ઇન્ટરનેશનલ ડેસ્કઃ આર્થિક સંકટનો સામનો કરી રહેલા શ્રીલંકામાં રાષ્ટ્રપતિની ચૂંટણી યોજાવા જઈ રહી છે, મુખ્ય હરીફાઈ વડાપ્રધાનમાંથી કાર્યકારી રાષ્ટ્રપતિ બનેલા રાનિલ વિક્રમસિંઘે અને ચાર્જ સંભાળનાર સાંસદ ડલ્લાસ અલ્લાપ્પેરુમા વચ્ચે છે. આજે યોજાનારી ચૂંટણી બાદ શ્રીલંકાને નવા રાષ્ટ્રપતિ મળશે અને નવી સરકારની આશા રહેશે, જે આર્થિક સંકટનો સામનો કરી રહેલા લોકોની તકલીફનો અંત લાવી શકે.
ઉલ્લેખનીય છે કે, રાષ્ટ્રપતિની ચૂંટણી પહેલાં જ વિપક્ષના નેતા અને રાષ્ટ્રપતિ પદની રેસમાં સૌથી આગળ રહેલા સજીથ પ્રેમદાસાએ ઉમેદવારી પાછી ખેંચી લીધી હતી અને શાસક SLPP સાંસદ ડલ્લાસની ઉમેદવારીની જાહેરાત કરી હતી.
ડલ્લાસ અને વિક્રમસિંઘે વચ્ચે જોરદાર સ્પર્ધા
જ્યાં સુધી સજીથ પ્રેમદાસા પ્રમુખપદની રેસમાં રહ્યા ત્યાં સુધી રાનિલ વિક્રમસિંઘેની જીત લગભગ નિશ્ચિત હતી, પરંતુ હવે સમીકરણો બદલાઈ ગયા છે. કારણ કે હવે રાજપક્ષે પરિવારનો પક્ષ જે અત્યારે પણ સત્તાધારી પક્ષ છે, એટલે કે ખુદ SLPPના સાંસદ ડલ્લાસ અલાહપેરુમાએ રાનિલ વિક્રમસિંઘેને પડકાર ફેંક્યો છે.
ડલ્લાસના નામાંકન પહેલાં એવું માનવામાં આવતું હતું કે, લગભગ તમામ SLPP સાંસદો રાનિલ વિક્રમસિંઘેને સમર્થન આપશે. કારણ કે તે રાજપક્ષે પરિવારની નજીક છે. ડલ્લાસ અલાહાપેરુમા ગોટાબાયા રાજપક્ષે અને રાનિલ વિક્રમસિંઘેના મંત્રીમંડળમાં કેબિનેટ મંત્રી હતા. હવે બદલાતા સમીકરણ વચ્ચે ડલ્લાસ અલાહાપેરુમાએ રાનિલ વિક્રમસિંઘેની ઉમેદવારીને પડકારી છે. હવે રાનિલ વિક્રમસિંઘે માટે મોટી મુશ્કેલી ઊભી થઈ શકે છે.
પ્રેમદાસાએ પીએમ મોદીને કરી અપીલ
આ બધાની વચ્ચે વિપક્ષના નેતા સજીથ પ્રેમદાસાએ પણ ભારતના વડાપ્રધાન નરેન્દ્ર મોદીને અપીલ કરી છે કે, દેશના નવા રાષ્ટ્રપતિ ભલે બને પરંતુ ભારત જે રીતે શ્રીલંકાની આ મુશ્કેલીમાં સતત મદદ કરી રહ્યું છે તે તેઓએ ચાલુ રાખવું જોઈએ. નોંધનીય છે કે જ્યારથી શ્રીલંકામાં આર્થિક સંકટની સ્થિતિ ઉભી થઈ છે, ત્યારથી ભારત એકમાત્ર એવો દેશ છે જે શ્રીલંકાને સતત મદદ કરી રહ્યો છે અને આ વાત સામાન્ય જનતાથી લઈને શ્રીલંકાની રાજનીતિ સુધી દરેક લોકો સમજી રહ્યા છે.
