સલમાનની ફિલ્મ ‘કિસી કા ભાઈ કિસી કી જાન’નું ટ્રેલર રિલીઝ, ભાઈજાને સ્વેગથી જીતી લીધું દિલ

બોલિવૂડના દબંગ ખાન સલમાન ખાનની ફિલ્મ ‘કિસી કા ભાઈ કિસી કી જાન’નું ટ્રેલર રિલીઝ થઈ ગયું છે. ભાઈજાનના ચાહકો માટે આ ટ્રેલર કોઈ વિઝ્યુઅલ ટ્રીટથી ઓછું નથી. ટ્રેલરમાં રોમાન્સ-એક્શન-ડ્રામા-ડાન્સ બધું જ ભરેલું છે.

કેવું છે ટ્રેલર?

સલમાન ફિલ્મના ટ્રેલરની શરૂઆત સંસ્કૃત શ્લોકથી કરે છે. ટ્રેલરમાં સલમાન ખાન અને પૂજા હેગડેની રોમેન્ટિક કેમેસ્ટ્રી જોવા મળી રહી છે. ફરી એકવાર સલમાન તેના પ્રેમ માટે જબરદસ્ત એક્શન કરતો જોવા મળશે. ટ્રેલરમાં સલમાન ખાન બે લુકમાં જોવા મળી રહ્યો છે. સલમાન લાંબા વાળ, સિક્સ પેક એબ્સમાં ટશન બતાવતો જોવા મળ્યો છે. ફિલ્મની આખી વાર્તા પૂજા હેગડે અને સલમાનની લવસ્ટોરીની આસપાસની છે. ફિલ્મની વાર્તા પણ દક્ષિણની પૃષ્ઠભૂમિ ધરાવે છે. ચાહકોને ફિલ્મનું ટ્રેલર ખૂબ જ પસંદ આવી રહ્યું છે. હવે જોવાનું એ રહેશે કે સલમાનની આ ફિલ્મ ઈદ પર રીલિઝ થવા પર કેવો પ્રતિસાદ આપે છે.

ફિલ્મ ક્યારે રિલીઝ થશે?

ફરહાદ સામજી દ્વારા નિર્દેશિત આ ફિલ્મ ઈદના અવસર પર 21 એપ્રિલે રિલીઝ થશે. આ ફિલ્મનું નિર્માણ સલમાન ખાને કર્યું છે. સલમાન આ ફિલ્મથી બે નવા ચહેરાઓને લોન્ચ કરી રહ્યો છે. એક પલક તિવારી અને બીજી શહનાઝ ગિલ. બંને અભિનેત્રીઓની આ પ્રથમ બોલિવૂડ ફિલ્મ છે. જણાવી દઈએ કે પલક તિવારી ફિલ્મ રોઝીઃ ધ સેફ્રોન ચેપ્ટરથી ડેબ્યૂ કરવાની હતી. જોકે, ફિલ્મની રિલીઝ ડેટને લઈને હજુ પણ સસ્પેન્સ યથાવત્ છે.

આ પણ વાંચોઃ સલમાન ખાનનો ‘લુંગી’ અવતાર, રામ ચરણ-વેંકટેશ સાથે ભાઈજાનનો ડાન્સ

ફિલ્મમાં પૂજા હેગડે લીડ રોલમાં છે. જેમાં અભિનેતા દગ્ગુબાતી વેંકટેશ, સિદ્ધાર્થ નિગમ, રાઘવ જુયાલ, ભૂમિકા ચાવલા જેવા સ્ટાર્સ છે. સાઉથ એક્ટર રામ ચરણે ફિલ્મના ગીત ‘યેતમમા’માં કેમિયો કર્યો છે. ફિલ્મના ગીતોએ ખૂબ જ ધૂમ મચાવી છે.