ઇન્ટરનેશનલ ડેસ્કઃ યુક્રેન સામેના યુદ્ધમાં રશિયાએ પોતાની રણનીતિથી સૌને ચોંકાવી દીધા છે. રશિયન સેના યુક્રેન પર દિવસના બદલે રાત્રે બોમ્બમારો કરી રહી છે. આવું જ એક દ્રશ્ય યુક્રેનના પૂર્વ ઔદ્યોગિક પ્રાંત લુહાન્સ્કમાં જોવા મળ્યું છે. ત્યાંના ગવર્નરે આરોપ લગાવ્યો કે, રશિયન સૈનિકો વિસ્તારને નર્ક બનાવી રહ્યા છે. હુમલા પહેલાં યુક્રેનની સરકારે દક્ષિણમાં રશિયન-નિયંત્રિત પ્રદેશના રહેવાસીઓને કોઈપણ ભોગે વિસ્તાર છોડી દેવા વિનંતી કરી હતી. લુહાન્સ્કમાં હુમલાઓ પર કામચલાઉ રોક લગાવવામાં આવી હોવાના અહેવાલો પણ હતા.
યુક્રેનના પૂર્વ અને દક્ષિણ ભાગોમાં રશિયા દ્વારા ભારે બોમ્બમારો કરવામાં આવ્યો હોવાના અહેવાલો છે. લુહાન્સ્કના ગવર્નર સેરહી હેદીએ જણાવ્યું હતું કે, રશિયન સેનાએ રાત્રિ દરમિયાન પ્રાંતમાં 20થી વધુ મોર્ટાર અને રોકેટ છોડ્યા હતા અને તેના દળો ડોનેટ્સક સરહદમાં ઘૂસવાનો પ્રયાસ કરી રહ્યા હતા. હેઈદીએ સોશિયલ મીડિયા પર કહ્યું કે, અમે બહારના વિસ્તારમાં રશિયન સૈનિકોને રોકવાનો પ્રયાસ કરી રહ્યા છીએ.
પહેલાની જેમ બોમ્બ ધડાકા
ગવર્નરે જણાવ્યું હતું કે, ‘રશિયન સૈનિકો હુમલાને અસ્થાયી રૂપે અટકાવશે તેવી આગાહીઓ વચ્ચે અત્યાર સુધી દુશ્મનોના હુમલા ચાલુ છે અને તેઓ પહેલાની જેમ અમારી જમીન પર બોમ્બમારો કરી રહ્યા છે’. જો કે, હેઈદીએ પાછળથી દાવો કર્યો હતો કે, યુક્રેનિયન સૈનિકો દ્વારા રશિયન સૈન્ય મથકોના વિનાશથી રશિયન સૈન્યને લુહાન્સ્ક પર બોમ્બ ધડાકા બંધ કરવાની ફરજ પડી હતી.
શક્ય તેટલી વહેલી તકે વિસ્તાર છોડવાનો આદેશ
યુક્રેનના નાયબ વડાપ્રધાન ઈરિના વી.એ રશિયાના અંકુશ હેઠળના દેશના દક્ષિણ ભાગમાં આવેલા વિસ્તારોમાં રહેતા લોકોને શક્ય તેટલી વહેલી તકે વિસ્તાર છોડી દેવા વિનંતી કરી હતી. જેથી કરીને યુક્રેન હુમલાના કિસ્સામાં રશિયન સૈનિકોનો ઢાલ તરીકે ઉપયોગ કરી શકાય. તેમણે કહ્યુ હતુ કે, ‘તમારે આ વિસ્તારમાંથી બહાર નીકળવાનો રસ્તો શોધવાની જરૂર છે. કારણ કે અમારા સશસ્ત્ર દળો વિસ્તાર પર ફરીથી નિયંત્રણ મેળવવા માટે આવી રહ્યા છે.’
માર્યા ગયેલા નાગરિકોની સંખ્યા સતત વધી રહી છે
આ દરમિયાન યુદ્ધમાં માર્યા ગયેલા નાગરિકોની સંખ્યા સતત વધી રહી છે. ડોનેટ્સકના ગવર્નર પાવલો કિરીલેન્કોએ શનિવારે જણાવ્યું હતું કે, ડોનેટ્સક પ્રાંતના સ્વિર્સ્ક અને સેમિહુર્યામાં શુક્રવારે રશિયન બોમ્બ વિસ્ફોટમાં પાંચ લોકો માર્યા ગયા હતા અને અન્ય 8 લોકો ઘાયલ થયા હતા. સ્થાનિક અધિકારીઓના જણાવ્યા અનુસાર, દક્ષિણના શહેર ક્રિવી રિહમાં શનિવારે સવારે મિસાઇલ હુમલામાં બે લોકો માર્યા ગયા હતા અને અન્ય ત્રણ ઘાયલ થયા હતા.
