સુનિતા વિલિયમ્સની વાપસી સરળ નહિ હોય, ધરતી પર પગ મુકતા જ ઘેરી લેશે આ તકલીફો
- આંતરરાષ્ટ્રીય અવકાશ મથક (ISS) પર આઠ મહિના વિતાવ્યા પછી સુનિતા અને તેમના સાથીદાર બુચ વિલ્મોર હવે પૃથ્વી પર પાછા ફરવા માટે તૈયાર છે
HD ન્યુઝ ડેસ્કઃ આખરે ઈન્તઝારની ક્ષણો ખતમ થવાની છે! જે ક્ષણની ઘણા લોકો આતુરતાથી રાહ જોઈ રહ્યા હતા તે નજીક આવી રહી છે. અવકાશયાત્રી સુનિતા વિલિયમ્સના પાછા ફરવાનું કાઉન્ટડાઉન શરૂ થઈ ગયું છે. આંતરરાષ્ટ્રીય અવકાશ મથક (ISS) પર આઠ મહિના વિતાવ્યા પછી, તે અને તેમના સાથીદાર બુચ વિલ્મોર હવે પૃથ્વી પર પાછા ફરવા માટે તૈયાર છે. પણ આ સફર એટલી સરળ નહીં હોય. સુનિતા વિલિયમ્સ માટે સૌથી મોટો પડકાર પૃથ્વીના ગુરુત્વાકર્ષણ સાથે ફરીથી તાલમેલ બેસાડવાનો હશે. લાંબા સમય સુધી વજનહીન વાતાવરણમાં રહ્યા પછી, શરીર પર ગુરુત્વાકર્ષણની અસર એક આંચકા સમાન હશે.
ધરતી પર પગ મૂકતાની સાથે જ મુશ્કેલીઓ ઘેરી લેશે
બુચ વિલ્મોરે પોતે આ વિશે કહ્યું હતું કે ગુરુત્વાકર્ષણ ખૂબ જ કઠિન હોય છે. જ્યારે અમે પરત ફરીએ છીએ, ત્યારે તે અમને નીચે ખેંચવાનું શરૂ કરે છે. શરીરનું પ્રવાહી ઘટવા લાગે છે અને પેન્સિલ ઉપાડવી પણ અમને મુશ્કેલ કાર્ય જેવું લાગે છે. સુનિતા વિલિયમ્સ પણ આ પડકારથી સંપૂર્ણપણે વાકેફ છે. તેમણે કહ્યું કે જમીન પર પાછા ફરવું સરળ નહીં હોય. તે એક દૈનિક પ્રક્રિયા હશે, કેમકે અમે અમારા હાઇ-સ્પીડ સ્નાયુઓને ફરીથી સક્રિય કરીશું.
સુનિતા વિલિયમ્સને મુશ્કેલીઓનો સામનો કેમ કરવો પડશે?
લાંબા સમય સુધી ISS પર રહેતા અવકાશયાત્રીઓને અનેક શારીરિક સમસ્યાઓનો સામનો કરવો પડે છે. તેમાં સ્નાયુઓની નબળાઈ, હાડકાની ઘનતામાં ઘટાડો અને શરીરના પ્રવાહીનું અસંતુલન શામેલ છે. અહેવાલો અનુસાર અવકાશમાં અવકાશયાત્રીના હાડકાની ઘનતા દર મહિને 1% ઘટે છે, કારણ કે ગુરુત્વાકર્ષણ વિના હાડકાં પર કોઈ વજન હોતું નથી.
સુનિતા વિલિયમ્સના પાછા ફર્યા પછી તેમની દિનચર્યા શું હશે?
પાછા ફર્યા પછી, સુનિતા વિલિયમ્સને પૃથ્વી પરની પરિસ્થિતિઓમાં ફરીથી અનુકૂલન સાધવા માટે સખત રિહેબિલિટેશન કાર્યક્રમમાંથી પસાર થવું પડશે. અવકાશમાં રહેવાથી શરીરના પ્રવાહી ચહેરા પર આવી જાય છે, જેના કારણે ચહેરા પર સોજો આવે છે અને હાથ અને પગ પાતળા દેખાય છે, પરંતુ પૃથ્વી પર પાછા ફરતાની સાથે જ આ સંતુલન બદલાઈ જશે, જેનાથી થોડી અસહજતા અનુભવાશે.
પડકારો છતાં વિલિયમ્સ અને વિલ્મોર બંને તેમના પુનરાગમન માટે ઉત્સાહિત છે. તેઓ પહેલા પણ આવા મિશન પૂર્ણ કરી ચૂક્યા છે અને તેમને આશા છે કે આ વખતે પણ તેમનું શરીર ટૂંક સમયમાં પૃથ્વીની પરિસ્થિતિઓથી અનુકૂળ થઈ જશે. વિલ્મોરે મજાકિયા અંદાજમાં કહ્યું કે, અવકાશમાં તરતા રહેવાની ખૂબ મજા આવે છે, મને મારા વાળ ઉડવાનું ખરેખર ગમે છે. સુનિતા વિલિયમ્સ અને બુચ વિલ્મોર 19 માર્ચે સ્પેસએક્સના ડ્રેગન અવકાશયાનમાં બેસીને અવકાશ મથકથી પૃથ્વી માટે રવાના થશે. હવે થોડા જ દિવસોમાં આ ઐતિહાસિક મિશન પૂરું થવાનું છે અને સુનિતા ફરી એકવાર પૃથ્વી પર પગ મૂકવા માટે તૈયાર છે.
આ પણ વાંચોઃ અમેરિકા વિઝા ધરાવતા લોકોને પડશે મુશકેલી: સરકારે વિઝા રિન્યૂ કરવાના નિયમોમાં કર્યો મોટો બદલાવ
