પોર્નોગ્રાફી કેસમાં રાજ કુન્દ્રાને EDનું સમન્સ, પૂછપરછ માટે બોલાવ્યા

મુંબઈ, 1 ડિસેમ્બર : EDએ બોલિવૂડ અભિનેત્રી શિલ્પા શેટ્ટીના પતિ અને બિઝનેસમેન રાજ કુન્દ્રાને પોર્નોગ્રાફી અને એડલ્ટ ફિલ્મોના કથિત વિતરણ સંબંધિત મની લોન્ડરિંગ કેસમાં સમન્સ જારી કર્યા છે. કુન્દ્રાને આ અઠવાડિયે તપાસ એજન્સી સમક્ષ હાજર થવા માટે કહેવામાં આવ્યું છે. ED દ્વારા 49 વર્ષીય કુન્દ્રા અને કેટલાક અન્ય વ્યક્તિઓના ઘર અને ઓફિસ સહિત મુંબઈ અને ઉત્તર પ્રદેશના કેટલાક શહેરોમાં લગભગ 15 સ્થળોએ દરોડા પાડ્યા બાદ આ સમન્સ જારી કરવામાં આવ્યા હતા.

EDએ આ કેસ સાથે જોડાયેલા અન્ય લોકોને પણ સમન્સ જારી કર્યા છે અને તેમને પૂછપરછ માટે તેની મુંબઈ ઓફિસમાં બોલાવ્યા છે. રાજ કુન્દ્રાને સોમવારે સવારે 11 વાગ્યે ED ઓફિસ આવવા માટે કહેવામાં આવ્યું છે. રાજ કુન્દ્રાના વકીલ પ્રશાંત પાટીલે મીડિયા સાથે વાત કરતા કહ્યું કે તેમના અસીલે કોઈ ગુનો કર્યો નથી. તેણે કહ્યું, ‘મેં હજુ સુધી મારા ક્લાયન્ટ સાથે વાત કરી નથી, પરંતુ હું તમને કહી શકું છું કે તે નિર્દોષ છે. મુંબઈ પોલીસની ચાર્જશીટ જોઈએ તો રાજ કુન્દ્રાના વ્યવહારો કાયદેસર છે. તેણે ટેક્સ ચૂકવી દીધો છે. હું તમને ખાતરી આપી શકું છું કે રાજ કુન્દ્રાએ મની લોન્ડરિંગ જેવો કોઈ ગુનો કર્યો નથી.

રાજ કુન્દ્રાની પણ ધરપકડ થઈ, ફરી જામીન મળ્યા

મની લોન્ડરિંગ કેસ મે 2022 માં રાજ કુન્દ્રા અને અન્યો વિરુદ્ધ મુંબઈ પોલીસ દ્વારા દાખલ કરવામાં આવેલી ઓછામાં ઓછી બે એફઆઈઆર અને ચાર્જશીટમાંથી ઉદ્ભવે છે. આ કેસમાં બિઝનેસમેન અને અન્ય કેટલાક લોકોની પણ ધરપકડ કરવામાં આવી હતી, જેમને બાદમાં કોર્ટમાંથી જામીન મળી ગયા હતા. કુન્દ્રા સામે મની લોન્ડરિંગનો આ બીજો કેસ છે. આ વર્ષની શરૂઆતમાં, EDએ ક્રિપ્ટો કરન્સી કેસમાં રાજ કુન્દ્રા અને શિલ્પા શેટ્ટીની રૂ.98 કરોડની સંપત્તિ જપ્ત કરી હતી. જો કે, તેમને તેમની મિલકતો જપ્ત કરવા સામે બોમ્બે હાઈકોર્ટમાંથી રાહત મળી હતી.

પોલીસ પાસે મારી વિરુદ્ધ કોઈ પુરાવા નથીઃ રાજ કુન્દ્રા

રાજ કુન્દ્રાએ 2021માં મુંબઈની એક સ્થાનિક કોર્ટને કહ્યું હતું કે પ્રોસિક્યુશન (મુંબઈ પોલીસ) પાસે કથિત પોર્ન ફિલ્મ રેકેટમાં ઉપયોગમાં લેવાતી એપ ‘હોટશોટ’ને કાયદા હેઠળ ગુનો બનાવવા માટે એક પણ પુરાવા નથી. તપાસ એજન્સીના જણાવ્યા અનુસાર, ‘હોટશોટ’ એપનો ઉપયોગ આરોપીઓ અશ્લીલ સામગ્રી અપલોડ કરવા અને સ્ટ્રીમ કરવા માટે કરી રહ્યા હતા.

મને કેસમાં બલિનો બકરો બનાવવામાં આવી રહ્યો છે

કુન્દ્રાએ દાવો કર્યો હતો કે કથિત પોર્નોગ્રાફી કેસમાં તેમની સક્રિય સંડોવણીના કોઈ પુરાવા નથી. તેણે પોતાને ફસાવવાનો આરોપ લગાવ્યો હતો. રાજ કુન્દ્રાએ કોર્ટમાં કહ્યું હતું કે તેમનું નામ એફઆઈઆરમાં પણ નથી, પરંતુ પોલીસે તેમને આ કેસમાં ખેંચી લીધા હતા. ઉદ્યોગપતિએ તેની અરજીમાં દાવો કર્યો હતો કે તેને ‘બલિનો બકરો’ બનાવવામાં આવી રહ્યો છે, જેના કારણો તપાસકર્તાઓને વધુ સારી રીતે ખબર હશે.

આ પણ વાંચો :- ડિસેમ્બરના પહેલાં જ દિવસે ઝટકો, LPG સિલિન્ડરના ભાવમાં કરાયો વધારો