દિલ્હી પોલીસે મહાથુગ સુકેશ ચંદ્રશેખરને સંડોવતા કથિત ખંડણી અને મની લોન્ડરિંગ કેસમાં પૂછપરછ માટે બોલીવૂડ અભિનેત્રી જેકલીન ફર્નાન્ડીઝને સોમવાર, 19 સપ્ટેમ્બરના રોજ સવારે 11 વાગ્યે ફરી એકવાર આર્થિક ગુના વિંગ (EOW) સમક્ષ હાજર થવા માટે સમન્સ પાઠવ્યું છે.
શ્રીલંકાની નાગરિક જેકલીન પણ આ સંબંધમાં બુધવારે EOW સમક્ષ હાજર થઈ હતી. એક વરિષ્ઠ પોલીસ અધિકારીએ જણાવ્યું કે પિંકી ઈરાની જેકલીન સાથે હતી. ઈરાનીએ જ કથિત રીતે જેકલીનનો સુકેશ ચંદ્રશેખર સાથે પરિચય કરાવ્યો હતો.અગાઉ, તેમને સોમવારે તપાસમાં જોડાવા માટે કહેવામાં આવ્યું હતું, પરંતુ તેણે પહેલાથી જ નિશ્ચિત સમયપત્રકને ટાંકીને વધુ તારીખ માટે વિનંતી કરી હતી.
આ મહિનાની શરૂઆતમાં, અન્ય એક બોલીવુડ અભિનેત્રી નોરા ફતેહીની એન્ફોર્સમેન્ટ ડિરેક્ટોરેટ (ED) દ્વારા કેસમાં છ-સાત કલાક સુધી પૂછપરછ કરવામાં આવી હતી અને તેનું નિવેદન નોંધવામાં આવ્યું હતું. નોરાની અગાઉ પણ પૂછપરછ કરવામાં આવી હતી.સુકેશ ચંદ્રશેખર હાલ તિહાર જેલમાં બંધ છે. તેના પર પ્રભાવશાળી લોકો સહિત અનેક લોકોને છેતરવાનો આરોપ છે. તેમાં ફોર્ટિસ હેલ્થકેરના ભૂતપૂર્વ પ્રમોટર શિવિન્દર મોહન સિંહની પત્ની અદિતિ સિંહનો પણ સમાવેશ થાય છે.
EDએ 17 ઓગસ્ટે દાખલ કરેલી તેની ચાર્જશીટમાં ચંદ્રશેખરને સંડોવતા કરોડો રૂપિયાના મની લોન્ડરિંગ કેસમાં આરોપી તરીકે જેકલીન ફર્નાન્ડીઝનું નામ આપ્યું હતું. ED અનુસાર, નોરા ફતેહી અને ફર્નાન્ડિસે સુકેશ ચંદ્રશેખર પાસેથી મોંઘી કાર અને અન્ય ગિફ્ટ્સ લીધી હતી.
આ પણ વાંચો : મોહાલી યુનિ.ની વિદ્યાર્થીનીઓના વીડિયો વાયરલ કરનાર શખ્સ શિમલાથી ઝડપાયો
