RBI: રેપોરેટ યથાવત્ રહેતા મધ્યમ વર્ગ ઉપર EMIનો બોજ નહીં વધે

• કાર-હોમ લોન મોંઘી નહીં થાય, રેપો રેટ 6.5 ટકા પર યથાવત
• વર્તમાન વર્ષ 2023-24 માટે વાસ્તવિક જીડીપી વૃદ્ધિ 7 ટકા હોઈ શકે છે
• RBI ગવર્નર શક્તિકાંત દાસે અંદાજિત ફુગાવાના આંકડા જાહેર કર્યા

નવી દિલ્હી,08 ડિસેમ્બર: ભારતીય રિઝર્વ બેંક(RBI)ના ગવર્નરે સામાન્ય લોકોને નવા વર્ષની મોટી ભેટ આપી છે. આગામી દિવસોમાં હોમ અને કાર લોનના EMIમાં કોઈ વધારો થશે નહીં. દેશની કેન્દ્રીય બેંક, ભારતીય રિઝર્વ બેંકે ત્રણ દિવસ સુધી ચાલેલી નાણાકીય નીતિની બેઠકમાં લીધેલા નિર્ણયોની જાહેરાત કરી છે. આરબીઆઈ ગવર્નરે સતત 5મી વખત વ્યાજ દરોમાં કોઈ ફેરફાર કર્યો નથી. આનો અર્થ એ થયો કે આરબીઆઈ સામાન્ય લોકોને હોમ અને કાર લોન EMI પર રાહત આપશે. આરબીઆઈના ગવર્નર શક્તિકાંત દાસે જણાવ્યું હતું કે, મોનેટરી પોલિસી કમિટીએ પોલિસી રેપો રેટને 6.5 ટકા પર યથાવત રાખવાનો સર્વસંમતિથી નિર્ણય લીધો છે. જ્યારે કાયમી થાપણ સુવિધા દર 6.25 ટકા અને સીમાંત કાયમી સુવિધા દર અને બેંક દર 6.75 ટકા રહેશે.

આનાથી રિયલ એસ્ટેટ સેક્ટરને વેગ મળશે, જેમાં સતત પ્રગતિ જોવા મળી રહી છે. હાલમાં રેપો રેટ 6.50 ટકા છે. છેલ્લી વખત RBI MPC એ ફેબ્રુઆરી 2023 માં વ્યાજ દરોમાં ફેરફાર કર્યો હતો. તે પછી આ સ્થિતિ સતત જળવાઈ રહી છે. ખાસ વાત એ છે કે આ બેઠક કેલેન્ડર વર્ષની છેલ્લી બેઠક હતી.

આરબીઆઈએ મે 2022થી વ્યાજ દરમાં વધારો કરવાની જાહેરાત કરી હતી. ત્યારબાદ અચાનક 0.40 ટકાનો વધારો કરવામાં આવ્યો હતો. ત્યારથી ફેબ્રુઆરી 2023 સુધી સતત વધારો જોવા મળ્યો હતો. જેના કારણે આ સમયગાળા દરમિયાન રેપો રેટમાં 2.50 ટકાનો વધારો થયો અને રેપો રેટ 6.50 ટકા થયો. નિષ્ણાતોના મતે સામાન્ય લોકોને વ્યાજ દરમાં ઘટાડા માટે લાંબો સમય રાહ જોવી પડી શકે છે. હાલમાં જ SBIના Ecowrap રિપોર્ટમાં પણ ઉલ્લેખ કરવામાં આવ્યો છે કે આરબીઆઈ આવતા વર્ષે જૂન સુધી વ્યાજ દરોમાં કોઈ ફેરફાર કરશે નહી. તે પછી જ લોન EMIમાં રાહત મળવાની શક્યતા છે.

