- મોડીરાત્રે થયેલા એન્કાઉન્ટરમાં ચાર જવાન થયા છે શહીદ
- રાજનાથ સિંહે આર્મી ચીફ જનરલ ઉપેન્દ્ર દ્વિવેદી સાથે કરી ટેલિફોનિક વાતચીત
જમ્મુ, 16 જુલાઈ : જમ્મુના ડોડામાં થયેલા આતંકવાદી હુમલાને લઈને ભારત સરકાર કડક મૂડમાં છે. આજે મંગળવારે (16 જુલાઈ 2024) ના રોજ થયેલા આ હુમલા બાદ સંરક્ષણ પ્રધાન રાજનાથ સિંહે આર્મી ચીફ જનરલ ઉપેન્દ્ર દ્વિવેદી સાથે ફોન પર વાત કરી. તેમણે આર્મી ચીફને આતંકવાદી ઘટનાઓ સાથે કડકાઈથી વ્યવહાર કરવા સૂચના આપી હતી.
આર્મી ચીફને યોગ્ય કાર્યવાહી કરવા જણાવાયું
મળતી માહિતી મુજબ રાજનાથ સિંહે જનરલ ઉપેન્દ્ર દ્વિવેદીને ફોન કરીને કહ્યું કે આતંકવાદીઓ અને તેમના સંગઠનોને લઈને કોઈ પણ પ્રકારની ઢીલ ન રાખવી જોઈએ. રક્ષા મંત્રી રાજનાથ સિંહે આર્મી ચીફ પાસેથી ડોડામાં આતંકીઓ સાથે ચાલી રહેલા એન્કાઉન્ટરની માહિતી લીધી હતી. આર્મી ચીફને યોગ્ય કાર્યવાહી કરવા માટે પણ કહેવામાં આવ્યું છે.
આ પણ વાંચો : તલાક વગર કરી લીધા બીજા લગ્ન, હવે પતિ-પત્નીને સુપ્રીમ કોર્ટ તરફથી મળી અનોખી સજા
સેનાના 4 જવાન શહીદ થયા છે
તમને જણાવી દઈએ કે જમ્મુના ડોડા જિલ્લામાં મોડી રાત્રે ભારે હથિયારોથી સજ્જ આતંકવાદીઓએ અચાનક હુમલો કર્યો હતો. આતંકવાદીઓની માહિતી મળતાની સાથે જ સેના ઘટનાસ્થળે પહોંચી ગઈ હતી અને એન્કાઉન્ટર શરૂ થયું હતું. આ અથડામણમાં ગંભીર રીતે ઘાયલ થયેલા એક અધિકારી સહિત સેનાના ચાર જવાનો શહીદ થયા છે.
રાત્રે સર્ચ ઓપરેશન દરમિયાન એન્કાઉન્ટર થયું હતું
સેનાના અધિકારીઓએ જણાવ્યું કે રાષ્ટ્રીય રાઈફલ્સ અને જમ્મુ અને કાશ્મીર પોલીસના સ્પેશિયલ ઓપરેશન ગ્રુપના જવાનોએ 12.45 વાગ્યે દેસા ફોરેસ્ટ વિસ્તારના ધારી ગોટે ઉરબાગીમાં સંયુક્ત કોર્ડન અને સર્ચ ઓપરેશન શરૂ કર્યું, ત્યારબાદ એન્કાઉન્ટર શરૂ થયું. આતંકવાદીઓની ગોળીઓથી જવાનો ઘાયલ થયા હતા. જે બાદ ઘાયલ જવાનોએ સારવાર દરમિયાન દમ તોડ્યો.
આ હુમલાની જવાબદારી કાશ્મીર ટાઈગર્સે લીધી
સેનાના અધિકારીઓનું કહેવું છે કે કોર્ડન મજબૂત કરવામાં આવ્યું છે. સૈનિકોને મજબૂત સમર્થન આપવા માટે વધારાના દળોને વિસ્તારમાં મોકલવામાં આવ્યા છે. સર્ચ ઓપરેશન અને એન્કાઉન્ટર હજુ પણ ચાલુ છે. દરમિયાન આતંકી સંગઠન કાશ્મીર ટાઈગર્સે આ આતંકી હુમલાની જવાબદારી લીધી છે.
આ પણ વાંચો : ‘ભારત રશિયા સાથેના મજબૂત સંબંધોનો ઉપયોગ કરી યુક્રેન યુદ્ધ અટકાવે’, અમેરિકાની અપીલ
