કેજરીવાલના વચગાળાના જામીન વધારવાની અરજી પર તાત્કાલિક સુનાવણી કરવાનો SCનો ઇનકાર

• મુખ્યમંત્રી કેજરીવાલ 1 જૂન સુધી વચગાળાના જામીન પર છે

નવી દિલ્હી, 28 મે: દિલ્હી એક્સાઈઝ પોલિસી કૌભાંડમાં મની લોન્ડરિંગના આરોપી મુખ્યમંત્રી અરવિંદ કેજરીવાલને આજે મંગળવારે સુપ્રીમ કોર્ટ તરફથી ઝટકો લાગ્યો છે. સુપ્રીમ કોર્ટે સીએમ કેજરીવાલના સ્વાસ્થ્ય તપાસ માટે વચગાળાના જામીનને 7 દિવસ સુધી લંબાવવાની અરજી પર તાત્કાલિક સુનાવણી કરવાનો ઇનકાર કર્યો છે. કોર્ટે સીએમ કેજરીવાલ તરફથી હાજર રહેલા વકીલ અભિષેક સિંઘવીને પૂછ્યું કે, ગયા અઠવાડિયે જ્યારે ચીફ જસ્ટિસ દત્તા બેઠા હતા ત્યારે કેજરીવાલની અરજીનો ઉલ્લેખ કેમ કરવામાં આવ્યો ન હતો.

જસ્ટિસ એ.એસ. ઓકની અધ્યક્ષતાવાળી બેંચે આ કેસની સુનાવણી કરી હતી. ખંડપીઠે જણાવ્યું હતું કે, મુખ્ય કેસમાં ચુકાદો અનામત હોવાથી CJI વચગાળાના જામીન લંબાવવાની સીએમ કેજરીવાલની અરજીને સૂચિબદ્ધ કરવા પર યોગ્ય નિર્ણય લેશે.

સીએમને ચૂંટણી પ્રચાર માટે વચગાળાના જામીન મળ્યા હતા

મહત્ત્વપૂર્ણ છે કે, મુખ્યમંત્રી કેજરીવાલ 1 જૂન સુધી વચગાળાના જામીન પર છે. દિલ્હીમાં કથિત દારૂ નીતિ કૌભાંડમાં મની લોન્ડરિંગના આરોપમાં 21 માર્ચે તેની ધરપકડ કરવામાં આવી હતી. થોડા દિવસો પહેલા કેજરીવાલને લોકસભા ચૂંટણીમાં પ્રચાર કરવા માટે 10 મેથી 1 જૂન સુધી વચગાળાના જામીન આપવામાં આવ્યા હતા. સીએમ કેજરીવાલે 2 જૂને આત્મસમર્પણ કરવું પડશે.

અરજીમાં શું દલીલો આપવામાં આવી હતી?

સીએમ કેજરીવાલ વતી કોર્ટમાં દાખલ કરવામાં આવેલી અરજીમાં ડૉક્ટરની સલાહ સાથે કહેવામાં આવ્યું છે કે, તેમની અટકાયત દરમિયાન અને અચાનક વજન ઘટવા અને સ્વાસ્થ્ય સંબંધિત અન્ય સમસ્યાઓને ધ્યાનમાં રાખીને તેમણે છ-સાત કિલો વજન ઘટાડ્યું છે, તેમણે PET-CT સ્કેન સહિત સંખ્યાબંધ તબીબી પરીક્ષણો કરવાની જરૂર છે જેમાં પાંચ-સાત દિવસનો સમય લાગશે.

કેજરીવાલે સુપ્રીમ કોર્ટને વિનંતી કરી છે કે, તબીબી પરીક્ષણોને ધ્યાનમાં રાખીને તેમના વચગાળાના જામીન એક સપ્તાહ સુધી લંબાવવામાં આવે અને તેમને 2 જૂનને બદલે 9 જૂને આત્મસમર્પણ કરવાની મંજૂરી આપવામાં આવે.

આ પણ જુઓ:રાજકોટ અગ્નિકાંડ: 28માંથી 11 મૃતદેહો પરિવારજનોને સોંપાયા, બ્રાહ્મણોએ શાંતિ પાઠ કર્યા