ગુજરાત સહિત દેશભરમાં જાણીતા પીઢ ફોટો જર્નાલિસ્ટ પદ્મશ્રી ઝવેરીલાલ મહેતાનું આજે નિધન થયું છે. તેઓ 97 વર્ષના હતા. ઝવેરીલાલ મહેતા હાલમાં તેમના દીકરીના ઘરે રહેતા હતા. તેમનું નિધન તેમની પુત્રી કાનન જોશીના ઘરે વય-સંબંધિત બીમારીને કારણે થયું હતું. આવતીકાલે સવારે 11 કલાકે અમદાવાદના શારદા મંદિર સ્થિત તેમના નિવાસસ્થાનેથી તેઓની અંતિમયાત્રા નીકળશે તેવું જાણવા મળી રહ્યું છે. જ્યાં મોટી સંખ્યામાં અગ્રણીઓ હાજરી આપી તેમને શ્રદ્ધાંજલિ પાઠવશે. વડાપ્રધાન નરેન્દ્ર મોદીએ પણ સ્વ.ઝવેરીલાલ મહેતાને ટ્વિટ કરી શ્રદ્ધાંજલિ પાઠવી હતી.
ગુજરાતના જાણીતા ફોટો જર્નાલિસ્ટ ઝવેરીલાલ મહેતાના અવસાનના સમાચાર અત્યંત દુઃખદ છે.
અખબાર જગતમાં લાંબી કારકિર્દી દરમિયાન ફોટો જર્નાલિઝમ ક્ષેત્રે એમનું યોગદાન હંમેશાં યાદ રહેશે.
સદ્ગતના આત્માની શાંતિ માટે પ્રાર્થના તથા શોકગ્રસ્ત પરિવારને સાંત્વના…
ૐ શાંતિ…!! pic.twitter.com/F1HvhfG5u8
— Narendra Modi (@narendramodi) November 27, 2023
ઝવેરીલાલ પોતાને ફોટો જર્નાલિસ્ટ ગણાવતા
સામાન્ય રીતે કોઈપણ ફોટોગ્રાફી કરનાર વ્યક્તિ કે જે અખબારમાં નોકરી કરતા હોય તેઓને ફોટોગ્રાફર ગણાવવામાં આવતા હોય છે પરંતુ ઝવેરીલાલ મહેતાની ખાસિયત એ હતી કે તેઓ પોતાને ફોટો જર્નાલિસ્ટ તરીકે ઓળખાવતા અને પોતે જે ફોટા પાડે તેની લાઈન પણ જાતે જ લખતા. તેમની ઘણી ફોટો સ્ટોરી અનેક લોકો માટે પ્રેરણાદાયક પણ બની રહેતી.
1970ના દાયકાથી ગુજરાત સમાચાર સાથે જોડાયેલા હતા
મળતી માહિતી મુજબ, સૌરાષ્ટ્રના સુરેન્દ્રનગર જિલ્લાના હળવદના વતની ઝવેરીલાલે 1970ના દાયકાથી ગુજરાત સમાચાર સાથે મુખ્ય ફોટો પત્રકાર તરીકે કામ કર્યું હતું. તેમની રાષ્ટ્રીય રાજધાની નવી દિલ્હીમાં ફોટો જર્નાલિસ્ટ તરીકે નિયુક્તિ કરવામાં આવી હતી. સ્વર્ગસ્થ વડાપ્રધાન ઈન્દિરા ગાંધી ઝવેરીલાલને રાખડી બાંધતા હતા. કિશોર કુમાર જેવી સ્ટાઈલીંગ માટે જાણીતા, ઝવેરીલાલ માત્ર તેમના ફોટોગ્રાફ માટે જ નહીં, પણ ફોટો લાઈન્સ માટે પણ વખાણવામાં આવ્યા હતા, જેમાં તેઓ ઈમેજ પર પોતાનો અભિપ્રાય વ્યક્ત કરતા હતા.
ઝવેરીલાલને રાજ્ય કક્ષાના અસંખ્ય પુરસ્કારો મળ્યા હતા
મહત્વનું છે કે, ઝવેરીલાલને રાજ્ય કક્ષાના અસંખ્ય પુરસ્કારો મળ્યા હતા, પરંતુ તત્કાલિન રાષ્ટ્રપતિના હાથે 2018માં રાષ્ટ્રીય સન્માન પદ્મશ્રી પણ મળ્યા હતા. છેલ્લી સદીના ઉત્તરાર્ધના દાયકાઓમાં ઝવેરીલાલની લોકપ્રિયતા અને સેલિબ્રિટીના દરજ્જાને જોતા, કારકિર્દી તરીકે ફોટો જર્નાલિઝમના માર્ગે અસંખ્ય યુવા અંકુર જોડાયા હતા. ઝવેરીલાલના નિધનથી ગુજરાતી ફોટો જર્નાલિઝમના યુગનો અંત આવ્યો છે.
