અમદાવાદમાં થઈ રાજસ્થાનના રેગિંગ પીડિત વિદ્યાર્થીની સારવાર, સાતની ધરપકડઃ જાણો સમગ્ર કેસ

• રાજસ્થાનમાં મેડિકલ સ્ટુડન્ટ સાથે થયું રેગિંગ
• 300 વાર કરાવી ઉઠક- બેઠક, કિડનીમાં થયું ઇન્ફેક્શન
• પોલીસે 7 સિનિયર વિદ્યાર્થીઓ સામે ગુનો નોંઘી કરી ધરપકડ

અમદાવાદ, 26 જૂન: ડુંગરપુર મેડિકલ કોલેજના પ્રથમ વર્ષના MBBS વિદ્યાર્થીની સાથે ગયા મહિને કેટલાક સિનિયર વિદ્યાર્થીઓએ એવું રેગિંગ કર્યું કે તે વિદ્યાર્થીને સીધો હોસ્પિટલમાં દાખલ કરવો પડ્યો હતો અને પીડિત વિદ્યાર્થીને કિડનીના ઈન્ફેક્શનના કારણે ચાર વખત ડાયાલિસિસ કરાવવું પડ્યું હતું. ડુંગરપુર સદર પોલીસ સ્ટેશનના એસએચઓ ગિરધારી સિંહના જણાવ્યા અનુસાર, બીજા વર્ષના સાત વિદ્યાર્થીઓએ પીડિતાને 15 મેના રોજ કોલેજની નજીક એક જગ્યાએ 300 થી વધુ સિટ-અપ (ઉઠક- બેઠક) કરાવી હતી. તેમણે કહ્યું કે તેનાથી તે વિદ્યાર્થીની કિડની પર ગંભીર દબાણ આવ્યું હતું, જેના કારણે તે ખરાબ થઈ ગઈ અને ઈન્ફેક્શન થઈ ગયું હતું.

એક અઠવાડિયાથી અમદાવાદની હોસ્પિટલમાં દાખલ

પોલીસ અધિકારીએ જણાવ્યું કે પીડિતને એક અઠવાડિયાથી અમદાવાદની હોસ્પિટલમાં દાખલ કરવામાં આવ્યો છે. આ સમયગાળા દરમિયાન વિદ્યાર્થીનું ચાર વખત ડાયાલિસિસ કરવામાં આવ્યું હતું. વિદ્યાર્થીની હાલત હવે સ્થિર છે. જૂનમાં તે વિદ્યાર્થીએ ફરીથી કૉલેજમાં પ્રવેશ કર્યો છે.

એસએચઓએ જણાવ્યું હતું કે સંસ્થાની એન્ટિ-રેગિંગ સમિતિ દ્વારા તપાસમાં દોષિત ઠર્યા બાદ કોલેજના પ્રિન્સિપાલે મંગળવારે સાત આરોપી વિદ્યાર્થીઓ વિરુદ્ધ એફઆઈઆર નોંધાવી હતી. પીડિતએ ગયા વર્ષે સપ્ટેમ્બરમાં કોલેજમાં એડમિશન લીધું હતું. પોલીસ અધિકારીએ કહ્યું, ‘તેણે અગાઉ પણ રેગિંગનો સામનો કર્યો હતો, પરંતુ તેણે ફરિયાદ કરી ન હતી. તાજેતરની ઘટના ત્યારે પ્રકાશમાં આવી જ્યારે કોલેજ પ્રશાસનને 20 જૂને ઓનલાઈન પોર્ટલ દ્વારા ફરિયાદ મળી, જેના પગલે તપાસ હાથ ધરવામાં આવી.

આ કલમો હેઠળ કેસ નોંધવામાં આવ્યો

સાત વિદ્યાર્થીઓ સામે આઈપીસીની કલમ 323 (સ્વેચ્છાએ ઈજા પહોંચાડવી), 143 (ગેરકાયદેસર રીતે ભેગા થયું), 147, 149 (સામાન્ય ઈરાદાને આગળ વધારવા માટે કરવામાં આવેલ ગુનો), 341 અને 352 હેઠળ ગુનો નોંધવામાં આવ્યો છે. એસએચઓએ જણાવ્યું કે મામલાની તપાસ કરવામાં આવી રહી છે.

આ પણ વાંચો: NEET પેપર લીક મામલે CBIની મોટી કાર્યવાહી, હજારીબાગની ઓએસિસ સ્કૂલના પ્રિન્સિપાલની ધરપકડ