‘શહેજાદાના અંકલે ભારતીયોને અપશબ્દો બોલ્યા’, પિત્રોડાના નિવેદન પર વરસ્યા PM મોદી
હૈદરાબાદ, 08 મે 2024: ભારતીયોના રંગને લઈને કોંગ્રેસ નેતા સામ પિત્રોડાની ટિપ્પણીએ લોકસભા ચૂંટણીમાં નવો વિવાદ ઊભો કર્યો છે. પિત્રોડાના વિવાદાસ્પદ નિવેદનને લઈને વડાપ્રધાન નરેન્દ્ર મોદીએ બુધવારે કોંગ્રેસ નેતા રાહુલ ગાંધી પર આકરા પ્રહારો કર્યા હતા. તેલંગાણામાં એક રેલી દરમિયાન તેમણે કહ્યું કે અમેરિકામાં બેઠેલા શહેજાદાના અંકલે એક નવું રહસ્ય ખોલ્યું છે. કહ્યું કે કાળા દેખાતા લોકો આફ્રિકન છે. હું ખૂબ જ ગુસ્સે છું કારણ કે આજે તે લોકોએ ભારતીયોને અપશબ્દો બોલ્યા છે.
સામ પિત્રોડાના નિવેદને કોંગ્રેસને મુશ્કેલીમાં મૂકી
અગાઉ ઈન્ડિયન ઓવરસીઝ કોંગ્રેસના અધ્યક્ષ સામ પિત્રોડાએ એક ઈન્ટરવ્યુમાં એમ કહીને નવો વિવાદ છેડ્યો હતો કે ભારતીયોના રંગમાં ઘણી વિવિધતા છે, ઉત્તર-પૂર્વમાં રહેતા ભારતીયો ચાઈનીઝ જેવા દેખાય છે, પશ્ચિમમાં ભારતીયો થોડા ગોરા દેખાય છે. અને દક્ષિણમાં રહેતા ભારતીયો આફ્રિકન જેવા દેખાય છે. કોંગ્રેસ પાર્ટીએ સામ પિત્રોડાના નિવેદનથી ભલે પોતાને કિનારે કરી હોય પરંતુ પિત્રોડાના નવા વિવાદાસ્પદ શબ્દો પાર્ટીની મુશ્કેલીમાં વધારો કરી શકે છે. આ નિવેદન પર પીએમ નરેન્દ્ર મોદીએ કોંગ્રેસ પર આકરા પ્રહારો કર્યા છે. કોંગ્રેસ નેતા રાહુલ ગાંધીનું નામ લીધા વિના પીએમ મોદીએ કહ્યું કે ત્વચાના રંગના આધારે દેશના ઘણા લોકોનું અપમાન કરવામાં આવ્યું છે.
શહજાદાના અંકલે એક નવું રહસ્ય જાહેર કર્યું
પીએમ મોદીએ રેલી દરમિયાન કહ્યું કે, “હું ઘણું વિચારતો હતો, દ્રૌપદી જી, જેમની ખૂબ જ પ્રતિષ્ઠા છે, તે આદિવાસી સમુદાયના પ્રતિષ્ઠિત પુત્રી છે. જ્યારે અમે તેમને રાષ્ટ્રપતિ બનાવી રહ્યા છીએ, તો કોંગ્રેસ તેમને હેરાન કરવા માટે આટલી મહેનત કેમ કરી રહી છે. મને ત્યારે કશું સમજાયું ન હતું. મને લાગ્યું કે, શહેજાદા પાસે મગજ નથી. પરંતુ આજે મને ખબર પડી કે, મુર્મુ જે આદિવાસીના પુત્રી છે, તેમને હરાવવા માટે આ લોકો મેદાનમાં ઉતર્યા હતા. આજે ખબર પડી કે, શહેજાદાના અંકલ અમેરિકામાં રહે છે, તેઓએ એક નવું રહસ્ય ખોલ્યું છે, જેમ કે ક્રિકેટમાં કોઈ ત્રીજા અમ્પાયર હોય છે, તેવી જ રીતે શહેજાદાના આ થર્ડ અમ્પાયર સલાહ આપે છે. શહેજાદાના ફિલોસોફર અંકલે કહ્યું છે કે જેમની ત્વચાનો રંગ કાળો હોય છે તે બધા આફ્રિકન છે.
આ પણ વાંચો: ‘દક્ષિણ ભારતીયો આફ્રિકન અને ઉત્તર-પૂર્વીય લોકો ચીની જેવા દેખાય છે’, સામ પિત્રોડાએ ફરી આપ્યું વિવાદિત નિવેદન
