મનીષ સિસોદિયાની જામીન અરજી પર 14 જુલાઈએ સુનાવણી, પહેલા દિલ્હી હાઈકોર્ટમાં કરી હતી અરજી

સુપ્રીમ કોર્ટ દિલ્હીના પૂર્વ નાયબ મુખ્યમંત્રી મનીષ સિસોદિયાની જામીન અરજી પર 14 જુલાઈએ સુનાવણી કરશે. વરિષ્ઠ વકીલ અભિષેક મનુ સિંઘવીએ આ મામલો ચીફ જસ્ટિસ ડીવાય ચંદ્રચુડ સમક્ષ મૂક્યો, જેના પર કોર્ટ સુનાવણી કરવા તૈયાર થઈ ગઈ છે. સિંઘવીએ જણાવ્યું કે હાઈકોર્ટે જામીન અરજી ફગાવી દીધી છે. સિસોદિયાની પત્ની ગંભીર રીતે બીમાર છે અને હોસ્પિટલમાં દાખલ છે. આ પહેલા સિસોદિયાએ દિલ્હી હાઈકોર્ટમાં જામીન માટે અરજી કરી હતી, પરંતુ તેમની અરજી ફગાવી દેવામાં આવી હતી. ગુરુવારે સિસોદિયા પોતાના જામીન મામલે સુપ્રીમ કોર્ટ પહોંચ્યા હતા. તેઓ દિલ્હીના દારૂ નીતિ કૌભાંડ કેસમાં ભ્રષ્ટાચારના આરોપોનો સામનો કરી રહ્યા છે. દરોડા બાદ ED દ્વારા તેને કસ્ટડીમાં લેવામાં આવ્યો હતો.

money laundering case

સુપ્રીમ કોર્ટ 14 જુલાઈએ સુનાવણી કરશે

CJI DY ચંદ્રચુડ અને જસ્ટિસ P.S. નરસિમ્હાની બેંચ સિસોદિયાની અરજી પર સુનાવણી કરશે. બેન્ચે કહ્યું કે આ મામલો 17 જુલાઈએ સુનાવણી માટે સૂચિબદ્ધ છે પરંતુ તે 14 જુલાઈએ તેની સુનાવણી કરશે. સિસોદિયાએ ગયા અઠવાડિયે દિલ્હી એક્સાઇઝ પોલિસી કૌભાંડ સંબંધિત CBI અને ED કેસમાં જામીન માટે સુપ્રીમ કોર્ટમાં અરજી કરી હતી. અગાઉ તેણે દિલ્હી હાઈકોર્ટમાં બે વખત અરજી કરી હતી, પરંતુ ત્યાં તેની અરજી ફગાવી દેવામાં આવી હતી. તેમણે હાઈકોર્ટના આદેશને પડકારી સુપ્રીમ કોર્ટનો સંપર્ક કર્યો છે.

દિલ્હી હાઈકોર્ટમાં બે વખત અરજી આપી

30 મેના રોજ દિલ્હી હાઈકોર્ટે આ કેસમાં મનીષ સિસોદિયાને જામીન આપવાનો ઈન્કાર કરી દીધો હતો. કોર્ટે પોતાના આદેશમાં કહ્યું હતું કે સિસોદિયા એક્સાઈઝ પોલિસીના મામલામાં ઉચ્ચ હોદ્દા પર હતા, તેથી તેઓ એમ ન કહી શકે કે તેમાં તેમની કોઈ ભૂમિકા નથી. 3 જુલાઈના રોજ કોર્ટે એક્સાઈઝ પોલિસી કૌભાંડ સંબંધિત મની લોન્ડરિંગ કેસમાં સિસોદિયાની જામીન અરજી ફગાવી દીધી હતી.

26 ફેબ્રુઆરીએ થઈ હતી ધરપકડ

દિલ્હીના નાયબ મુખ્યમંત્રી રહીને સિસોદિયાએ આબકારી ખાતું પણ સંભાળ્યું હતું. કૌભાંડમાં તેની ભૂમિકા બદલ સીબીઆઈ દ્વારા પ્રથમ વખત 26 ફેબ્રુઆરીએ તેની ધરપકડ કરવામાં આવી હતી અને ત્યારથી તે કસ્ટડીમાં છે. તેમણે 28 ફેબ્રુઆરીએ દિલ્હી કેબિનેટમાંથી રાજીનામું આપ્યું હતું.