Box Office : ‘હિટ’ અને ‘શાબાશ મિઠુ’ની ટક્કર, કઈ ફિલ્મની કેટલી કમાણી?

આ શુક્રવારે બોક્સ ઓફિસ પર બે મોટી ફિલ્મો ટકરાઈ હતી. એક તરફ બોલિવૂડ એક્ટ્રેસ તાપસી પન્નુની ‘શાબાશ મિઠુ’ અને બીજી તરફ એક્ટર રાજકુમાર રાવનો ‘હિટ-ધ ફર્સ્ટ કેસ’ હતો. આવી સ્થિતિમાં, બોક્સ ઓફિસ પર આ પરસ્પર ક્લેશમાં બંને ફિલ્મો સરેરાશ સાબિત થઈ છે, જેના કારણે આ ફિલ્મોની કમાણી પહેલા બે દિવસમાં ખૂબ જ ધીમી રહી છે.

‘શાબાશ મિઠુ’નું બોક્સ ઓફિસ પર નબળુ પ્રદર્શન

ભારતીય મહિલા ક્રિકેટ ટીમની પૂર્વ કેપ્ટન મિતાલી રાજના જીવન પર આધારિત ‘શાબાશ મિઠુ’ બોક્સ ઓફિસ પર ખાસ કમાલ કરવામાં નિષ્ફળ રહી છે. બોલિવૂડ અભિનેત્રી તાપસી પન્નુએ આ ફિલ્મમાં મિતાલી રાજની ભૂમિકા ભજવી છે. પરંતુ પ્રથમ બે દિવસમાં ફિલ્મ પોતાના માટે દર્શકો એકત્ર કરી શકી નથી. જેના કારણે શાબાશ મિઠુએ પહેલા બે દિવસમાં બોક્સ ઓફિસ પર માત્ર 1 કરોડની કમાણી કરી છે. ફિલ્મે રિલીઝના પહેલા દિવસે 40 લાખ અને બીજા દિવસે 60 લાખની કમાણી કરી લીધી છે.

‘હિટ-ધ ફર્સ્ટ કેસ’ની સારી શરૂઆત

આ સિવાય બોલિવૂડ એક્ટર રાજકુમાર રાવની સસ્પેન્સ થ્રિલર ‘હિટ-ધ ફર્સ્ટ કેસ’ બોક્સ ઓફિસ પર સારી શરૂઆત કરી છે. પહેલા બે દિવસમાં ફિલ્મે બોક્સ ઓફિસ પર 3 કરોડનો આંકડો પાર કરી લીધો છે. રાજકુમાર રાવ અને સાન્યા મલ્હોત્રાની આ હિટ ફિલ્મે પહેલા દિવસે 1.35 કરોડ અને બીજા દિવસે 2.01 કરોડની કમાણી કરી છે. આ સ્થિતિમાં હવે ‘હિટ-ધ ફર્સ્ટ કેસ’નું કુલ બોક્સ ઓફિસ કલેક્શન 3.36 કરોડ થઈ ગયું છે. આગામી સમયમાં હિટની કમાણી વધવાની આશા છે.