ગુજરાત વિધાનસભાએ 2002ના રમખાણો પર આધારિત ડોક્યુમેન્ટ્રી દ્વારા વડા પ્રધાન નરેન્દ્ર મોદીની છબી અને લોકપ્રિયતાને બગાડવા બદલ BBC વિરુદ્ધ કેન્દ્ર પાસેથી કડક પગલાં લેવાની માંગ કરતો ઠરાવ પસાર કર્યો હતો. દરખાસ્તને આગળ વધારતા ભાજપના ધારાસભ્ય વિપુલ પટેલે ગૃહમાં જણાવ્યું હતું કે બીબીસી દ્વારા ‘ઇન્ડિયાઃ ધ મોદી ક્વેશ્ચન’ નામની વિવાદાસ્પદ બે ભાગની શ્રેણી 2002ની ઘટનાઓને ખોટી રીતે રજૂ કરે છે. તેમણે કહ્યું કે આ વૈશ્વિક સ્તરે ભારતની છબી ખરાબ કરવાનો નિમ્ન સ્તરનો પ્રયાસ છે.
આ પણ વાંચો : મોહનથાળનો પ્રસાદ બંધ કરવાના વિરોધમાં આજે અંબાજી બંધ
ડોક્યુમેન્ટ્રીમાં રમખાણોના અમુક પાસાઓની તપાસ કરવાનો દાવો કરવામાં આવ્યો છે. ગોધરા ટ્રેન સળગાવવાની ઘટના બાદ આ રમખાણો થયા હતા. ઘટના સમયે મોદી ગુજરાતના મુખ્યમંત્રી હતા. ડોક્યુમેન્ટ્રી રિલીઝ થયા બાદ ભારતમાં તેના પર પ્રતિબંધ મુકવામાં આવ્યો હતો. વિપુલ પટેલના પ્રસ્તાવને ભાજપના ધારાસભ્ય મનીષા વકીલ, અમિત ઠાકરે અને મંત્રી હર્ષ સંઘવીએ ટેકો આપ્યો હતો. કોંગ્રેસના ધારાસભ્યોની ગેરહાજરીમાં અવાજ મત દ્વારા ઠરાવ પસાર કરવામાં આવ્યો હતો કારણ કે દિવસ દરમિયાન કોંગ્રેસ પક્ષના ધારાસભ્યોને ગૃહમાંથી હાંકી કાઢવામાં આવ્યા હતા. સર્વસંમતિ સાથે ઠરાવ પસાર કર્યા પછી, વિધાનસભા અધ્યક્ષ શંકર ચૌધરીએ કહ્યું કે બીબીસીનો પ્રયાસ નિંદનીય છે. તેમણે કહ્યું કે ગૃહે તેનો સંદેશ કેન્દ્ર સુધી પહોંચાડવા માટે ઠરાવ પસાર કર્યો.
વિપુલ પટેલે કહ્યું કે, ‘ભારત એક લોકશાહી દેશ છે અને અભિવ્યક્તિની સ્વતંત્રતા તેના બંધારણનો મૂળ વિષય છે, પરંતુ તેનો અર્થ એ નથી કે સમાચાર માધ્યમોએ આવી સ્વતંત્રતાનો દુરુપયોગ કરવો જોઈએ.’ તેમણે વિધાનસભામાં કહ્યું, ‘જો કોઈ આવું વર્તન કરશે તો તેને હળવાશથી લેવામાં આવશે નહીં. BBC તેની વિશ્વસનીયતા ગુમાવી રહ્યું છે અને એવું લાગે છે કે તે ભારત અને ભારત સરકાર વિરુદ્ધ કોઈ છુપાયેલા એજન્ડા સાથે કામ કરી રહ્યું છે. તેથી, આ ગૃહ કેન્દ્ર સરકારને વિનંતી કરે છે કે ડોક્યુમેન્ટ્રીમાં દોરવામાં આવેલા તારણો માટે બીબીસી સામે કડક પગલાં લેવામાં આવે.
