરિવાર સાથે કોઈ સંપર્ક કરવાની મંજૂરી આપી ન હતી. તેમણે એમ પણ કહ્યું હતું કે ફાઉન્ડેશન સામે ઘણા ફોજદારી કેસ અને જાતીય સતામણી અને ગેરવર્તણૂકના આરોપો પેન્ડિંગ છે.
મદ્રાસ હાઈકોર્ટે, ફાઉન્ડેશન સામે બહુવિધ ફોજદારી ફરિયાદો હોવાનું નોંધીને, આ બાબતને વધુ ચર્ચા માટે યોગ્ય ગણાવી હતી. અદાલતે એ હકીકત પર પણ ગંભીર શંકા વ્યક્ત કરી હતી કે વાસુદેવે તેની પુત્રી સાથે લગ્ન કરીને તેને સમૃદ્ધ જીવન આપ્યું છે, પરંતુ તે અન્ય મહિલાઓને સાંસારિક જીવન છોડીને સન્યાસ લેવા માટે પ્રોત્સાહિત કરી રહ્યો છે. આ શંકાના આધારે હાઈકોર્ટે ઈશા ફાઉન્ડેશન વિરુદ્ધ નિર્દેશ જારી કર્યા હતા, જે બાદ ફાઉન્ડેશને સુપ્રીમ કોર્ટનો સંપર્ક કર્યો હતો.
