કતર કોર્ટે ભારતની અરજી સ્વીકારી, ફાંસીની સજા પામેલા 8 ભારતીયો માટે આશાનું કિરણ

• આઠ ભારતીયોની  ગયા વર્ષે ઓગસ્ટમાં જાસૂસીના આરોપમાં ધરપકડ કરવામાં આવી હતી.
• 26 ઓક્ટોબરે કતર કોર્ટે ભારતીય નૌકાદળના 8 પૂર્વ કર્મચારીઓને મૃત્યુદંડની સજા સંભળાવી હતી.

નવી દિલ્હી: કતરમાં જાસૂસીના આરોપમાં મૃત્યુદંડની સજા સંભળાવવામાં આવેલા ભારતીય નૌકાદળના 8 ભૂતપૂર્વ અધિકારીઓને આશાનું કિરણ જોવા મળ્યું છે. કતરની કોર્ટે ભારતીય નૌકાદળના 8 ભૂતપૂર્વ કર્મચારીઓને આપવામાં આવેલી ફાંસીની સજા સામેની અપીલ સ્વીકારી લીધી છે. આ આઠ ભારતીયોએ વ્યક્તિગત રીતે કોર્ટમાં અરજી કરી છે, પરંતુ ભારત સરકારે આમાં ચોક્કસપણે મદદ કરી છે. આ આઠ ભારતીયોની કથિત રીતે ગયા વર્ષે ઓગસ્ટમાં જાસૂસીના આરોપમાં ધરપકડ કરવામાં આવી હતી.

26 ઓક્ટોબરે કતરની કોર્ટે આઠ ભારતીયોને મૃત્યુદંડની સજા સંભળાવી હતી. જો કે ભારતે કતર કોર્ટના આ નિર્ણયને ચોંકાવનારો ગણાવ્યો અને કહ્યું કે, તે આ મામલે તમામ કાયદાકીય વિકલ્પોની શોધ કરશે. સરકારે કહ્યું હતું કે કતર કોર્ટ દ્વારા દોષિત ઠરેલા ભારતીય નૌકાદળના 8 ભૂતપૂર્વ અધિકારીઓને રાહત આપવાના તમામ પ્રયાસો કરવામાં આવી રહ્યા છે. હાલમાં ફાંસીની સજા સામે અપીલ દાખલ કરવામાં આવી છે.

કતરે હજુ સુધી આરોપો જાહેર કર્યા નથી

વિદેશ મંત્રાલયના પ્રવક્તા અરિંદમ બાગચીએ કહ્યું હતું કે, ભારત આ મામલે કતરના અધિકારીઓ સાથે વાતચીત કરી રહ્યું છે અને સરકાર ભારતીય નાગરિકોને તમામ કાયદાકીય અને કોન્સ્યુલર સહાય પૂરી પાડતી રહેશે. આ સમગ્ર પ્રક્રિયા દરમિયાન કતર સરકાર દ્વારા આ નિર્ણયને ગુપ્ત રાખવામાં આવ્યો છે. કતરના સત્તાવાળાઓ કે નવી દિલ્હીએ ભારતીય નાગરિકો સામેના આરોપો જાહેર કર્યા નથી. જોકે, મીડિયા રિપોર્ટ્સમાં દાવો કરવામાં આવ્યો છે કે, આ તમામ ભૂતપૂર્વ ભારતીય નૌસેના અધિકારીઓ પર ઈઝરાયેલ માટે જાસૂસી કરવાનો આરોપ છે.

શું કહ્યું વિદેશ મંત્રાલયે

વિદેશ મંત્રાલયે કહ્યું હતું કે, અમે મૃત્યુદંડના નિર્ણયથી અત્યંત આઘાતમાં છીએ અને વિગતવાર નિર્ણયની રાહ જોઈ રહ્યા છીએ. અમે પરિવારના સભ્યો અને કાનૂની ટીમના સંપર્કમાં છીએ અને તમામ કાયદાકીય વિકલ્પોની શોધ કરી રહ્યા છીએ. અમે આ બાબતને ખૂબ મહત્વ આપીએ છીએ અને તેની નજીકથી દેખરેખ રાખી રહ્યા છીએ. અમે તમામ કોન્સ્યુલર અને કાયદાકીય સહાય પૂરી પાડવાનું ચાલુ રાખીશું. આ કેસની કાર્યવાહીની ગોપનીય પ્રકૃતિને કારણે, આ સમયે વધુ ટિપ્પણી કરવી યોગ્ય રહેશે નહીં.

ગયા વર્ષે ઓગસ્ટમાં ધરપકડ કરવામાં આવી હતી

26 ઓક્ટોબરે કતર કોર્ટે ખાનગી સુરક્ષા કંપની અલ દહરામાં કામ કરતા ભારતીય નૌકાદળના 8 પૂર્વ કર્મચારીઓને મૃત્યુદંડની સજા સંભળાવી હતી. આ આઠ કર્મચારીઓની ગયા વર્ષે ઓગસ્ટમાં કથિત જાસૂસી કેસમાં ધરપકડ કરવામાં આવી હતી. તમામ આઠ ભારતીય ખાનગી કંપની દહારા ગ્લોબલ ટેક્નોલોજીસ એન્ડ કન્સલ્ટન્સી સર્વિસમાં કામ કરતા હતા. જે ઓમાની નાગરિકની માલિકીની સંરક્ષણ સેવાઓ પ્રદાતા કંપની છે, જે રોયલ ઓમાની એરફોર્સના નિવૃત્ત સ્ક્વોડ્રન લીડર છે. કતરમાં ભારતના રાજદૂત આ વર્ષે 1 ઓક્ટોબરે આ કર્મચારીઓને જેલમાં મળ્યા હતા. એટલું જ નહીં આ આઠમાંથી કેટલાકના પરિવારજનો પણ કતરમાં મળ્યા છે. મૃત્યુદંડની સજા સંભળાવનારાઓમાં કેપ્ટન નવતેજ સિંહ ગિલ, કેપ્ટન સૌરભ વશિષ્ઠ, કમાન્ડર પૂર્ણેન્દુ તિવારી, કેપ્ટન બિરેન્દ્ર કુમાર વર્મા, કમાન્ડર સુગુનાકર પાકલા, કમાન્ડર સંજીવ ગુપ્તા, કમાન્ડર અમિત નાગપાલ અને નાવિક રાગેશનો સમાવેશ થાય છે.

આ પણ વાંચો, ભાજપના 4ને બદલે 8 લોકોને જેલમાં મોકલીશું, TMC નેતાઓની ધરપકડથી મમતા નારાજ