E-20 પેટ્રોલ દેશમાં પહેલીવાર લોન્ચ, જાણો ક્યાંથી મળશે ?
E-20 એટલે કે ફ્યુઅલ 20 સંબંધિત મોટા સમાચાર સામે આવી રહ્યા છે. રિલાયન્સ ઈન્ડસ્ટ્રીઝ અને BPએ સાથે મળીને તેની શરૂઆત કરી છે. Jio-BPએ E20 પેટ્રોલ માર્કેટમાં લોન્ચ કર્યું છે. તાજેતરમાં જ પીએમ મોદીએ બેંગ્લોરમાં એનર્જી વીક કાર્યક્રમ દરમિયાન E20 પેટ્રોલ લોન્ચ કર્યું હતું.
E20 પેટ્રોલ નામ કેમ રખાયું ?
20 ટકા ઈથેનોલ સાથે મિક્સ પેટ્રોલને E-20 પેટ્રોલ તરીકે ઓળખવામાં આવે છે. E20 પેટ્રોલ 20 ટકા ઇથેનોલ મિક્સ કરીને બજારમાં વેચવામાં આવશે. Jio-BP દેશમાં 20 ટકા ઇથેનોલ મિક્સ પેટ્રોલ માર્કેટમાં લોન્ચ કરનારી પ્રથમ કંપની બની છે. જેણે દેશમાં સૌપ્રથમ આની શરૂઆત કરી હતી. હાલમાં E20 પેટ્રોલ પસંદગીના Jio-BP પેટ્રોલ પંપ પર ઉપલબ્ધ થશે અને ટૂંક સમયમાં તે તમામ Jio-BP પંપ પર ઉપલબ્ધ થશે.
શા માટે પેટ્રોલમાં ઇથેનોલ ઉમેરવામાં આવ્યું?
કેન્દ્ર સરકારે દેશની ઓઈલ ઈમ્પોર્ટ કોસ્ટ ઘટાડવા માટે એક પહેલ શરૂ કરી છે. જેના કારણે કેન્દ્ર સરકારે ઉર્જા સુરક્ષા, ઓછા કાર્બન ઉત્સર્જન, સારી હવાની ગુણવત્તા, આત્મનિર્ભરતા, સ્ટબલ જેવા અવશેષોનો ઉપયોગ અને ખેડૂતોની આવક વધારવા માટે પેટ્રોલમાં ઇથેનોલ ભેળવવા માટેની માર્ગદર્શિકા બહાર પાડી હતી. Jio-BPનું E20 પેટ્રોલ દેશની ઉર્જા સુરક્ષાને ધ્યાનમાં રાખીને લોન્ચ કરવામાં આવ્યું છે.
20 વર્ષમાં માંગ ઝડપથી વધશે
ઈંધણ અને ગતિશીલતાને લઈને ભારતીય બજારમાં ઘણી તેજી જોવા મળી રહી છે. E20ને આગામી 20 વર્ષોમાં વિશ્વમાં સૌથી ઝડપથી વિકસતા બળતણ તરીકે
જોવામાં આવે છે. Jio-BP મોબિલિટી સ્ટેશન આ વધતી માંગને પહોંચી વળવા માટે ડિઝાઇન કરવામાં આવ્યા છે. ભારત સરકાર 2040 સુધીમાં ઇથેનોલની વૈશ્વિક
માંગમાં 25 ટકા હિસ્સો હાંસલ કરવાના લક્ષ્ય સાથે પણ કામ કરી રહી છે.
ખેડૂતોને ફાયદો થયો, માંગ વધી
ભારતે પેટ્રોલમાં ઇથેનોલ મિશ્રણ 2013-14માં 1.53 ટકાથી વધારીને 2022માં 10.17 ટકા કર્યું છે. 2025 સુધીમાં 20 ટકા મિશ્રણનો લક્ષ્યાંક હાંસલ કરવા માટે, દેશને
10.2 થી 11 અબજ લીટર ઇથેનોલની જરૂર છે. દેશમાં 318 લાખ મેટ્રિક ટનના CO2 ઉત્સર્જનમાં ઘટાડો અને લગભગ રૂ. 54,000 કરોડની વિદેશી હૂંડિયામણની બચત સહિત અન્ય ઘણા ફાયદાઓ થયા છે. 2014-2022 દરમિયાન ઇથેનોલ સપ્લાય માટે લગભગ રૂ. 81,800 કરોડ ચૂકવવામાં આવ્યા છે, જેમાં માત્ર ખેડૂતોને રૂ. 49,000 કરોડથી વધુ રકમ મળી છે. તેનાથી ખેડૂતોને ઘણો ફાયદો થશે.
