સોનમ વાંગચુક ઉપવાસ સમાપ્ત કરવા તૈયાર, સરકાર સમક્ષ મૂકી 2 શરતો; મંત્રીઓને લખ્યો ભાવુક પત્ર
CJP Protest: પર્યાવરણ કાર્યકર અને શિક્ષણવિદ્ સોનમ વાંગચુકે પોતાના અનિશ્ચિત ઉપવાસને સમાપ્ત કરવાની તૈયારી દર્શાવી છે, પરંતુ તે માટે તેમણે કેન્દ્ર સરકાર સમક્ષ બે મહત્ત્વપૂર્ણ શરતો મૂકી છે. દિલ્હીની મેદાંતા હોસ્પિટલમાં સારવાર દરમિયાન હોસ્પિટલના બેડ પરથી લખાયેલા પત્રમાં તેમણે કેન્દ્ર સરકારને સ્પષ્ટ કર્યું છે કે જો તેમની શરતો અંગે લેખિત ખાતરી આપવામાં આવશે તો જ તેઓ ઉપવાસ સમાપ્ત કરશે.
સોનમ વાંગચુકે કેન્દ્રીય મંત્રી જે.પી. નડ્ડા અને ડૉ. જિતેન્દ્ર સિંહને લખેલા પત્રમાં હોસ્પિટલમાં મુલાકાત લેવા અને અનશન સમાપ્ત કરવાની અપીલ કરવા બદલ તેમનો આભાર વ્યક્ત કર્યો છે. તેમણે યાદ અપાવ્યું કે બંને મંત્રીઓએ તેમની માંગણીઓ પર સકારાત્મક વિચાર કરવાની ખાતરી આપી હતી.
AN APPEAL TO THE GOVERNMENT
regarding breaking my fast…
Once the assurance from govt come I will also appeal to the peacefully protesting students to halt the movement for now and enter into dialogue with the government pic.twitter.com/gR6S8woF5R— Sonam Wangchuk (@Wangchuk66) July 22, 2026
‘ચાલો સંસદ’ માર્ચનો કર્યો ઉલ્લેખ
પત્રમાં સોનમ વાંગચુકે 20 જુલાઈએ યોજાયેલા ‘ચાલો સંસદ’ માર્ચનો ઉલ્લેખ કરતાં કહ્યું કે પોલીસ દ્વારા બળપ્રયોગ અને કાર્યવાહી છતાં સમગ્ર વિરોધ પ્રદર્શન સંપૂર્ણપણે શાંતિપૂર્ણ રહ્યું હતું. તેમણે જણાવ્યું કે દેશ અને દુનિયાએ લોકશાહી માધ્યમથી પોતાના હક માટે અવાજ ઉઠાવતા યુવાનોની શાંતિ અને ધીરજ જોઈ છે.
પ્રથમ શરત: યુવાનો સામે કોઈ કાર્યવાહી નહીં
સોનમ વાંગચુકે જણાવ્યું કે વિવિધ રાજકીય પક્ષોના લગભગ 65 સાંસદોએ તેમને પત્ર લખીને અથવા વ્યક્તિગત મુલાકાત લઈને ઉપવાસ સમાપ્ત કરવાની અપીલ કરી છે. તેમણે કહ્યું કે તેઓ જીવવા માંગે છે અને ફરી પોતાના વિદ્યાર્થીઓ, શિક્ષણ અને દેશસેવાના કાર્યમાં જોડાવા માંગે છે, પરંતુ તેમણે સ્પષ્ટ કર્યું કે જે યુવાનો માટે આ આંદોલન શરૂ થયું હતું, તેમના ભોગે તેઓ પોતાનો ઉપવાસ સમાપ્ત કરી શકે નહીં.
તેમણે સરકાર સમક્ષ પ્રથમ શરત તરીકે માંગણી કરી છે કે આંદોલનમાં ભાગ લેનાર કોઈપણ વિદ્યાર્થી કે યુવા પ્રદર્શનકારી સામે કોઈ કાનૂની, દંડાત્મક અથવા બદલો લેવાની કાર્યવાહી કરવામાં નહીં આવે. સરકાર આ અંગે લેખિત ખાતરી આપે તેવી તેમની માંગ છે.
બીજી શરત: માંગણીઓ પર સકારાત્મક કાર્યવાહી
વાંગચુકે પત્રમાં સરકારને યાદ અપાવ્યું કે તેમની રજૂ કરાયેલી મુખ્ય માંગણીઓ પર સકારાત્મક નિર્ણય લેવાનો વિશ્વાસ અપાયો હતો. તેમણે સરકાર પાસે આ મુદ્દાઓ પર સ્પષ્ટ અને વિશ્વસનીય કાર્યવાહી કરવાની અપેક્ષા વ્યક્ત કરી છે.
લેખિત ખાતરી નહીં મળે તો ઉપવાસ ચાલુ રહેશે
પત્રના અંતમાં સોનમ વાંગચુકે સ્પષ્ટ શબ્દોમાં જણાવ્યું છે કે જો સરકાર લેખિતમાં ખાતરી આપશે કે યુવાનોને કોઈ પણ પ્રકારની હેરાનગતિ અથવા કાર્યવાહીનો સામનો કરવો નહીં પડે, તો તેઓ વિશ્વાસ સાથે પોતાનો અનિશ્ચિત ઉપવાસ સમાપ્ત કરશે. જો સરકાર તરફથી આવી ખાતરી નહીં મળે, તો તેઓ પોતાનો અનિશ્ચિત ઉપવાસ યથાવત રાખવા માટે મજબૂર બનશે.
તેમણે પોતાના પત્રના અંતમાં લખ્યું કે લોકશાહીનું ભવિષ્ય એ વાત પર આધાર રાખે છે કે સરકાર પોતાના યુવાનો સાથે કેવી રીતે વર્તે છે, ખાસ કરીને જ્યારે તેઓ હિંમત, આશા અને વિશ્વાસ સાથે પોતાના અધિકારો માટે અવાજ ઉઠાવે છે.
