રાજકુમાર સંતોષીને જામનગર કોર્ટે સંભળાવી 2 વર્ષની જેલની સજા, બે કરોડનો દંડ

• બોલિવૂડના જાણીતા ડિરેક્ટર-પ્રોડ્યુસર રાજકુમાર સંતોષી સામે છેતરપિંડીની ફરિયાદ
• મિત્રના એક કરોડ ઉછીના લઈને 10 લાખના 10ચેક આપ્યા હતા, જે બાઉન્સ થયા
• 19 સુનવણીઓમાં કોર્ટમાં હાજર ન થતા કોર્ટે  એક કરોડની સામે બે કરોડ ચૂકવવા કર્યો આદેશ

મુંબઈ, 17 ફેબ્રુઆરીઃ બોલિવૂડમાં ઘાયલ અને દામિની જેવી ફિલ્મોના ડિરેક્ટર રાજકુમાર સંતોષીને જામનગરની કોર્ટ દ્વારા ચેક બાઉન્સના એક કેસમાં સજા ફટકારવામાં આવી છે. મિત્ર પાસેથી ઉછીના લીધેલા 1 કરોડ રૂપિયા પેટે તેમણે 10 લાખના દસ ચેક આપ્યા હતા, જે બેંકમાં બેલેન્સ ન હોવાને કારણે રિટર્ન થયા હતા. આ મામલે જામનગર કોર્ટે રાજકુમાર સંતોષીને બે વર્ષની સજા અને ચેક રિટર્નના ડબલ પૈસા જમા કરવા માટે આદેશ કર્યો છે.

જામનગરના ઉદ્યોગપતિ પાસેથી 1 કરોડ લીધા હતા

બોલિવૂડના ફિલ્મ ડિરેક્ટર રાજકુમાર સંતોષીને જામનગરના ઉદ્યોગપતિ અશોકલાલ સાથે મિત્રતા હતી. જે તે સમયે રાજકુમાર સંતોષીએ પૈસાની જરૂર હોવાથી અશોકલાલ પાસેથી 1 કરોડ રૂપિયા ઉછીના લીધા હતા. આ માટે તેમણે રૂ.10 લાખના 10 ચેક અશોકલાલને આપ્યા હતા. ફરિયાદીએ ચેક બેંકમાં જમા કરતા ખાતામાં પૈસા ન હોવાથી તે બાઉન્સ થયા હતા. આથી ફરિયાદીએ વિશ્વાસઘાત અને છેતરપિંડી બદલ વકીલ મારફતે નોટિસ ફટકારી હતી.

કોર્ટે 2 વર્ષની જેલની સજા કરી

જામનગરની નામદાર કોર્ટ દ્વારા આ મામલે સુનાવણી હાથ ધરવામાં આવી હતી. જેમાં કોર્ટે ચુકાદો આપતા રાજકુમાર સંતોષીને 2 વર્ષની જેલની સજા ફટકારી છે. આ સાથે જ 1 કરોડની સામે 2 કરોડ રૂપિયા જમા કરવા માટે આદેશ કર્યો છે. અશોકકુમારે રાજકુમાર સંતોષીનો સંપર્ક કરવાનો પ્રયાસ કર્યો હતો, પરંતુ બંને વચ્ચે વાત થઈ ન શકતા અશોકકુમારે જામનગર કોર્ટમાં કેસ કર્યો હતો. આ કેસ નોંધાયા બાદ રાજકુમાર સંતોષી 18 સુનાવણીઓમાં કોર્ટ પહોંચ્યા ન હતા. શરૂઆતમાં કોર્ટે સંતોષીને કહ્યું હતું કે તેમણે દરેક બાઉન્સ ચેક માટે પીડિતને 15,000 રૂપિયા ચૂકવવા પડશે, પરંતુ હવે કોર્ટે ગંભીર ચુકાદો આપતા અશોકલાલને લોનની બમણી રકમ ચૂકવવાનો નિર્ણય કર્યો છે.

67 વર્ષના રાજકુમાર સંતોષી હિન્દી ફિલ્મ ઈન્ડસ્ટ્રીના પ્રખ્યાત નિર્માતા છે. તેમણે સની દેઓલ, શાહિદ કપૂર, રણબીર કપૂર, કેટરીના કૈફ, અમિતાભ બચ્ચન, અક્ષય કુમાર સહિત ઘણા મોટા સ્ટાર્સ સાથે કામ કર્યું છે. તેમણે ‘ખાકી’, ‘અજબ પ્રેમ કી ગઝબ કહાની’, ‘દામિની’ સહિત ઘણી ફિલ્મોનું નિર્માણ કર્યું છે. તેમણે ‘પુકાર’, ‘લજ્જા’, ‘દિલ હૈ તુમ્હારા’ અને ‘અંદાઝ અપના અપના’ જેવી ફિલ્મો પણ લખી છે.

આ પણ વાંચોઃ KGF સ્ટાર યશની સાદગી પર ફેન્સ ફિદા, કરિયાણાની દુકાનેથી પત્ની માટે ખરીદી કેન્ડી