રાજસ્થાન : ગેહલોત સરકારને પૂર્વ ડેપ્યુટી સીએમ સચિન પાયલોટે ઘેરી, જાણો શું કહ્યું ?

રાજસ્થાનના પૂર્વ ડેપ્યુટી સીએમ સચિન પાયલટે સોમવારે નાગૌરના પરબતસરમાં કિસાન સંમેલનને સંબોધિત કરતી વખતે ગેહલોત સરકારને ઉગ્રતાથી ઘેરી હતી. પાયલોટે પોતાના સંબોધનમાં કહ્યું- જ્યારે પરીક્ષાઓના પેપર લીક થાય છે, પરીક્ષાઓ રદ થાય છે, ત્યારે મનમાં દુઃખ થાય છે. કારણ કે આપણા ખેડૂત ભાઈઓના બાળકો અને યુવાનો વર્ષોથી રાહ જુએ છે. યુવાનોમાં આત્મવિશ્વાસ કેળવવા માટે સરકારે નાના લોકોના બદલે મોટા જવાબદાર લોકો પર કાર્યવાહી કરવી જોઈએ.

વસુંધરાના શાસનકાળમાં અમે ન્યાય યાત્રા કાઢી, કેન્દ્ર પાસેથી MSP માંગી

વધુમાં સચિન પાયલોટે કહ્યું- વસુંધરા રાજેના શાસનકાળમાં અમે કિસાન ન્યાય યાત્રા કાઢી હતી, તેની સામે ઝૂકીને રાજ્ય સરકારે અમારી માંગણીઓ સ્વીકારી હતી. આ મુલાકાત વખતે હું પ્રદેશ કોંગ્રેસ અધ્યક્ષ હતો. પાયલોટે કહ્યું કે અમે કેન્દ્ર સરકાર પાસે પાક માટે લઘુત્તમ ટેકાના ભાવ અંગે કાયદો ઘડવાની માંગ કરીએ છીએ. જો દેશના ખેડૂત અને યુવાનો એક થઈ જશે તો તે આવી દરેક શક્તિને હરાવી દેશે. જે તોડવા માંગે છે, અફવાઓ ફેલાવવા માંગે છે અને જુઠ્ઠુ બોલીને સત્તામાં આવવા માંગે છે. જાતિ, સમુદાય, ધર્મ, ભાષા, પ્રદેશના નામે જે રાજકારણ થઈ રહ્યું છે તેના ઝેરને માત્ર બે જ સમુદાયો તોડી શકે છે, એક છે યુવા અને બીજો ખેડૂતો. ભાજપે ખેડૂતોની આવક બમણી કરવાનું વચન આપ્યું હતું, પરંતુ ભાજપ સરકારે ત્રણ કાળા કૃષિ કાયદા બનાવીને ખેડૂતોની કમર તોડવાનું કામ કર્યું હતું. પરંતુ ખેડૂતોએ આંદોલન કરીને સરકારને ઝુકાવી દીધી હતી.

અમને મજબૂત બનાવવું હોય તો ધારાસભ્ય ગાવડિયાને મજબૂત કરો

વધુમાં સચિને સભાને કહ્યું – નાગૌરના પરબતસરના ધારાસભ્ય રામનિવાસ ગાવડિયા મારા નાના ભાઈ છે. તમે લોકોએ અમને મજબુત બનાવવું હશે તો રામનિવાસ ગાવડિયાને મજબૂત કરવા પડશે. આ પ્રસંગે મંત્રી હેમારામ ચૌધરી, પરબતસરના ધારાસભ્ય રામનિવાસ ગાવડિયા, દાતારામગઢના ધારાસભ્ય વિરેન્દ્ર સિંહ ચૌધરી, લાડનુ ધારાસભ્ય મુકેશ ભાકર, પૂર્વ મંત્રી નસીમ અખ્તર ઈન્સાફ સહિત હજારો ખેડૂતો હાજર રહ્યા હતા.