બિહારમાં કરોડોની કિંમતનું પકડાયું રેડિયોએક્ટિવ કેલિફોર્નિયા, ન્યુક્લિયર રિએક્ટરમાં થાય છે ઉપયોગ

બિહાર, 10 ઓગસ્ટ: બિહારના ગોપાલગંજ જિલ્લામાં પોલીસે ત્રણ તસ્કરોને પકડી પાડ્યા છે, જેમની પાસેથી કરોડો રૂપિયાની કિંમતનો 50 ગ્રામ રેડિયોએક્ટિવ પદાર્થ મળી આવ્યો છે. તેનો ઉપયોગ પરમાણુ રિએક્ટરમાં થાય છે. આ બાબતની માહિતી મળતાં સમગ્ર વિભાગમાં દોડધામ મચી ગઈ હતી, ત્યાર બાદ ગોપાલગંજ પોલીસે આ માહિતી ડિપાર્ટમેન્ટ ઓફ એટોમિક એનર્જી (DAE)ના અધિકારીઓને આપી છે.

બાતમીના આધારે પોલીસે તપાસ હાથ ધરી

એજન્સી અનુસાર, ગોપાલગંજમાં પોલીસને એક બાતમીદાર પાસેથી માહિતી મળી હતી, જેના પછી કુચાઈકોટ પોલીસ સ્ટેશન વિસ્તારના બલથરી વિસ્તારમાંથી ત્રણ લોકોની ધરપકડ કરવામાં આવી હતી. તેની પૂછપરછ અને તપાસ કરતા તેની પાસેથી 50 ગ્રામ કિરણોત્સર્ગી પદાર્થ ‘કેલિફોર્નિયમ’ મળી આવ્યો હતો. આ ઉપરાંત તેમની પાસેથી ચાર મોબાઈલ ફોન પણ મળી આવ્યા છે.

મળેલા પદાર્થની નિષ્ણાતો દ્વાર કરવામાં આવી રહી છે તપાસ

પોલીસે નિવેદનમાં કહ્યું છે કે કેલિફોર્નિયાની તપાસ માટે ફોરેન્સિક નિષ્ણાતોને બોલાવવામાં આવ્યા છે. વરિષ્ઠ પોલીસ અધિકારીએ જણાવ્યું હતું કે આ કિરણોત્સર્ગી પદાર્થનો ઉપયોગ પરમાણુ રિએક્ટર શરૂ કરવા, કોલસા પાવર પ્લાન્ટમાં, કેન્સરની સારવાર અને તેલ ડ્રિલિંગ માટે થાય છે.

પકડાયેલા આરોપી પુપી અને બિહારના રહેવાસી

આ મામલે એસપી દ્વારા જારી કરાયેલા નિવેદનમાં કહેવામાં આવ્યું છે કે 50 ગ્રામ કેલિફોર્નિયમ રેડિયોએક્ટિવ પદાર્થ સાથે 3 દાણચોરોની ધરપકડ કરવામાં આવી છે. ગુપ્ત માહિતીના આધારે કુચાયકોટ પોલીસ સ્ટેશન, ડીઆઈયુ ટીમ, એસઓજી-7 અને એસટીએફએ બલથરી ચેકપોસ્ટ પર દરોડો પાડ્યો હતો. જ્યારે ત્રણેય આરોપીઓની તપાસ કરવામાં આવી ત્યારે 50 ગ્રામ શંકાસ્પદ કેલિફોર્નિયમ (કિંમતી કિરણોત્સર્ગી પદાર્થ) મળી આવ્યો હતો. પોલીસે ત્રણેય આરોપીઓ સામે ગુનો નોંધી કાર્યવાહી હાથ ધરી છે.

અણુ ઊર્જા વિભાગને પણ માહિતી આપવામાં આવી છે. ધરપકડ કરાયેલા આરોપીઓમાં કુશીનગર યુપીના રહેવાસી છોટાલાલ પ્રસાદ, ગોપાલગંજ બિહારના રહેવાસી ચંદન ગુપ્તા અને ગોપાલગંજ બિહારના રહેવાસી ચંદન રામનો સમાવેશ થાય છે. તેમની પાસેથી શંકાસ્પદ કેલિફોર્નિયમ તેમજ ચાર મોબાઈલ ફોન તેમજ એક બાઇક પણ જપ્ત કરવામાં આવ્યું છે.

આ પણ વાંચો: ભારતમાં જલ્દી જ કંઇક મોટું થવાનું છે: હિંડનબર્ગ રિસર્ચની ચેતવણીથી ફરી વધ્યું ટેન્શન