RTI એક્ટિવિસ્ટે હત્યા પહેલા દુશ્મનોના નામનું બનાવ્યું ટેટૂ, મૃતદેહ જોઇ ડોક્ટર પણ થાય ચકિત

મુંબઈ, 26 જુલાઇ : મુંબઈના વર્લી વિસ્તારમાં એક ‘સ્પા’માં ‘હિસ્ટ્રી-શીટર’ની હત્યાના સંબંધમાં પોલીસે પાંચ લોકોની ધરપકડ કરી છે. ધરપકડ કરાયેલા લોકોમાં સ્પાના માલિક અને રાજસ્થાનના કોટાના ત્રણ લોકોનો સમાવેશ થાય છે. અધિકારીઓએ જણાવ્યું કે મંગળવાર-બુધવારની વચ્ચેની રાત્રે બે લોકોએ સ્પાની અંદર 52 વર્ષીય ગુરુ વાઘમારેની હત્યા કરી નાખી હતી. તેમણે કહ્યું કે વાઘમારેએ પોતાને એક પોલીસ ઇન્ફોર્મર અને RTI એક્ટિવિસ્ટ તરીકે ગણાવ્યો હતો, જો કે તેની સામે બળાત્કાર અને ખંડણી સહિતના અનેક કેસ નોંધાયેલા હતા.

પોલીસે જણાવ્યું કે વાઘમારેએ પોતાના શરીર પર 22 લોકોના નામના ટેટૂ બનાવડાવ્યા હતા જેનાથી તેને ડર હતો. એક અધિકારીએ કહ્યું કે પોસ્ટમોર્ટમ દરમિયાન ખબર પડી કે તેણે પોતાની જાંઘો પર પોતાના સંભવિત દુશ્મનોના નામનું ટેટૂ બનાવ્યું હતું. વરલી પોલીસે સ્પાના માલિકની પણ ધરપકડ કરી છે જ્યાં વાઘમારેની હત્યા કરવામાં આવી હતી, એમ એક અધિકારીએ જણાવ્યું હતું. શહેર પોલીસ ક્રાઈમ બ્રાન્ચે 26 વર્ષીય મોહમ્મદ ફિરોઝ અન્સારીને પાલઘર જિલ્લાના નાલાસોપારામાંથી અને સાકિબ અંસારીની રાજસ્થાનના કોટામાંથી અન્ય બે શકમંદો સાથે ધરપકડ કરી છે, એમ તેમણે જણાવ્યું હતું.

પોલીસ અધિકારીએ કહ્યું, “આ કોન્ટ્રાક્ટ કિલિંગનો મામલો છે. સ્પાના માલિકે કથિત રીતે આરોપીઓને વાઘમારેની હત્યા કરવાનો કોન્ટ્રાક્ટ આપ્યો હતો.” કેસની વિગતો અનુસાર, મુંબઈના વિલે પાર્લેમાં રહેતો વાઘમારે નિયમિતપણે વરલી નાકા ખાતેના સ્પાની મુલાકાત લેતો હતો અને ત્યાં કામ કરતા લોકોને તે ઓળખતો હતો.

વાઘમારે મંગળવારે સાંજે સ્પામાં ગયો ત્યારે તેની 21 વર્ષની ગર્લફ્રેન્ડ અને ત્રણ પુરૂષ મિત્રોએ તેને પાર્ટી આપવા કહ્યું કારણ કે તેણે તાજેતરમાં જ તેનો જન્મદિવસ ઉજવ્યો હતો. પોલીસે જણાવ્યું કે આ પછી પાંચ લોકોનું જૂથ પાર્ટી માટે સાયનની એક હોટલમાં ગયું હતું. પોલીસે જણાવ્યું હતું કે તેઓ બધા મંગળવારે રાત્રે લગભગ 12.30 વાગ્યે સ્પામાં પાછા ફર્યા હતા. પોલીસે જણાવ્યું કે થોડા સમય પછી ત્રણેય જણા ત્યાંથી ચાલ્યા ગયા, જ્યારે વાઘમારે અને તેની ગર્લફ્રેન્ડ ત્યાં જ રહ્યા.

પોલીસે જણાવ્યું કે લગભગ બે કલાક પછી બે અલગ-અલગ લોકો સ્પામાં આવ્યા અને વાઘમારે પર ધારદાર હથિયારોથી હુમલો કર્યો. પોલીસે જણાવ્યું કે ઘટનાની માહિતી વરલી પોલીસને લગભગ 2.30 વાગ્યે આપવામાં આવી હતી. પોલીસ ઘટનાસ્થળે પહોંચી અને વાઘમારે લોહીથી લથપથ જોવા મળ્યો. તેનું ગળું ચીરી નાખવામાં આવ્યું હતું. પોલીસે જણાવ્યું હતું કે પીડિત વિરુદ્ધ ઓછામાં ઓછા 10 કેસ નોંધાયેલા છે, જેમાં મુલુંડ પોલીસ સ્ટેશનમાં નોંધાયેલ બળાત્કારનો કેસ પણ સામેલ છે.

આ પણ વાંચો :‘CM બદલવાની ચર્ચા ખોટી છે…’, ભાજપમાં ખેંચતાણ વચ્ચે UP ભાજપના ચીફ ભૂપેન્દ્ર ચૌધરીનું નિવેદન