શંભુ બોર્ડર ખોલવાના આદેશ પર SCએ મૂક્યો પ્રતિબંધ, ખેડૂતોની માંગણીઓ માટે સમિતિ બનાવવાનો કર્યો નિર્દેશ

• કમિટીમાં અધિકારીઓ, ખેડૂતો અને સામાજિક કાર્યકરોનો સમાવેશ કરવા સૂચના આપવામાં આવી છે. સુપ્રિમ કોર્ટે ખેડૂતોની વિવિધ માંગણીઓ પર વિચારણા કરવા માટે એક કમિટી બનાવવાની દરખાસ્ત કરી છે

દિલ્હી, 24 જુલાઈ: સુપ્રીમ કોર્ટે હાલમાં શંભુ બોર્ડર ખોલવાના પંજાબ અને હરિયાણા હાઈકોર્ટ દ્વારા આપવામાં આવેલા આદેશ પર રોક લગાવી દીધી છે. સાથે જ સુપ્રીમ કોર્ટે આ મુદ્દે નિર્ણય લેવા માટે એક કમિટી બનાવવાનો આદેશ આપ્યો છે. કમિટીમાં અધિકારીઓ, ખેડૂતો અને સામાજિક કાર્યકરોનો સમાવેશ કરવા સૂચના આપવામાં આવી છે. વાસ્તવમાં સુપ્રીમ કોર્ટે ખેડૂતોની વિવિધ માંગણીઓ પર વિચારણા કરવા માટે એક સમિતિ બનાવવાનો પ્રસ્તાવ મૂક્યો છે. આ સમિતિનો મુખ્ય ઉદ્દેશ્ય ખેડૂતોને તેમના પાક માટે લઘુત્તમ ટેકાના ભાવ (એમએસપી)ની કાયદાકીય ગેરંટી આપવા સહિતની માંગણીઓ પર વિચાર કરવાનો રહેશે.

ખેડૂતોની મુખ્ય માંગ MSP

સુપ્રીમ કોર્ટે આ પગલું એવા સમયે ઉઠાવ્યું છે જ્યારે દેશના વિવિધ ભાગોમાં ખેડૂતો પોતાની માંગણીઓ માટે આંદોલન કરી રહ્યા છે. ખેડૂતોની મુખ્ય માંગણીઓમાંની એક એ છે કે તેમના પાક માટે લઘુત્તમ ટેકાના ભાવ (MSP)ને કાયદેસરનો દરજ્જો આપવામાં આવે, જેથી તેઓ તેમની મહેનતનું યોગ્ય મૂલ્ય મેળવી શકે.

ખેડૂતો અને સરકાર સાથે વાટાઘાટો કરીને મુદ્દાઓનું સમાધાન શોધવા કોર્ટે સમિતિની રચના કરવાનો કર્યો નિર્દેશ

સુપ્રીમ કોર્ટે બુધવારે (24 જુલાઈ) પંજાબ-હરિયાણા બોર્ડર પર વિરોધ કરી રહેલા ખેડૂતો અને સરકાર સાથે વાટાઘાટો કરીને મુદ્દાઓનું સમાધાન શોધવા માટે સ્વતંત્ર વ્યક્તિઓની એક સમિતિ બનાવવાનો ઈરાદો વ્યક્ત કર્યો હતો. કોર્ટે પંજાબ અને હરિયાણા રાજ્યોને સમિતિમાં સામેલ કરી શકાય તેવા યોગ્ય વ્યક્તિઓના નામ સૂચવવા કહ્યું છે. તેમણે અંબાલા નજીક શંભુ બોર્ડર પર એક અઠવાડિયા સુધી યથાવત સ્થિતિ જાળવવાનો આદેશ પણ આપ્યો છે, જ્યાં 13 ફેબ્રુઆરીથી ખેડૂતો કેમ્પ કરી રહ્યા છે.

કોર્ટે બીજુ શું-શું કહ્યું?

ન્યાયાધીશ સૂર્યકાન્તની આગેવાની હેઠળની ત્રણ સભ્યોની બેન્ચે જણાવ્યું હતું કે ખેડૂતો અને સરકાર વચ્ચે વિશ્વાસ સ્થાપિત કરી શકે તેવા “તટસ્થ અમ્પાયર”ની જરૂર છે. આ બેંચમાં જસ્ટિસ દીપાંકર દત્તા અને જસ્ટિસ ઉજ્જલ ભુઈયા પણ સામેલ હતા. બેન્ચે કહ્યું, “તમારે ખેડૂતો સાથે વાત કરવા માટે કેટલાક પગલાં ભરવા પડશે. નહીં તો તેઓ દિલ્હી શા માટે આવશે? તમે અહીંથી મંત્રીઓને મોકલી રહ્યા છો અને તેમના સારા ઇરાદા હોવા છતાં વિશ્વાસનો અભાવ છે.” કોર્ટે કહ્યું, ”એક અઠવાડિયામાં યોગ્ય સૂચનાઓ આપવામાં આવે. ત્યાં સુધી, તમામ પક્ષોને શંભુ બોર્ડર પર પરિસ્થિતિને વધુ બગડતી અટકાવવા માટે વિરોધ સ્થળ પર યથાવત સ્થિતિ જાળવી રાખવા દો.

સુપ્રીમ કોર્ટ પંજાબ અને હરિયાણા હાઈકોર્ટ દ્વારા આપવામાં આવેલા આદેશ વિરુદ્ધ હરિયાણા રાજ્યની અરજી પર સુનાવણી કરી રહી હતી. વાસ્તવમાં, અગાઉ પંજાબ અને હરિયાણા હાઈકોર્ટે શંભુ બોર્ડરને ખોલવાનો નિર્દેશ આપ્યો હતો, જે આ વર્ષે ફેબ્રુઆરીમાં પંજાબથી હરિયાણા તરફ વિરોધ કરી રહેલા ખેડૂતોના આંદોલનને રોકવા માટે બંધ કરવામાં આવી હતી. પાક માટે લઘુત્તમ ટેકાના ભાવની વૈધાનિક ગેરંટી જેવી માંગને લઈને ખેડૂતો ત્યાં વિરોધ કરી રહ્યા છે.

આ પણ વાંચો: જળવાયુ પરિવર્તનનું પરિણામ, જુલાઈનો આ દિવસ 84 વર્ષમાં સૌથી ગરમ રહ્યો