અભિનેતા શક્તિ કપૂરના પુત્ર સિદ્ધાંત કપૂરને ડ્રગ્સ લેવાના કેસમાં બેંગ્લોર પોલીસે કસ્ટડીમાં લીધો છે. પોલીસે રવિવારે સાંજે એક પાર્ટી પર દરોડા પાડીને 6 લોકોની ધરપકડ કરી હતી. જેમાં કથિત રીતે શ્રદ્ધા કપૂરના ભાઈ સિદ્ધાંત કપૂરનું નામ સામેલ છે. પુત્ર પર લાગેલા આ આરોપો પર હવે શક્તિ કપૂરની પ્રતિક્રિયા પણ આવી છે.
આ મામલે હવે શક્તિ કપૂરે કહ્યું કે, હું આ અંગે એક જ વાત કહીશ કે તે બિલકુલ શક્ય જ નથી. જ્યારે હું સવારે 9 વાગે જાગ્યો તો એવા સમાચાર આવ્યા કે તેને અટકાયતમાં લેવામાં આવ્યો છે. મને આ વિશે કોઈ ખ્યાલ નથી. આખો પરિવાર તેનો સંપર્ક કરવાનો પ્રયાસ કરી રહ્યો છે. પરંતુ કોઈ સંપર્ક થઈ રહ્યું નથી. મને સમજાતું નથી કે શું થઈ રહ્યું છે.
શક્તિ કપૂરે સ્પષ્ટપણે નકારી કાઢ્યું છે કે તેમનો પુત્ર ડ્રગ્સ લે છે. તેણે કહ્યું, હું મુંબઈમાં છું અને મને ખબર નથી કે શું થઈ રહ્યું છે. મને આ અંગે ન્યુઝ ચેનલો પરના સમાચારથી જ ખબર પડી હતી. અત્યાર સુધી હું એટલું જાણું છું કે કોઈની ધરપકડ કરવામાં આવી નથી અને સિદ્ધાંતને માત્ર કસ્ટડીમાં લેવામાં આવ્યો છે.
જ્યારે શક્તિ કપૂરને પૂછવામાં આવ્યું કે શું સિદ્ધાંત કપૂર બેંગ્લોર ગયો હતો? ત્યારે અભિનેતાએ કહ્યું, હા, તે તેના કામ માટે પાર્ટીઓમાં જતો રહે છે. તેથી જ તે બેંગ્લોરમાં હતો. હું મારા પુત્ર સાથે ખૂબ જ જલ્દી વાત કરીશ. હું એટલું જ જાણું છું કે તે સાચું ન હોઈ શકે.
