ભારત અને ન્યુઝીલેન્ડ વચ્ચેની ત્રણ મેચની T20 શ્રેણીનો નિર્ણય બુધવારે થવાનો છે. આ શ્રેણીની છેલ્લી અને નિર્ણાયક મેચ જે 1-1 થી બરાબર છે, તે અમદાવાદના નરેન્દ્ર મોદી સ્ટેડિયમમાં રમાવાની છે. જેમાં ક્રિકેટ જગતના દિગ્ગજોની સાથે બોલીવુડના સ્ટાર્સ પણ હાજરી આપી શકે છે. અહીં પહેલા 6 T20I મેચ રમાઈ ચુકી છે અને તે તમામમાં ભારતીય ટીમ સામેલ રહી છે. ટીમ ઈન્ડિયાએ અહીં ચાર મેચ જીતી છે અને બે મેચ હારી છે.
મળતી માહિતી મુજબ આ મેચમાં ભારતીય ખેલાડીઓની સાથે સાથે બોલિસ્ટાર્સનો પણ મેળાવડો જોવા મળી શકે છે. જી હાં એવી માહિતી મળી રહી છે કે આ મેચમાં બોલિવુડના બાદશાહ શાહરૂખ ખાન અને અભિનેતા કાર્તિક આર્યન પણ ઉપસ્થિત રહી શકે છે. હાલમાં જ બોલીવુડના બાદશાહ શાહરૂખ ખાનની પઠાણ રિલીઝ થઇ છે અને ફિલ્મે બોક્સઓફિસ પર ધમાલ મચાવી છે. કમાણીના મામલે ફિલ્મે અનેક રેકોર્ડ્સ તોડી નાખ્યા છે, એવામાં ફિલ્મની સફળતા બાદ શાહરૂખ પહેલીવાર સ્ટેડિયમમાં મેચ જોવા અને ફિલ્મને મળેલ જોરદાર પ્રતિસાદનો આભાર માનવા અમદાવાદના નરેન્દ્ર મોદી સ્ટેડિયમમાં હાજરી આપી શકે છે. તેની સાથે ફિલ્મની લીડ એક્ટ્રેસ દીપિકા પાદુકોણ અને કો-એક્ટર જોન અબ્રાહમ પણ હાજર રહી શકે છે.
તો સાથે એવા પણ સમાચાર મળી રહ્યા છે ક્રિકેટના ભગવાન અને માસ્ટર બ્લાસ્ટર સચિન તેંડુલકર પણ ભારત અને ન્યુઝીલેન્ડ વચ્ચેની આ નિર્ણાયક ટી-20 મેચમાં હાજર રહી શકે છે. ન્યૂઝીલેન્ડ સામેની ત્રીજી અને અંતિમ T20 મેચની શરૂઆત પહેલા સાંજે 6:30 વાગ્યે વિશ્વના સૌથી મોટા ક્રિકેટ સ્ટેડિયમ નરેન્દ્ર મોદી સ્ટેડિયમમાં સચિન તેંદુલકરના હસ્તે U-19 વર્લ્ડ કપ ચેમ્પિયન મહિલા ટીમનું સન્માન કરવામાં આવશે. અન્ડર 19 વર્લ્ડકપમાં ભારતની દિકરીઓએ શાનદાર પ્રદર્શન કર્યું હતું અને વર્લ્ડકપ જીત્યો હતો. જે તમામનું માસ્ટરબ્લાસ્ટરના હસ્તે સન્માન કરવામાં આવશે.
