સ્ટડી કે વર્ક પરમિટ પર કેનેડા ગયેલા લોકો માટે આંચકો, વિઝા ગમે ત્યારે થઈ શકે છે રદ્દ! જાણો કેમ?
નવી દિલ્હી, 24 ફેબ્રુઆરી : કેનેડાએ તેના ઈમિગ્રેશન નિયમોમાં મોટો ફેરફાર કર્યો છે. નવા નિયમો અનુસાર, ત્યાંના સરહદ અધિકારીઓ અભ્યાસ, કાર્ય અથવા પ્રવાસી વિઝા પર જારી કરાયેલ અસ્થાયી નિવાસ વિઝાને કોઈપણ સમયે રદ કરી શકે છે. નવા નિયમો હેઠળ સરહદી અધિકારીઓની શક્તિમાં વધારો કરવામાં આવ્યો છે.
નવા ઈમિગ્રેશન અને રેફ્યુજી પ્રોટેક્શન નિયમો કે જે તાજેતરમાં અમલમાં આવ્યા છે તે સરહદ અધિકારીઓને ઈલેક્ટ્રોનિક ટ્રાવેલ ઓથોરાઈઝેશન (ETA) અને ટેમ્પરરી રેસિડેન્ટ વિઝા (TRV) જેવા અસ્થાયી નિવાસી દસ્તાવેજોને રદ કરવાની પહેલા કરતાં વધુ સત્તા આપે છે.
નવા નિયમોથી દર વર્ષે હજારો વિદેશી નાગરિકોને અસર થવાની ધારણા છે. જેમાં મોટા પાયે ભારતીયોનો સમાવેશ થાય છે. નવા નિયમો હેઠળના ફેરફારો વિદ્યાર્થીઓ, સ્ટાફ અને અસ્થાયી નિવાસી મુલાકાતીઓને અસર કરશે, જેમાંથી ઘણા ભારતના છે.
કેનેડામાં શિક્ષણ મેળવવું ભારતીયો માટે એક સપનું રહ્યું છે અને મોટી સંખ્યામાં ભારતીયો તેમના સપના પૂરા કરવા કેનેડા આવી રહ્યા છે. ભારતીય વિદેશ મંત્રાલયના જણાવ્યા અનુસાર કેનેડામાં લગભગ 4,27,000 ભારતીય વિદ્યાર્થીઓ અભ્યાસ કરી રહ્યા છે.
ફાઇનાન્શિયલ એક્સપ્રેસના અહેવાલ મુજબ, જો બોર્ડર ઓફિસર સંતુષ્ટ ન હોય કે વ્યક્તિ કેનેડા છોડી દેશે કે તેનો રોકાણનો સમયગાળો પૂરો થાય છે અથવા જો વહીવટી ભૂલના આધારે દસ્તાવેજ જારી કરવામાં આવ્યો હોય, તો અધિકારી અભ્યાસ અથવા વર્ક પરમિટ રદ કરી શકે છે.
નવા નિયમો અનુસાર, જો ધારક કેનેડાનો કાયમી નિવાસી બની જાય અથવા મૃત્યુ પામે તો પરમિટ પણ રદ થઈ શકે છે. રિપોર્ટમાં જણાવાયું છે કે, સુધારેલા નિયમો ઓટ્ટાવાના ઇમિગ્રેશન માળખામાં ઘણા ફેરફારોને અનુસરે છે, જેમાં 2024ના અંતમાં સ્ટુડન્ટ ડાયરેક્ટ સ્ટ્રીમ (SDS) વિઝા પ્રોગ્રામને રદ કરવાનો સમાવેશ થાય છે.
નવા નિયમોમાં કહેવામાં આવ્યું છે કે જો કોઈ વ્યક્તિની સ્થિતિ કે સંજોગો બદલાય તો તે અયોગ્ય પણ બની શકે છે. તમને જણાવી દઈએ કે કેનેડામાં અભ્યાસ કરતા 4,27,000 વિદ્યાર્થીઓ ઉપરાંત દર વર્ષે લાખો પ્રવાસીઓ ભારતની મુલાકાતે આવે છે. જાન્યુઆરીથી જુલાઈ 2024ની વચ્ચે, કેનેડાએ ભારતીયોને 3,65,750 વિઝિટર વિઝા જારી કર્યા હતા, જે 2023માં સમાન સમયગાળા દરમિયાન 345,631 જારી કરવામાં આવ્યા હતા.
આ પણ વાંચો :- ખેરાલુમાં નાયબ મામલતદાર રૂપિયા 10,000ની લાંચ લેતા ACBના છટકામાં ઝડપાયો