#WATCH | RBI Governor Shaktikanta Das says, “…The Monetary Policy Committee decided unanimously to keep the policy repo rate unchanged at 6.5%. Consequently, the Standing Deposit Facility rate remains at 6.25% and the Marginal Standing Facility rate and the Bank Rate at 6.75%.” pic.twitter.com/yQSppS7IzJ

— ANI (@ANI) December 8, 2023

દેશનો જીડીપી 7 ટકા પર રહેશે

આરબીઆઈ ગવર્નર શક્તિકાંત દાસે ચાલુ નાણાકીય વર્ષ માટે જીડીપી વૃદ્ધિના અંદાજમાં વધારો કર્યો છે. આરબીઆઈ ગવર્નરે કહ્યું કે, વર્તમાન વર્ષ 2023-24 માટે વાસ્તવિક જીડીપી વૃદ્ધિ 7 ટકા હોઈ શકે છે. ત્રીજા ત્રિમાસિક ગાળામાં વૃદ્ધિ 6.5 ટકા અને ચોથા ત્રિમાસિક ગાળામાં 6 ટકા રહેવાની ધારણા છે. નાણાકીય વર્ષ 2024-25 ના પ્રથમ ત્રિમાસિક ગાળા માટે વાસ્તવિક જીડીપી વૃદ્ધિ 6.7 ટકા રહેવાનો અંદાજ છે. આ વૃદ્ધિ બીજા ત્રિમાસિક ગાળામાં 6.5 ટકા અને ત્રીજા ત્રિમાસિક ગાળામાં 6.4 ટકા રહી શકે છે.

ભારત હાલમાં વિશ્વમાં સૌથી ઝડપથી આર્થિક વિકાસ કરતો દેશ છે. બીજા ત્રિમાસિક ગાળામાં ભારતનો જીડીપી 7 ટકાથી વધુ હતો. જે બાદ તમામ નાણાકીય સંસ્થાઓએ તેમના અંદાજમાં સુધારો કર્યો છે. બધાએ ચાલુ નાણાકીય વર્ષમાં જીડીપી અંદાજ વધારીને 7 ટકા કર્યો છે. જે અગાઉ 6.5 ટકા કે તેથી ઓછો હતો. છેલ્લી બેઠકમાં આરબીઆઈએ જીડીપી માત્ર 6.5 ટકા રહેવાનો અંદાજ મૂક્યો હતો.

#WATCH | RBI Governor Shaktikanta Das says, “…CPI (consumer price index) inflation is projected at 5.4% for the current year 2023-24, with Q3 at 5.6% and Q4 at 5.2%. CPI inflation for Q1 of 2024-25 is projected at 5.2%, Q2 at 4% and Q3 at 4.7%. The risks are evenly balanced.” pic.twitter.com/euzW21089n

— ANI (@ANI) December 8, 2023

RBI ગવર્નરે મોંઘવારી પર શું કહ્યું?

આરબીઆઈના ગવર્નર શક્તિકાંત દાસે પણ અંદાજિત ફુગાવાના આંકડા જાહેર કર્યા હતા. તેમણે કહ્યું હતું કે, ચાલુ વર્ષ 2023-24 માટે CPI (કન્ઝ્યુમર પ્રાઇસ ઇન્ડેક્સ) ફુગાવો 5.4 ટકા હોઈ શકે છે. જો ત્રીજા ત્રિમાસિક ગાળાની વાત કરીએ તો આ અંદાજ 5.6 ટકા હોઈ શકે છે. જ્યારે ચોથા ત્રિમાસિક ગાળામાં આ ફુગાવાનો અંદાજ 5.2 ટકા રહી શકે છે. આગામી નાણાકીય વર્ષના પ્રથમ ત્રિમાસિક ગાળામાં ફુગાવો 5.2 ટકા રહેવાની ધારણા છે. જ્યારે બીજા ત્રિમાસિક ગાળામાં તે 4 ટકા અને ત્રીજા ત્રિમાસિક ગાળામાં 4.7 ટકા હોઈ શકે છે.

જો કે નવેમ્બર મહિનાના અંદાજિત ફુગાવાના આંકડા ઘણા ડરામણા છે. ઘણા નિષ્ણાતોએ નવેમ્બર મહિના માટે CPI ફુગાવો 6 ટકાથી વધુ રહેવાનો અંદાજ મૂક્યો છે. જેનું મુખ્ય કારણ કાંદા અને ટામેટાના ભાવ જણાવવામાં આવી રહ્યા છે. બીજી તરફ આ સમયગાળા દરમિયાન દાળના ભાવમાં વધારો જોવા મળ્યો છે. જેની અસર ફુગાવા પર જોવા મળી શકે છે.

આ પણ વાંચો, રાજીનામાં આપનાર ભાજપના સાંસદોને સરકારી ઘર ખાલી કરવાની નોટિસ