“ભારત માતાની જય” બોલવું એ હેટસ્પિચ નથી જ: જાણો કઈ હાઈકોર્ટે આપ્યો આ ચુકાદો?
બેંગ્લોર, 27 સપ્ટેમ્બર : ‘ભારત માતા કી જય’ બોલવું એ અપરાધ છે કે ભારતમાં દ્વેષપૂર્ણ ભાષણ? કર્ણાટક હાઈકોર્ટે પોલીસને કડક ઠપકો આપતા આ સવાલ પૂછ્યો છે. હાઈકોર્ટે સ્પષ્ટ કહ્યું કે ભારત માતા કી જયના નારા લગાવવા એ કોઈ પણ રીતે નફરતભર્યા ભાષણની શ્રેણીમાં આવતું નથી. આ સાથે હાઈકોર્ટે આ વર્ષે જૂનમાં આઈપીસીની કલમ 153A (હવે BNS) હેઠળ 5 લોકો સામે નોંધાયેલા કેસને ફગાવી દીધો હતો. આ કેસમાં કર્ણાટક પોલીસે પાંચેય લોકો પર બે સમુદાયો વચ્ચે નફરત ફેલાવવાનો આરોપ લગાવ્યો હતો.
ઘટના પીએમ મોદીના શપથ ગ્રહણના દિવસે બની હતી
આ વર્ષે 9 જૂનના રોજ ભાજપે વડાપ્રધાન નરેન્દ્ર મોદીની ત્રીજી વખત શપથ લીધાની ઉજવણી માટે વિવિધ સ્થળોએ કાર્યક્રમોનું આયોજન કર્યું હતું. આવા જ એક કાર્યક્રમમાંથી પરત ફરતી વખતે પાંચ લોકો ‘ભારત માતા કી જય’ના નારા લગાવી રહ્યા હતા. જેના કારણે ચોક્કસ સમુદાયના લોકો દ્વારા તેના પર હુમલો કરવામાં આવ્યો હતો અને છરીના ઘા મારીને ઇજાઓ પણ કરવામાં આવી હતી.
જ્યારે પાંચ લોકોએ તેમની ફરિયાદ સાથે કર્ણાટક પોલીસનો સંપર્ક કર્યો, ત્યારે ભારતીય દંડ સંહિતાની કલમ 153A (ધાર્મિક આધાર પર બે સમુદાયો વચ્ચે નફરતને પ્રોત્સાહન આપવી) સહિતની અનેક કલમો હેઠળ તેમની વિરુદ્ધ FIR નોંધવામાં આવી હતી. પોલીસનું કહેવું છે કે આ એફઆઈઆર એક મુસ્લિમ વ્યક્તિની ફરિયાદના આધારે નોંધવામાં આવી છે, જેણે તેમને ધમકી આપવાના નારા લગાવનારાઓ પર આરોપ લગાવ્યો છે.
‘કેસની તપાસ એટલે ભારત માતા કી જયના નારાની તપાસ’
કર્ણાટક હાઈકોર્ટના જસ્ટિસ એમ. નાગપ્રસન્નાની બેન્ચે આ કેસની સુનાવણી કરી હતી. જસ્ટિસ નાગપ્રસન્નાએ પાંચ આરોપીઓને મુક્ત કરવાનો આદેશ આપ્યો હતો. એફઆઈઆરને નકારી કાઢતાં તેમણે કહ્યું કે આ કેસમાં કલમ 153A લાગુ કરવા યોગ્ય એક પણ તથ્ય નથી. બેન્ચે કહ્યું, ‘પોલીસ દ્વારા રજૂ કરાયેલા તથ્યોને ધ્યાનમાં રાખીને, જો આ કેસમાં તપાસની મંજૂરી આપવામાં આવે છે, તો પ્રથમ દૃષ્ટિએ ભારત માતા કી જયના નારા લગાવવાની તપાસને મંજૂરી આપવી પડશે. આ સૂત્ર કોઈપણ રીતે ધર્મો વચ્ચે દુશ્મનાવટ વધારી શકે નહીં.
પોલીસને ઠપકો આપ્યો હતો
બાર એન્ડ બેંચના રિપોર્ટ અનુસાર, જસ્ટિસ નાગપ્રસન્નાએ પોલીસને ઠપકો આપતા કહ્યું કે, તેઓએ આ મામલાને જોવો જોઈતો હતો. બેન્ચે કહ્યું, ‘આ મામલો સ્પષ્ટપણે તે ફરિયાદનો કાઉન્ટરબ્લાસ્ટ હતો જે અરજદારો (પીડિતો)એ તેમના પર હુમલો કર્યા બાદ દાખલ કરી હતી.’
