MSME માટે નવું ક્રેડિટ મૂલ્યાંકન મોડેલ, લોન પ્રક્રિયા પર થશે આ અસર
નવી દિલ્હી, 8 માર્ચઃ સૂક્ષ્મ, લઘુ અને મધ્યમ સાહસો (MSME)ને લોન આપવા માટે બેન્ક હવે કોઇ થર્ડ પાર્ટી કે તેમના ટર્નઓવરની જાણકારી પર નિર્ભર રહેશે નહી. બેન્ક બહારના મૂલ્યાંકન પર નિર્ભરતાને બદલે પોતાની આંતિક ક્ષમતા વિકસિત કરશે. તે સમગ્ર રીતે ડિજીટલ અને ડેટાબેઝ આધારિત હશે. નાણાંમંત્રી નિર્મલા સિતારમણ અને રાજ્ય નાણાં મંત્રી પંકજ ચૌધરીએ ગઇકાલે નવું ક્રેડિટ મૂલ્યાંકન મોડેલ લોન્ચ કર્યુ હતું. ચાલુ નાણાકીય વર્ષ 2024-25 માટે પાછલા વર્ષે જુલાઇમાં રજૂ થનાર બજેટમાં આ પ્રકારના મોડેલને અપનાવવાની ઘોષણા કરવામાં આવી હતી.
આ મોડેલને અપનાવવાથી લોન માટે MSMEને બેન્ક કે કોઇ પમ જગ્યાએ જવાની જરૂરત રહેશે નહી. આ મોડેલ દ્વારા ગમે ત્યાંથી લોન માટે અરજી કરી શકાય છે અને કોઇ પ્રકારના પેપર વર્ક કરવાના રહેશે નહી. આ માધ્યમને અપનાવવો એ પણ ફાયદો થશે કે ડિજીટલ માધ્યમથી લોનની તત્કાલ સૈદ્ધાંતિક મંજૂરી મળી જશે.
લોનની દરખાસ્તો કોઈપણ મુશ્કેલી વિના પ્રક્રિયા કરી શકાય છે, ઓપરેશન્સ અને સર્વિસ ડિલિવરીમાં ઓછો સમય લાગશે અને ડેટાના આધારે વ્યાજબી અને પારદર્શક રીતે લોન આપી શકાશે. માઇક્રો અને સ્મોલ એન્ટરપ્રાઇઝિસ માટે ક્રેડિટ ગેરંટી ફંડ ટ્રસ્ટ હેઠળ લોન માટે કોઈ સુરક્ષા પ્રદાન કરવાની જરૂર રહેશે નહીં. નવા મોડલ હેઠળ, અરજદારના ડિજિટલ અને ચકાસી શકાય તેવા ઉપલબ્ધ ડેટાનો ઉપયોગ કરવામાં આવશે. આનાથી નવા MSME સાહસિકો માટે લોન લેવાનું પણ સરળ બનશે.
નેશનલ સિક્યોરિટીઝ ડિપોઝિટરી લિમિટેડનો ઉપયોગ કરીને નામ અને PAN ચકાસવામાં આવશે, OTPની મદદથી ઈ-મેલ અને ફોન નંબરની ચકાસણી કરવામાં આવશે, આવકવેરા રિટર્ન, બેંક સ્ટેટમેન્ટમાંથી નાણાકીય વિશ્લેષણ કરવામાં આવશે. એપ્લિકેશન પ્રોગ્રામિંગ ઈન્ટરફેસ (API)ની મદદથી અરજદારની વ્યાપારી અને ગ્રાહક માહિતી એકત્રિત કરવામાં આવશે. ડિજિટલ ડેટાની મદદથી અરજદારની ઇમેજ પણ તપાસવામાં આવશે.
આ પણ વાંચોઃ લલિત મોદીએ ભારતીય પાસપોર્ટ સરેન્ડર કર્યો, બીજા દેશની નાગરિકતા મેળવી
