સોરી, ભૂલથી તમારા છૂટાછેડા થઈ ગયા! 21 વર્ષ જૂના લગ્ન 21 મિનિટમાં તૂટી ગયા

• ભૂલથી છૂટાછેડા થઈ જતાં દંપતી થઈ ગયું નારાજ, ન્યાયાધીશે નિર્ણય બદલવાની ના પાડી

HD ન્યૂઝ ડેસ્ક, 16 એપ્રિલ: લંડનથી અજીબો-ગરીબ કિસ્સો બહાર આવ્યો છે કે જેનાથી કોઈને પણ આશ્ચર્ય થઈ જશે. અહીં વકીલની ભૂલને કારણે કોર્ટે દંપતીને છૂટાછેડા આપી દીધા. એટલું જ નહીં, ન્યાયાધીશે પણ નિર્ણય પાછો ખેંચવાની ના પાડી દીધી. ભૂલથી છૂટાછેડા થઈ જતાં દંપતી ખૂબ જ નારાજ થઈ ગયું હતું. દેશ અને દુનિયામાં વિવાહિત યુગલો માટે છૂટાછેડાની પ્રક્રિયા અલગ છે. ઘણા એવા દેશ છે જ્યાં છૂટાછેડા સરળતાથી મળી જાય છે, જ્યારે ભારત સહિત ઘણા એવા દેશો છે જ્યાં છૂટાછેડા લેવા માટે વર્ષો લાગી જાય છે. પરંતુ હાલમાં જ લંડનથી એક એવો કિસ્સો પ્રકાશમાં આવ્યો છે જેમાં ત્યાંની કોર્ટે ભૂલથી દંપતીને છૂટાછેડા આપી દીધા. સાંભળવામાં જ વિચિત્ર લાગે કે કેવી રીતે કોઈ વ્યક્તિ ભૂલથી છૂટાછેડા લઈ શકે? જાણો સમગ્ર મામલા વિશે.

ન્યાયાધીશે નિર્ણય પાછો ખેંચવાનો કરી દીધો ઇનકાર!

હકીકતમાં આ બધું આયેશા વરદાગની લંડન સ્થિત બેસ્ટ લો ફર્મ Vardagsના સોલિસિટરની ભૂલને કારણે થયું હતું. જેનું પરિણામ એ આવ્યું કે, ન્યાયાધીશે નિર્ણય પાછો ખેંચવાની ના પાડી દીધી.

મિસ્ટર એન્ડ મિસિસ વિલિયમ્સ નામના આ કપલને 2023માં લગ્ન કર્યાને 21 વર્ષ થયા હતા પરંતુ કોર્ટે હવે તેમને છૂટાછેડા આપી દીધા છે. જો કે દંપતીને છૂટાછેડા તો લેવાના જ હતા, તેમ છતાં દંપતી તેમના સેપરેશન (અલગ થવા) માટે નાણાકીય કરાર ગોઠવવાની પ્રક્રિયામાં હતા. આ દરમિયાન, અન્ય યુગલના છૂટાછેડાના અંતિમ હુકમ દરમિયાન, વરદાગના કારકુને કોમ્પ્યુટર પરના ડ્રોપ ડાઉન મેનૂમાંથી શ્રી અને શ્રીમતી વિલિયમ્સના નામ પસંદ કર્યા.

21 વર્ષ જૂના લગ્ન 21 મિનિટમાં તૂટી ગયા!

આવી સ્થિતિમાં બંનેએ 21 મિનિટમાં છૂટાછેડા લઈ લીધા હતા. જ્યારે ન્યાયાધીશને આ ભૂલ વિશે જાણ કરવામાં આવી ત્યારે તેમણે નિર્ણય બદલવાનો ઇનકાર કર્યો અને કહ્યું કે, કોર્ટના નિર્ણયમાં જનતાનો વિશ્વાસ વધુ મહત્ત્વપૂર્ણ છે.

કોર્ટના ફેમિલી ડિવિઝનના અધ્યક્ષ સર એન્ડ્રુ મેકફર્લેને જણાવ્યું કે, છૂટાછેડાના અંતિમ આદેશ દ્વારા પૂરી પાડવામાં આવેલી નિશ્ચિતતા અને અંતિમતાને આદર આપવા અને તેના દ્વારા સ્થાપિત યથાસ્થિતિ જાળવવામાં મજબૂત જાહેર નીતિનું હિત છે.

આવી ભૂલ કેવી રીતે થઈ શકે? : ન્યાયાધીશ 

બીજી તરફ, વરદાગના પ્રતિનિધિએ જણાવ્યું હતું કે, પેઢીના વકીલે દંપતી માટે અંતિમ છૂટાછેડા માટે અરજી કરતી વખતે ઑનલાઇન પોર્ટલ પર ભૂલ કરી હતી અને દંપતી છૂટાછેડા માટે તૈયાર નહોતું.

વરદાગને બે દિવસ પછી પોતાની ભૂલનો અહેસાસ થયો, પરંતુ જ્યારે તેમણે હાઈકોર્ટને છૂટાછેડાના અંતિમ આદેશને રદ કરવા કહ્યું ત્યારે તેને નકારી કાઢવામાં આવ્યો. પેઢીએ ભારપૂર્વક કહ્યું કે, તેના કર્મચારીએ ભૂલથી ખોટા દંપતીના નામ પર ક્લિક કર્યું હતું, પરંતુ ન્યાયાધીશે કહ્યું કે, જ્યારે અંતિમ ઓર્ડર આપવા માટે પોર્ટલ પર બહુવિધ સ્ક્રીનમાંથી પસાર થવું પડે ત્યારે આવી ભૂલ કેવી રીતે થઈ શકે?

આયેશા વરદાગે કોર્ટના નિર્ણયને ખરાબ ગણાવ્યો હતો

આયેશા વરદાગે કોર્ટના નિર્ણયને ખરાબ ગણાવ્યો હતો. વરદાગે કહ્યું કે, ‘રાજ્યએ કોમ્પ્યુટર સંબંધિત ભૂલોના આધારે લોકોને છૂટાછેડા ન આપવા જોઈએ. જ્યારે કોઈ ભૂલ કોર્ટના ધ્યાન પર લાવવામાં આવે ત્યારે કોર્ટે સમજવું જોઈએ તેમ હતું. જેનો અર્થ એ થયો કે, અત્યારે આપણો કાયદો એમ કહે છે કે, ઓનલાઈન સિસ્ટમમાં થયેલી ભૂલને કારણે તમે છૂટાછેડા લઈ શકો છો, આ યોગ્ય નથી અને આ ન્યાય નથી.

આ પણ જુઓ: CBIએ શા માટે મનીષ સિસોદિયાને દારૂ કૌભાંડ કેસનો માસ્ટરમાઇન્ડ હોવાનું કહ્યું? જાણો