શ્રીલંકા પણ પાકિસ્તાનના રવાડે ચડ્યું, નવ ભારતીય માછીમારોને પકડ્યા

કોયમ્બતૂર, 23 જુલાઈ : શ્રીલંકન નૌકાદળે તામિલનાડુના દરિયાકાંઠેથી બે પાવરબોટ સાથે રામેશ્વરમના નવ ભારતીય માછીમારોને પકડી લીધા છે. તેમણે દાવો કર્યો હતો કે માછીમારો ભારતીય સરહદ પાર માછીમારી કરી રહ્યા હતા. માછીમારો મન્નારની ખાડીમાં માછીમારી કરવા ગયા હતા. આવું પહેલીવાર નથી બન્યું. આ પહેલા પણ શ્રીલંકન નેવી રામેશ્વરમમાંથી ભારતીય માછીમારોને પકડી ચુકી છે.

આ મહિને શ્રીલંકન નેવીએ પમ્બનમાંથી 26 ભારતીયોને પકડ્યા હતા

આ મહિને 1 જુલાઈના રોજ, રામેશ્વરમ ટાપુ વિસ્તાર નજીકના પાલ્ક બે સમુદ્ર વિસ્તારમાં પમ્બનમાં માછીમારી કરવા ગયેલા 26 ભારતીય માછીમારોને શ્રીલંકન નૌકાદળ દ્વારા પકડી લેવામાં આવ્યા હતા. તેમની સાથે ચાર દેશી બોટ પણ જપ્ત કરવામાં આવી હતી. ગયા મહિને જ શ્રીલંકાની નૌકાદળે તેની જળસીમામાં ગેરકાયદે માછીમારીના આરોપમાં 18 ભારતીય માછીમારોની ધરપકડ કરી હતી. તેમની સાથે ત્રણ ફિશિંગ બોટ પણ જપ્ત કરવામાં આવી હતી. આ પહેલા પણ શ્રીલંકન નેવીએ ચાર ભારતીય માછીમારોની ધરપકડ કરી હતી અને તેમની બોટ જપ્ત કરી હતી. આ વર્ષે જાન્યુઆરીમાં શ્રીલંકન નેવીએ 12 ભારતીય માછીમારોની ધરપકડ કરી હતી. માછીમારો પર શ્રીલંકાના જળસીમામાં માછીમારી કરવાનો આરોપ હતો.

આ પણ વાંચો : ગુજરાતમાં અત્યાર સુધી 44 ટકા વરસાદ વરસ્યો, 31 જળાશયો હાઈએલર્ટ પર

આ વર્ષે શ્રીલંકાએ અત્યાર સુધીમાં 180થી વધુ માછીમારોની કરી ધરપકડ

તમને જણાવી દઈએ કે આ વર્ષે શ્રીલંકાએ અત્યાર સુધીમાં 180થી વધુ લોકોની ધરપકડ કરી છે. ગયા વર્ષે 240 થી 245 લોકોની ધરપકડ કરવામાં આવી હતી ભારત અને શ્રીલંકા વચ્ચેના સંબંધોમાં માછીમારોનો મુદ્દો વિવાદાસ્પદ છે. આવી મોટાભાગની ઘટનાઓ પાલ્ક સ્ટ્રેટમાં બને છે. તે તમિલનાડુ અને ઉત્તર શ્રીલંકા વચ્ચેની પટ્ટી છે. તે માછલીઓ માટે સમૃદ્ધ વિસ્તાર માનવામાં આવે છે.

અત્યાર સુધીમાં કેટલી વખત કાર્યવાહી કરવામાં આવી?

શ્રીલંકાના નૌકાદળ દ્વારા એક નિવેદનમાં પુષ્ટિ કરવામાં આવી હતી કે નેવીએ 2024માં ટાપુ રાષ્ટ્રના જળસીમામાં કથિત રીતે માછીમારી કરવા બદલ 23 ભારતીય બોટ અને 178 ભારતીય માછીમારોની ધરપકડ કરી હતી. આ પછી તેમને કાયદાકીય કાર્યવાહી માટે અધિકારીઓને સોંપવામાં આવ્યા છે. ઉલ્લેખનીય છે કે 3 એપ્રિલે, શ્રીલંકાની નૌકાદળ દ્વારા અટકાયતમાં લેવાયેલા 19 ભારતીય માછીમારોને મુક્ત કરીને ભારત પરત મોકલવામાં આવ્યા હતા. ગયા વર્ષે, દ્વીપ રાષ્ટ્રની નૌકાદળે શ્રીલંકાના જળસીમામાં કથિત રીતે ઘૂસણખોરી કરવા બદલ 35 બોટ સાથે 240 ભારતીય માછીમારોની ધરપકડ કરી હતી. તમને જણાવી દઈએ કે પાલ્ક સ્ટ્રેટ એ તમિલનાડુને શ્રીલંકાથી અલગ કરતો વિસ્તાર છે. બંને દેશોના માછીમારો અહીં માછલી પકડવા આવે છે અને અજાણતા અતિક્રમણ માટે ધરપકડ કરવામાં આવે છે.

આ પણ વાંચો : શું તમે જાણો છો ગુજરાતમાં કુલ કેટલા વૃક્ષો છે? 2003 બાદ 2021માં કેટલો વધારો થયો?