રાહુલ દ્રવિડની IPLમાં થઈ શકે છે વાપસી! જાણો કઈ ટીમ સાથે મળશે જોવા

• ટીમ ઈન્ડિયાના મુખ્ય કોચ રહી ચૂકેલા રાહુલ દ્રવિડ IPL ટીમ રાજસ્થાન રોયલ્સ સાથે મુખ્ય કોચ તરીકે વાપસી કરી શકે છે. વાતચીત ચાલી રહી છે, ટૂંક સમયમાં સત્તાવાર જાહેરાત થઈ શકે છે

મુંબઈ, 23 જુલાઈ: ભારતીય ક્રિકેટ ટીમના મુખ્ય કોચ રહી ચૂકેલા રાહુલ દ્રવિડ ફરી એકવાર IPLમાં વાપસી કરતા જોવા મળી શકે છે. રાહુલ દ્રવિડના કોચિંગ હેઠળ જ ટીમ ઈન્ડિયાએ 2024નો T20 વર્લ્ડ કપ જીત્યો હતો, ત્યારબાદ તેમનો કાર્યકાળ સમાપ્ત થઈ ગયો હતો. પરંતુ દ્રવિડ જેવો ખેલાડી કદાચ લાંબા સમય સુધી મેદાનથી દૂર ના જ રહી શકે. તે આવતા વર્ષે ઈન્ડિયન પ્રીમિયર લીગમાં વાપસી કરી શકે છે. તે પણ તેની જૂની ટીમ સાથે. એવું કહેવાય છે કે વાતચીત ચાલી રહી છે અને જો બધુ બરાબર રહ્યું તો ટૂંક સમયમાં તેની જાહેરાત પણ થઈ શકે છે.

રાજસ્થાન રોયલ્સ સાથે મળી શકે છે રાહુલ દ્રવિડ

અત્યાર સુધી પ્રકાશમાં આવી રહેલા સમાચારોમાં એવું કહેવામાં આવી રહ્યું છે કે રાહુલ દ્રવિડ IPL ટીમ રાજસ્થાન રોયલ્સ સાથે જોડાઈ શકે છે. આ અંગે ટાઈમ્સ ઓફ ઈન્ડિયાનો એક અહેવાલ પ્રકાશમાં આવ્યો છે. રિપોર્ટમાં સૂત્રોને ટાંકીને કહેવામાં આવ્યું છે કે રાહુલ દ્રવિડ અને રાજસ્થાન રોયલ્સ વચ્ચે વાતચીત ચાલી રહી છે, આ અંગે ટૂંક સમયમાં મહત્વની જાહેરાત કરવામાં આવી શકે છે. રાહુલ દ્રવિડ મુખ્ય કોચ તરીકે ટીમમાં વાપસી કરતા જોવા મળી શકે છે. રાહુલ દ્રવિડ અને રાજસ્થાન રોયલ્સ વચ્ચેના સંબંધો નવા નથી. તે વર્ષો સુધી ટીમનો કેપ્ટન હતો. તેની કપ્તાની હેઠળ જ રાજસ્થાન રોયલ્સે 2013માં પ્લેઓફમાં પ્રવેશ કર્યો હતો. આ પછી તે 2014 અને 2015 સુધી ટીમના મેન્ટર રહ્યા હતા.

ટીમ ઈન્ડિયા માટે અત્યાર સુધી નિભાવી મહત્વની જવાબદારીઓ

વર્ષ 2015માં રાહુલ દ્રવિડ રાજસ્થાન ટીમના મેન્ટરમાંથી નીકળી ગયા અને ભારતીય ક્રિકેટમાં જોડાયા. રાહુલ દ્રવિડ અગાઉ અંડર-19 ટીમના કોચ હતા અને ભારત A ટીમની જવાબદારી પણ તેમના ખભા પર હતી. આ પછી તેઓ NCA એટલે કે બેંગલુરુ સ્થિત નેશનલ ક્રિકેટ એકેડમીના અધ્યક્ષ હતા. ત્યાંથી રાહુલ દ્રવિડ સિનિયર ટીમ ઈન્ડિયા સાથે જોડાયા. તેમણે વર્ષ 2021માં આ જવાબદારી સંભાળી હતી, ત્યારબાદ તે સતત ટીમ સાથે રહ્યો. આ સમયગાળા દરમિયાન કેટલાક ખાટા અને કેટલાક મીઠા અનુભવો થયા. પરંતુ તેનો કાર્યકાળ પૂરો થાય તે પહેલા જ તેમણે રોહિત શર્માની કપ્તાનીમાં ભારતને T20 વર્લ્ડ કપનું ટાઇટલ અપાવ્યું હતું. હવે જોવાનું એ રહે છે કે રાજસ્થાન રોયલ્સ અને રાહુલ દ્રવિડ વચ્ચેના પરસ્પર જોડાણના સમાચાર સત્તાવાર રીતે ક્યારે પ્રકાસમાં આવે છે.

આ પણ વાંચો: આ ભારતીય શૂટરને મળશે ઓલિમ્પિક ઓર્ડર સન્માન, IOCનો મોટો નિર્ણય