શેરબજાર : દિવસભર ઉતાર-ચડાવના અંતે સેન્સેકસમાં 808 પોઈન્ટનું ગાબડું

મુંબઈ, 4 ઓક્ટોબર : ભારતીય શેરબજાર આજે સતત પાંચમા કારોબારી સત્રમાં ઘટાડા સાથે બંધ થયું હતું. ગઈ કાલે એટલે કે 3 ઑક્ટોબર 2024ના રોજ 4 મહિનાના મોટા ઘટાડા પછી, શેરબજાર આજે (4 ઑક્ટોબર 2024) લાલ નિશાનમાં બંધ થયું. આજે સવારે ટ્રેડિંગ સેશન શરૂ થયું ત્યારે બીએસઈ સેન્સેક્સ 353 પોઈન્ટ ઘટીને ખુલ્યો હતો.  નિફ્ટીમાં પણ ઘટાડો નોંધાયો હતો. ટ્રેડિંગ સેશનના બંધ સમયે બંને સૂચકાંકો ખરાબ રીતે તૂટ્યા હતા. BSE સેન્સેક્સ આજે 808.65 (0.98 ટકા) ઘટીને 81688.45 પોઈન્ટની સપાટીએ બંધ રહ્યો હતો. જ્યારે નિફ્ટી 50 200.25 (0.79 ટકા) ઘટીને 25049.85 પોઈન્ટ પર આવી ગયો હતો.

પહેલા તૂટ્યું, પછી ઊંચકાયું અને ફરી પછી તૂટ્યું

પાછલા ટ્રેડિંગ દિવસે મોટા ઘટાડાને જોયા પછી, શુક્રવારે શેર બજારની શરૂઆત સુસ્ત નોંધ પર થઈ. તેના અગાઉના 82,497.10 ના બંધની સરખામણીએ, BSE સેન્સેક્સ 200 થી વધુ પોઈન્ટ ઘટીને 82,244.25 પર ખુલ્યો અને થોડીવારમાં તે 389.58 પોઈન્ટ ઘટીને 82,107.06 પર આવી ગયો હતો. પરંતુ તેના પછી બપોરે 12 વાગ્યાની આસપાસ આ ઘટાડો ઉછાળામાં ફેરવાઈ ગયો અને 30 શેરનો સેન્સેક્સ જોરદાર કૂદકો મારીને 83,368ના સ્તરે પહોંચ્યો, પરંતુ દિવસના આ ઊંચા સ્તરે પહોંચ્યા બાદ અચાનક જ બજારનો ટ્રેન્ડ ફરી બદલાઈ ગયો હતો.

છેલ્લા એક કલાકમાં સેન્સેક્સમાં 900 પોઈન્ટનો ઘટાડો થયો

શેરબજારમાં છેલ્લા કામકાજના કલાકોમાં સેન્સેક્સ એટલો ગબડ્યો હતો કે અટકવાના કોઈ સંકેત દેખાતા નથી. બપોરે 2.40 વાગ્યે સેન્સેક્સ 913.64 પોઈન્ટ્સ અથવા 1.11 ટકાના જંગી ઘટાડા સાથે 81,583 ના સ્તરે આવ્યો હતો.  જોકે, બજાર બંધ થયું ત્યાં સુધીમાં આ ઘટાડો થોડો ઓછો થયો અને સેન્સેક્સ 808.65 પોઈન્ટના ઘટાડા સાથે 81,688.45 પર બંધ થયો.

બીજી તરફ, NSE નિફ્ટીએ પણ નબળી શરૂઆત કરી હતી અને તેના અગાઉના 25,250.10ના બંધની સરખામણીમાં ઘટીને 25,281.90 પર ટ્રેડ કરવાનું શરૂ કર્યું હતું. છેલ્લા ટ્રેડિંગ કલાકમાં આ ઇન્ડેક્સ પણ ખરાબ રીતે ગબડ્યો હતો અને સમાચાર લખાય છે ત્યાં સુધી નિફ્ટી 260.25 પોઇન્ટ ઘટીને 24,990ના સ્તરે આવી ગયો હતો. જ્યારે બજાર બંધ થયું ત્યારે નિફ્ટી 235.50 પોઈન્ટ લપસીને 25,014.60ના સ્તરે બંધ થયો હતો.

ગુરુવારે બજારમાં ભૂકંપ આવ્યો હતો  

છેલ્લા ટ્રેડિંગ દિવસે ગુરુવારે શેરબજારમાં મોટો ઘટાડો જોવા મળ્યો હતો. ઈરાન અને ઈઝરાયેલ વચ્ચેના યુદ્ધના સંજોગો વચ્ચે મધ્ય પૂર્વમાં તણાવની અસર સ્પષ્ટ દેખાઈ રહી હતી. બીએસઈ સેન્સેક્સે 995 પોઈન્ટના ઘટાડા સાથે 83,270 ના સ્તરે ટ્રેડિંગ શરૂ કર્યું અને બજાર બંધ થયું ત્યાં સુધી તે નીચે જ રહ્યો. અંતે, સેન્સેક્સ 1769.19 પોઈન્ટ અથવા 2.10 ટકાના ઘટાડા સાથે 82,497.10 ના સ્તર પર બંધ થયો. સેન્સેક્સમાં આવા ઘટાડાની અસર BSEના માર્કેટ કેપ પર પણ જોવા મળી હતી અને તેમાં રૂ. 10 લાખ કરોડથી વધુનો ઘટાડો થયો હતો.