બાલી, વિદેશ મંત્રી એસ જયશંકરે ઇન્ડોનેશિયાના બાલીમાં ચીની વિદેશ મંત્રી વાંગ યી સાથે મુલાકાત કરી. બંને નેતાઓ વચ્ચે સરહદ પરની તાજેતરની સ્થિતિને લઈને ચર્ચા થઈ. બંનેએ વિદ્યાર્થીઓ અને ફ્લાઇટ સહિત અન્ય બાબતો વિશે પણ વાત કરી હતી. જણાવી દઈએ કે જયશંકર 7 અને 8 જુલાઈના રોજ બાલીમાં આયોજિત G20 વિદેશ મંત્રીઓની બેઠકમાં ભાગ લેવા ઈન્ડોનેશિયા ગયા છે.
જયશંકરે પોતે ટ્વિટર પર આ મીટિંગની માહિતી આપી છે. તેમણે લખ્યું કે, દિવસની શરૂઆત રાજધાની બાલીમાં વાંગ યી સાથેની મુલાકાતથી થઈ. વિદેશ મંત્રીના જણાવ્યા અનુસાર લગભગ એક કલાક સુધી બંને નેતાઓ વચ્ચે ઘણા મુદ્દાઓ પર ચર્ચા થઈ હતી.
Began my day in Bali by meeting FM Wang Yi of China. Discussion lasted one hour.
Focused on specific outstanding issues in our bilateral relationship pertaining to the border situation. Also spoke about other matters including students and flights. pic.twitter.com/NYl0Gh451v
— Dr. S. Jaishankar (@DrSJaishankar) July 7, 2022
મે 2020 થી તણાવ
5 મે, 2020 થી પૂર્વ લદ્દાખમાં સરહદ પર ભારત અને ચીનની સેનાઓ વચ્ચે તણાવ જળવાઈ રહ્યો છે. તે સમયે પેંગોંગ ત્સો વિસ્તારોમાં બંને પક્ષો વચ્ચે હિંસક અથડામણ થઈ હતી. ચીન પૂર્વી લદ્દાખમાં વ્યૂહાત્મક રીતે મહત્વપૂર્ણ પેંગોંગ તળાવની આસપાસ તેના કબજા હેઠળના વિસ્તારમાં એક પુલ બનાવી રહ્યું છે. આ સાથે ચીન ભારત સાથેના સરહદી વિસ્તારોમાં રસ્તાઓ અને રહેણાંક વિસ્તારો જેવી અન્ય માળખાકીય સુવિધાઓ પણ સ્થાપિત કરી રહ્યું છે. અમેરિકાએ પણ આ અંગે નારાજગી વ્યક્ત કરી છે.
વિદ્યાર્થીઓ કોરોનાના કારણે ફસાયા
ગયા મહિને ચીનમાં ભારતના રાજદૂત પ્રદીપ કુમાર રાવત અને ચીનના વિદેશ મંત્રી વાંગ યીએ ભારતીય વિદ્યાર્થીઓના પરત ફરવાનો મુદ્દો ઉઠાવ્યો હતો. ભારત અને ચીને કોવિડ-19 પર બેઇજિંગના પ્રતિબંધોને કારણે બે વર્ષથી ઘરે અટવાયેલા હજારો ભારતીય વિદ્યાર્થીઓને પરત લાવવા અંગે ચર્ચા કરી હતી. આ ઉપરાંત કોરોના વાયરસ રોગચાળાને કારણે અવરોધાયેલી સીધી ફ્લાઇટ્સ પુનઃસ્થાપિત કરવાના વિષય પર વાતચીત કરવામાં આવી હતી.
G20 સભ્ય દેશોની બેઠક
બાલીની તેમની મુલાકાત દરમિયાન વિદેશ પ્રધાન જયશંકર જી-20 જૂથના સભ્ય દેશો અને બેઠકમાં આમંત્રિત અન્ય દેશોના તેમના સમકક્ષો સાથે દ્વિપક્ષીય બેઠકો કરે તેવી અપેક્ષા છે. G20 વિશ્વની મુખ્ય અર્થવ્યવસ્થાઓનો એક મહત્વપૂર્ણ સમૂહ છે. તે વૈશ્વિક જીડીપીના 80 ટકા અને વૈશ્વિક વેપારમાં 75 ટકા હિસ્સો ધરાવે છે, તેમજ આ જૂથના દેશોની વસ્તી પૃથ્વીની કુલ વસ્તીના 60 ટકા છે.
