શિખર ધવને ક્રિકેટમાંથી નિવૃત્તિ કરી જાહેર, વીડિયો પોસ્ટ કરીને આપી માહિતી
- હું મારી સાથે અગણિત યાદો લઈને જાઉં છું. તમારા બધાના પ્રેમ અને સમર્થન બદલ આભાર: શિખર ધવન
દિલ્હી, 24 ઓગસ્ટ: ભારતીય ક્રિકેટ ટીમના સફળ ડાબા હાથના ઓપનિંગ બેટ્સમેનોમાંના એક અને 2013ની ચેમ્પિયન્સ ટ્રોફી વિજેતા ટીમનો ભાગ રહેલા શિખર ધવને આજે 24 ઓગસ્ટના રોજ વહેલી સવારે ક્રિકેટના તમામ ફોર્મેટમાંથી સંન્યાસ લેવાની જાહેરાત કરી છે. વીડિયો પોસ્ટ કરતી વખતે શિખર ધવને કેપ્શનમાં લખ્યું કે, “હવે હું મારી ક્રિકેટ સફરના આ પ્રકરણનો અંત કરી રહ્યો છું. હું મારી સાથે અગણિત યાદો લઈને જાઉં છું. તમારા બધાના પ્રેમ અને સમર્થન બદલ આભાર! જય હિન્દ!” મહત્ત્વપૂર્ણ છે કે, ધવનની ગણતરી વિશ્વ ક્રિકેટના સફળ ઓપનિંગ બેટ્સમેનોમાં થાય છે. તે છેલ્લે વર્ષ 2022માં બાંગ્લાદેશ પ્રવાસ પર રમાયેલી ODI શ્રેણીમાં ભારતીય ટીમ માટે રમ્યો હતો.
જૂઓ અહીં વીડિયો
As I close this chapter of my cricketing journey, I carry with me countless memories and gratitude. Thank you for the love and support! Jai Hind! 🇮🇳 pic.twitter.com/QKxRH55Lgx
— Shikhar Dhawan (@SDhawan25) August 24, 2024
‘આજે હું એવા મોડ પર ઉભો છું જ્યાંથી હું પાછળ જોઉં છું ત્યારે માત્ર યાદો જ દેખાય છે’
શિખર ધવને ઈન્ટરનેશનલ અને ડોમેસ્ટિક ક્રિકેટમાંથી નિવૃત્તિની ઘોષણા કરવાની સાથે પોસ્ટ કરેલા વીડિયોમાં કહ્યું કે, આજે હું એવા મોડ પર ઉભો છું જ્યાંથી જ્યારે હું પાછળ જોઉં છું ત્યારે મને માત્ર યાદો જ દેખાય છે અને જ્યારે હું આગળ જોઉં છું ત્યારે હું આખી દુનિયા જોઈ શકું છું. ભારત માટે રમવાનું મારું હંમેશા એક જ લક્ષ્ય હતું અને તે થયું જેના માટે હું ઘણા લોકોનો આભાર માનું છું. સૌ પ્રથમ, મારો પરિવાર, મારા બાળપણના કોચ તારક સિંહાજી અને મદન શર્માજી જેમના માર્ગદર્શન હેઠળ હું ક્રિકેટ શીખ્યો હતો. પછી મારી ટીમ જેની સાથે હું વર્ષો સુધી રમ્યો જ્યાં મને મારો પરિવાર મળ્યો અને તમારા લોકોનો સપોર્ટ અને પ્રેમ મળ્યો. કહેવાય છે કે, કહાનીમાં આગળ વધવા માટે પાનાં ફેરવવાં જરૂરી છે, બસ તો હું પણ એ જ કરવા જઈ રહ્યો છું. હું આંતરરાષ્ટ્રીય અને ઘરેલુ બંને ક્રિકેટમાંથી મારી નિવૃત્તિની જાહેરાત કરું છું. હું હવે મારી ક્રિકેટ જર્નીને અલવિદા કહી રહ્યો છું, તો મને એ વાતથી સુકૂન મળે છે કે હું મારા દેશ માટે ઘણું રમ્યો. મને આ તક આપવા બદલ હું BCCIઅને DDCAનો તેમજ મારા બધા ચાહકોનો આભાર માનું છું જેમણે મને ખૂબ પ્રેમ કર્યો.
શિખર ધવનનું ક્રિકેટ કરિયર
ડાબા હાથના ઓપનિંગ બેટ્સમેન શિખર ધવનને વર્ષ 2010માં ભારતીય ક્રિકેટ ટીમ માટે આંતરરાષ્ટ્રીય ક્રિકેટમાં ડેબ્યૂ કરવાનો મોકો મળ્યો જ્યારે તેમને ઑક્ટોબર મહિનામાં ઑસ્ટ્રેલિયા સામેની ODI શ્રેણીમાં રમવાની તક મળી. આ પછી શિખર ધવને પાછું વળીને જોયું નથી અને તેમને ટીમ ઈન્ડિયા માટે 34 ટેસ્ટ, 167 વનડે અને 68 T-20 મેચ રમવાની તક મળી છે. જ્યારે શિખર ધવને ટેસ્ટ ક્રિકેટમાં 40.61ની એવરેજથી 2315 રન બનાવ્યા છે, તો તેમણે 7 સદી અને 5 અડધી સદી પણ રમી છે. આ સિવાય વનડેમાં ધવને 44.11ની એવરેજથી 6793 રન બનાવ્યા જેમાં 17 સદી અને 39 અડધી સદી સામેલ છે. ધવને T20 ઈન્ટરનેશનલમાં 27.92ની એવરેજથી 11 અડધી સદી સાથે 1759 રન બનાવ્યા છે.
ડોમેસ્ટિક ક્રિકેટમાંથી નિવૃત્તિ લીધા બાદ ધવન હવે IPLમાં રમતા જોવા મળશે નહીં. તેની ગણતરી IPLના મહાન ખેલાડીઓમાં થાય છે, જેમાં ધવને 222 મેચોમાં 35.07ની સરેરાશથી 6768 રન બનાવ્યા છે, જેમાં તેના નામે 2 સદી અને 51 અડધી સદી છે.
આ પણ જૂઓ: BCCIની મોટી જાહેરાત: ભારતીય ટીમ 2025માં આ દેશ સામે રમશે ટેસ્ટ સિરીઝ; જાણો સંપૂર્ણ શેડ્યૂલ
