રાહુલ અને પ્રિયંકાને અમેઠી – રાયબરેલીથી ચૂંટણી લડાવવા પ્રસ્તાવ

• કોંગ્રેસની કેન્દ્રીય ચૂંટણી સમિતિની બેઠકમાં થઈ ચર્ચા
• સભ્યોએ અંતિમ નિર્ણય પક્ષ અધ્યક્ષ ઉપર છોડ્યો

નવી દિલ્હી, 27 એપ્રિલ : રાજધાની દિલ્હીમાં કોંગ્રેસની કેન્દ્રીય ચૂંટણી સમિતિની બેઠક યોજાઈ હતી. બેઠકમાં રાહુલ ગાંધી અને પ્રિયંકા ગાંધીને અમેઠી અને રાયબરેલીથી ઉમેદવાર બનાવવાની વિનંતી કરવામાં આવી છે. સીઈસી સભ્યો અને યુપીના પ્રભારી જનરલ સેક્રેટરી અને વિધાયક દળના નેતાએ પણ ઉમેદવારો ઉભા કરવા વિનંતી કરી છે. જો કે આ અંગેનો અંતિમ નિર્ણય કોંગ્રેસ અધ્યક્ષ મલ્લિકાર્જુન ખડગે પર છોડવામાં આવ્યો છે. કોંગ્રેસના નેતાઓ કેસી વેણુગોપાલ, પ્રતાપ સિંહ બાજવા અને અમરિંદર સિંહ રાજા વાડિંગ સહિત ઘણા દિગ્ગજ નેતાઓએ સીઈસીની બેઠકમાં હાજરી આપી હતી.

મળતી માહિતી મુજબ, કોંગ્રેસની રાજ્ય ચૂંટણી સમિતિએ અમેઠીથી રાહુલ ગાંધી અને રાયબરેલીથી પ્રિયંકા ગાંધીના નામનો પ્રસ્તાવ મૂક્યો છે. સમિતિએ આ દરખાસ્ત ચૂંટણી સમિતિને મોકલી હતી. આ પછી ચૂંટણી સમિતિએ અંતિમ નિર્ણય ગાંધી પરિવાર પર છોડી દીધો છે. કોંગ્રેસ આજે આ બંને લોકપ્રિય બેઠકો પર ઉમેદવારોના નામની જાહેરાત કરી શકે છે.

અમેઠી લોકસભા બેઠકનો ઈતિહાસ

અમેઠી એ ઉત્તર પ્રદેશનો 72મો જિલ્લો છે જેને બહુજન સમાજ પાર્ટીની સરકાર દ્વારા 1 જુલાઈ 2010ના રોજ સત્તાવાર રીતે અસ્તિત્વમાં લાવવામાં આવ્યો હતો. શરૂઆતમાં તેનું નામ છત્રપતિ સાહુજી મહારાજ નગર હતું પરંતુ તેને બદલીને અમેઠી કરવામાં આવ્યું હતું. આ ભારતના નેહરુ-ગાંધી પરિવારનું રાજકીય કાર્યસ્થળ રહ્યું છે. ભૂતપૂર્વ વડા પ્રધાન જવાહરલાલ નેહરુ, તેમના પૌત્ર સંજય ગાંધી, રાજીવ ગાંધી અને તેમની પત્ની સોનિયા ગાંધી આ જિલ્લાનું પ્રતિનિધિત્વ કરી ચૂક્યા છે. 2014ની સામાન્ય ચૂંટણીમાં રાહુલ ગાંધી અહીંથી સાંસદ તરીકે ચૂંટાયા હતા પરંતુ 2019ની લોકસભા ચૂંટણીમાં તેમને ભારતીય જનતા પાર્ટીની સ્મૃતિ ઈરાનીએ હાર આપી હતી.

રાયબરેલી બેઠકનો ઇતિહાસ

મતવિસ્તાર તરીકે, રાયબરેલી કોંગ્રેસનો ગઢ છે. આ પૂર્વ વડાપ્રધાન ઈન્દિરા ગાંધીનો મતવિસ્તાર છે અને સોનિયા ગાંધી 1999થી સતત પાંચમી વખત અહીંથી સાંસદ તરીકે ચૂંટાયા હતા. કોંગ્રેસ પાર્ટીને અહીંથી ત્રણ વખત હારનો સામનો કરવો પડ્યો છે. રાયબરેલી લોકસભા મતવિસ્તાર હેઠળ પાંચ વિધાનસભા મતવિસ્તાર છે. 2011ની વસ્તી ગણતરી મુજબ, આશરે 35 લાખની વસ્તી ધરાવતા આ જિલ્લામાં પ્રતિ ચોરસ કિલોમીટરે 739 લોકો રહે છે. રાયબરેલીની 67.25 ટકા વસ્તી સાક્ષર છે. આમાં પુરુષોનો સાક્ષરતા દર 77.63 ટકા અને સ્ત્રીઓનો સાક્ષરતા દર 56.29 ટકા છે.