ઋષભ પંત 48 કલાકે ICU માંથી આવ્યો બહાર, પ્રાઈવેટ વોર્ડમાં કરાયા દાખલ
ભારતીય ક્રિકેટ ટીમના સ્ટાર ખેલાડી ઋષભ પંત 48 કલાક બાદ મેક્સ હોસ્પિટલના ICUમાંથી બહાર આવ્યા છે. તેમને હોસ્પિટલના ખાનગી વોર્ડમાં ખસેડવામાં આવ્યા છે. પાંચ નિષ્ણાત તબીબોની ટીમ ચોવીસ કલાક તેમના સ્વાસ્થ્ય પર નજર રાખી રહી છે. હોસ્પિટલ મેનેજમેન્ટ સાથે જોડાયેલા સૂત્રોના જણાવ્યા અનુસાર પંતની હાલત ઝડપથી સુધરી રહી છે. ઉલ્લેખનીય છે કે, શુક્રવારે સવારે લગભગ 5 વાગ્યે દિલ્હી-હરિદ્વાર રોડ પર નરસન પાસે રિષભ પંતની કાર ડિવાઈડર સાથે અથડાઈ હતી અને ક્રેશ થઈ ગઈ હતી. આ અકસ્માતમાં ઋષભ પંત ગંભીર રીતે ઘાયલ થયો હતો, જ્યારે તેની કાર આગમાં સંપૂર્ણપણે બળીને ખાખ થઈ ગઈ હતી.
ગંભીર ઇજાને કારણે ખૂબ જ દર્દનો થતો અનુભવ
અકસ્માત બાદ પંતને નરસનની સક્ષમ હોસ્પિટલમાં લઈ જવામાં આવ્યા હતા. જ્યાં પ્રાથમિક સારવાર બાદ તેને દેહરાદૂનની મેક્સ હોસ્પિટલમાં રિફર કરવામાં આવ્યો હતો. હોસ્પિટલના નિષ્ણાતોની ટીમ શુક્રવારથી પંતની સારવાર કરી રહી છે. ડૉક્ટર્સનું કહેવું છે કે ઘણી જગ્યાએ ગંભીર ઈજાઓ અને ફાટેલા અસ્થિબંધનને કારણે પંત હજુ પણ ખૂબ પીડા અનુભવી રહ્યા છે. તેમને આ દર્દમાંથી સંપૂર્ણપણે છુટકારો મેળવવામાં થોડો સમય લાગશે. બીજી તરફ, આ રવિવારે એવી અફવા પણ ચર્ચામાં આવી હતી કે પંતને અગેન્સ્ટ મેડિકલ એડવાઈસ હેઠળ રજા આપવા વિનંતી કરવામાં આવી છે.
કેન્દ્રીય સંરક્ષણ અને પર્યટન રાજ્ય મંત્રી અજય ભટ્ટે મેળવી હતી જાણકારી
જોકે, હોસ્પિટલ મેનેજમેન્ટે તેને પાયાવિહોણું ગણાવ્યું હતું. તેણે કહ્યું કે ક્રિકેટર પંત સંપૂર્ણ સ્વસ્થ થયા પછી જ તેને હોસ્પિટલમાંથી રજા આપી શકાશે. દરમિયાન કેન્દ્રીય સંરક્ષણ અને પર્યટન રાજ્ય મંત્રી અજય ભટ્ટે રવિવારે ઋષભ પંતની માતા સરોજ પંત સાથે ફોન પર વાત કરી અને તેની સુખાકારી વિશે પૂછ્યું હતું. આ પછી, તેમણે મેક્સ હોસ્પિટલના સિનિયર વાઇસ પ્રેસિડેન્ટ અને યુનિટ હેડ ડૉ. સંદીપ તંવર સાથે વાત કરી અને પંતના સ્વાસ્થ્ય વિશે પૂછપરછ કરી. તેણે કહ્યું કે ઋષભ પંત હવે આઈસીયુમાંથી પ્રાઈવેટ વોર્ડમાં શિફ્ટ થઈ ગયો છે. તે સારી રીતે સ્વસ્થ થઈ રહ્યો છે અને ટૂંક સમયમાં બેટ સાથે એક્શનમાં પાછો ફરશે.
