EWS અંગે સુપ્રીમ કોર્ટમાં સમીક્ષા અરજી દાખલ, જાણો કોણે કરી 

દેશમાં આર્થિક અનામતને મંજૂરી મળતા જ સવર્ણ વર્ગમાં ખુશીનો માહોલ છે ત્યારે મધ્યપ્રદેશ કોંગ્રેસના એક નેતાએ EWS અંગે સુપ્રીમ કોર્ટમાં સમીક્ષા અરજી દાખલ કરી છે. જેમાં તેમણે EWS મુદ્દે કેન્દ્રના નિર્ણયને યથાવત રાખવાના નિર્ણયનો વિરોધ કર્યો છે. ઉલ્લેખનીય છે કે થોડા દિવસ પહેલા જ સુપ્રીમ કોર્ટે આર્થિક રીતે નબળા વર્ગને આપવામાં આવતા EWS ક્વોટા પર મહત્વનો નિર્ણય સંભળાવ્યો હતો. 3:2 બહુમતી દ્વારા પાંચ ન્યાયાધીશોની બંધારણીય બેન્ચે બંધારણના 103મા સુધારા કાયદાની માન્યતાને સમર્થન આપ્યું છે, જેમાં શૈક્ષણિક સંસ્થાઓ અને સરકારી નોકરીઓમાં 10% EWS અનામતની જોગવાઈ હતી.

ત્રણ જજનું સમર્થન, બેનો વિરોધ

જસ્ટિસ દિનેશ મહેશ્વરી, જસ્ટિસ બેલા એમ ત્રિવેદી, જસ્ટિસ જેબી પારડીવાલા EWS અનામત પર સંમત થયા છે. ત્રણેય જજોનું માનવું છે કે આ અનામત બંધારણનું ઉલ્લંઘન કરતું નથી. ત્રણ ન્યાયાધીશોએ એમ પણ કહ્યું કે EWS આરક્ષણ 50 ટકા અનામતની મર્યાદાનું ઉલ્લંઘન કરતું નથી. તે જ સમયે, CJI જસ્ટિસ યુયુ લલિત અને જસ્ટિસ રવિન્દ્ર ભટે આ અંગે અસહમતિ વ્યક્ત કરી હતી.

કોણે અને શા માટે કર્યો વિરોધ ?

હવે આ નિર્ણય પર રિવ્યુ પિટિશન દાખલ કરવામાં આવી છે. મધ્યપ્રદેશના કોંગ્રેસના નેતા ડૉ. જયા ઠાકુરે સુપ્રીમ કોર્ટના ચુકાદા સામે સમીક્ષા અરજી દાખલ કરી હતી જેણે 103મા સુધારા EWS આરક્ષણની બંધારણીય માન્યતાને સમર્થન આપ્યું હતું. કોંગ્રેસ નેતા ઉદિત રાજે પણ વિરોધ કર્યો હતો. ચુકાદા પછી, કોંગ્રેસના નેતા ઉદિત રાજે કહ્યું હતું કે તેઓ EWS અનામતનો વિરોધ નથી કરી રહ્યા, પરંતુ સુપ્રીમ કોર્ટની ઉચ્ચ જાતિ તરફી માનસિકતાનો વિરોધ કરી રહ્યા છે. જ્યારે SC અને ST માટે અનામતની વાત આવે છે, ત્યારે ઈન્દિરા સાહની કેસને ટાંકીને SC અને ST અને OBC માટે 50 ટકા અનામતની મર્યાદા ટાંકવામાં આવી છે. આજે બંધારણને ટાંકીને કહેવામાં આવી રહ્યું છે કે ના, અનામતની કોઈ મર્યાદા નથી.