રામાનંદ સાગરની ‘રામાયણ’ના રામ થયા ગુસ્સે કહ્યું ‘શ્રદ્ધા અને ભક્તિ સાથે ચેડાં કરવા તે બિલકુલ ખોટું છે’

‘રામાયણ’માં ‘રામ’ બનેલા અરુણ ગોવિલે ફિલ્મ ‘આદિપુરુષ’ના વિવાદો પર પોતાની પ્રતિક્રિયા આપી છે. તેણે કહ્યું કે, મને સમજાયું નહીં કે મેકર્સ મૂળ ભાવના સાથે ચેડા કરીને શું સાબિત કરવા માગે છે. પ્રભાસ , સૈફ અલી ખાન , અને કૃતિ સેનન ફિલ્મ ‘આદિપુરુષ’ રિલીઝ થઈ ત્યારથી જ વિવાદોમાં ફસાઈ છે. ફિલ્મમાં દર્શકોએ ડાયલોગ્સ અને ગ્રાફિક્સને લઈને અનેક સવાલો ઉઠાવ્યા છે. જેના પર હવે રામાનંદ સાગરની ‘રામાયણ’માં ‘રામ’નું પાત્ર ભજવનાર અભિનેતા અરુણ ગોવિલે પણ પોતાની પ્રતિક્રિયા આપી છે.

અરુણ ગોવિલે કહ્યું કે, રામાયણ અમારા માટે આસ્થાનો વિષય છે અને તેના સ્વરૂપ સાથે કોઈપણ પ્રકારની છેડછાડ અસ્વીકાર્ય છે. અરુણે કહ્યું કે રામાયણ વિશે આધુનિકતા અને પૌરાણિક કથાઓ વિશે વાત કરવી ખોટી છે, ફિલ્મની સ્પેશિયલ ઈફેક્ટ્સની વાત અલગ છે. અહીં વાત પાત્રોને યોગ્ય રીતે રજૂ કરવાની છે અને તેના વિશે ઘણી બાબતો ચાલી રહી છે, જે ચિંતાનો વિષય છે.

રામ-સીતા-હનુમાનને આધુનિકતા અને પૌરાણિક કથાના માળખામાં વહેંચવું ખોટું છે. આ બધા આદિ, અનંત છે અને આ બધા રૂપ પહેલાથી જ નક્કી છે, તો ફિલ્મમાં એક જ રૂપ બતાવવામાં શું વાંધો હતો અને મેકર્સ મૂળ ભાવના સાથે ચેડા કરીને શું સાબિત કરવા માગે છે. જો મેકર્સે આ ફિલ્મ બાળકો માટે બનાવી છે તો બાળકને પૂછો કે તેને ફિલ્મ ગમી કે નહીં?

જ્યાં સુધી ફિલ્મના સંવાદોનો સવાલ છે તો તેણે કહ્યું કે મને આ પ્રકારની ભાષા પસંદ નથી અને હું હંમેશા સંયમિત ભાષાનો ઉપયોગ કરું છું અને આવી સ્થિતિમાં હું રામાયણમાં આ પ્રકારની ભાષાને સમર્થન આપતો નથી. વળી, રામાયણને હોલિવૂડથી પ્રેરિત કાર્ટૂન ફિલ્મની જેમ રજૂ કરવી એ કોઈ રીતે પચવા જેવું નથી.જ્યારે ફિલ્મના સંશોધનની વાત આવે છે ત્યારે નિર્માતાઓએ સર્જનાત્મક સ્વતંત્રતા લીધી છે,

પરંતુ જો તેઓ ફિલ્મમાં તેમનું નવું ઇનપુટ મૂકવા માંગતા હોય, તો તે યોગ્ય નથી. આ ઉપરાંત અરુણે બોલિવૂડમાં રામાયણ પર ફિલ્મો બનાવવાના નિર્માતાઓને સૂચન કરતાં કહ્યું કે, હું એટલું જ કહેવા માંગીશ કે રામાયણની મૂળ ભાવના ભવિષ્યની ફિલ્મોમાં જળવાઈ રહેશે અને મૂળ સ્વરૂપ સાથે છેડછાડ કરશો નહીં.

આ પણ વાંચો : રથયાત્રા 2023: કોમી રમખાણો હોય કે કોરોના મહામારી, શ્રદ્ધા રહી અડગ