જમ્મુ-કાશ્મીરઃ દુશ્મનો પર સેનાની બાજ નજર, શોપિયાંમાં એન્કાઉન્ટર

જમ્મુ-કાશ્મીરમાં ભારતીય સેના દુશ્મનો પર બાજ નજર રાખીને બેઠી છે. દેશમાં ઘુસણખોરી કરતા આતંકવાદીઓ પર નિશાન તાકીને સેનાના જવાનો બેઠા છે. આ બધાની વચ્ચે શોપિયાંના હેફ શિરમાલમાં આતંકવાદીઓ અને સુરક્ષા દળો વચ્ચે અથડામણ શરૂ થઈ છે, સૂત્રોના જણાવ્યા અનુસાર, આ વિસ્તારમાં સુરક્ષા દળોએ 2-3 આતંકવાદીઓને ઘેરી લીધા છે. સૂત્રોના જણાવ્યા અનુસાર બાતમીના આધારે સુરક્ષાદળો સર્ચ ઓપરેશન માટે વિસ્તારમાં પહોંચ્યા હતા.

આતંકવાદીઓના ગોળીબાર બાદ એન્કાઉન્ટર શરૂ થયું હતું. એક પોલીસ અધિકારીએ જણાવ્યું કે એન્કાઉન્ટર ચાલુ છે અને બંને તરફથી કોઈ જાનહાનિ થઈ નથી. સૂત્રોના જણાવ્યા અનુસાર, એવી માહિતી મળી રહી છે કે સરહદ પારથી લગભગ 150 આતંકવાદીઓ જમ્મુ-કાશ્મીરમાં ઘૂસણખોરી કરવાની તૈયારી કરી રહ્યા છે. આ સાથે 11 ટ્રેનિંગ કેમ્પમાં લગભગ 500 થી 700 અન્ય આતંકીઓની ટ્રેનિંગ ચાલી રહી છે. સેનાના એક વરિષ્ઠ અધિકારીએ કહ્યું કે સુરક્ષા દળો સતત સરહદ પારથી એન્કાઉન્ટરને નિષ્ફળ બનાવી રહ્યા છે.

ઘૂસણખોરીનો કોઈ પ્રયાસ સફળ નહીં
સેના અધિકારીએ એમ પણ કહ્યું છે કે આ વર્ષે એલઓસી પારથી ઘૂસણખોરીનો કોઈ પ્રયાસ સફળ થયો નથી. અધિકારીએ એમ પણ કહ્યું કે આતંકવાદીઓ ઘૂસણખોરી માટે પહેલાથી અપનાવેલા માર્ગો સિવાય અન્ય માર્ગો પણ શોધી રહ્યા છે.