સિદ્ધુ મૂસેવાલા મર્ડર કેસઃ પંજાબ પોલીસે ગોલ્ડી બ્રાર વિરુદ્ધ રેડ કોર્નર નોટિસની કરી માગ

પંજાબ પોલીસે સિંગર સિદ્ધુ મૂસેવાલાની હત્યાની જવાબદારી લેનાર કેનેડા સ્થિત ગેંગસ્ટર ગોલ્ડી બ્રાર સામે રેડ કોર્નર નોટિસની માંગ કરી છે. પોલીસ સૂત્રોના જણાવ્યા અનુસાર બ્રાર જેલમાં બંધ ગેંગસ્ટર લોરેન્સ બિશ્નોઈની ગેંગનો સક્રિય સભ્ય છે. સાથે જ લોરેન્સ બિશ્નોઈની પણ પૂછપરછ કરવામાં આવી રહી છે. પંજાબ પોલીસે કહ્યું છે કે CBIને 19 મે 2022ના રોજ ગોલ્ડી બ્રારની રેડ કોર્નર નોટિસ જારી કરવા માટે પત્ર મોકલવામાં આવ્યો હતો, કારણ કે ગોલ્ડી બ્રારનું નામ ફરીદકોટમાં હત્યાના પ્રયાસ અને આર્મ્સ એક્ટના કેસમાં સામે આવ્યું હતું.

શું છે રેડ કોર્નર નોટિસ?
રેડ કોર્નર નોટિસ એ ફોજદારી કેસમાં દોષિત વ્યક્તિને શોધવા અને કામચલાઉ ધરપકડ કરવાની વિનંતી છે. જો કે, રેડ કોર્નર નોટિસ જારી કરવાનો અર્થ એ નથી કે વ્યક્તિ દોષિત છે. રેડ કોર્નર નોટિસ જારી કરવાનો મુખ્ય હેતુ અન્ય દેશોની પોલીસને એલર્ટ કરવાનો અને જાણ કરવાનો છે જેથી શંકાસ્પદ આરોપીઓને પકડી શકાય. અથવા તેની માહિતી એકઠી કરવી. તે કોઈપણ પ્રકારનું આંતરરાષ્ટ્રીય ધરપકડ વોરંટ નથી.

કોણ છે ગોલ્ડી બ્રાર?
સતીન્દરજીત સિંહ ઉર્ફે ગોલ્ડી બ્રાર શ્રી મુક્તસર સાહિબનો રહેવાસી છે અને વર્ષ 2017માં સ્ટુડન્ટ વિઝા પર કેનેડા ગયો હતો. ગેંગસ્ટર ગોલ્ડી બ્રાર લોરેન્સ બિશ્નોઈની નજીકનો હોવાનું કહેવામાં આવે છે. ગોલ્ડી બ્રાર એક કેનેડિયન ગેંગસ્ટર છે અને તે ભારતીય સત્તાવાળાઓ દ્વારા અનેક ગુનાહિત કેસોમાં વોન્ટેડ છે. આ મહિનાની શરૂઆતમાં, ફરીદપુરની એક અદાલતે જિલ્લા યુથ કોંગ્રેસના પ્રમુખ ગુરલાલ સિંહ પહેલવાનની હત્યા માટે બ્રાર વિરુદ્ધ બિનજામીનપાત્ર ધરપકડ વોરંટ જારી કર્યું હતું.

રવિવારે થઈ હતી હત્યા
ઉલ્લેખનીય છે કે પંજાબના માનસા જિલ્લામાં રવિવારે પંજાબી ગાયક સિદ્ધુ મૂસેવાલાની અજાણ્યા હુમલાખોરો દ્વારા ગોળી મારીને હત્યા કરવામાં આવી હતી. મૂસેવાલા પણ કોંગ્રેસના નેતા હતા. પંજાબી ગાયક સિદ્ધુ મુસેવાલાની હત્યાની જવાબદારી લોરેન્સ બિશ્નોઈ ગેંગે લીધી છે. સિદ્ધુ મૂસેવાલા ભણવા માટે કેનેડા ગયા હતા, ત્યારપછી જ્યારે તેઓ પંજાબ પરત ફર્યા તો તેઓ સિંગર તરીકે પાછા ફર્યા. સિદ્ધુ મૂસેવાલા પણ ઘણા વિવાદો સાથે જોડાયેલા હતા. પંજાબ સરકારે સિદ્ધુ મૂસેવાલાની સુરક્ષા પાછી ખેંચી લીધાના એક દિવસ બાદ તેમની હત્યા કરવામાં આવી હતી.